كەزدەسۋ بارىسىندا قازاقستان مەن قىتاي اراسىنداعى ۇزاقمەرزىمدى, جان-جاقتى ستراتەگيالىق سەرىكتەستىكتىڭ قازىرگى احۋالى مەن پەرسپەكتيۆالارى, سونداي-اق حالىقارالىق جانە ايماقتىق ۇيىمدار اياسىنداعى ىنتىماقتاستىق ماسەلەلەرى تالقىلاندى.
مەملەكەت باسشىسى 30 جىل ىشىندەگى ستراتەگيالىق سەرىكتەستىكتىڭ دەڭگەيىنە جوعارى باعا بەرىپ, قازاقستان مەن قىتايدىڭ ءوزارا ەكىجاقتى كەشەندى بايلانىستارىن نىعايتا بەرۋگە بەيىلدى ەكەنىن ايتتى.
مەملەكەت باسشىسى قحر توراعاسى سي ءتسزينپيننىڭ الداعى كۇزدە ەلىمىزگە جوسپارلانعان مەملەكەتتىك ساپارى ەكىجاقتى قاتىناستاردى دامىتۋعا تىڭ سەرپىن بەرەدى دەپ ۇمىتتەنەتىنىن جەتكىزدى.
«بيىل – وتە ماڭىزدى جىل. قازاقستان مەن قىتاي اراسىنداعى ديپلوماتيالىق قاتىناستاردىڭ ورناعانىنا 30 جىل تولدى. قىتايدا كوممۋنيستىك پارتيانىڭ حح سەزىن وتكىزۋ جوسپارلانعان. الداعى جوعارى دەڭگەيدەگى كەلىسسوزدەر ءبىزدىڭ ستراتەگيالىق سەرىكتەستىگىمىزدىڭ جىلناماسىنا ەرەكشە وقيعا رەتىندە جازىلادى», دەدى پرەزيدەنت.
سونىمەن قاتار كەزدەسۋدە قاسىم-جومارت توقاەۆ قىتايلىق ارىپتەسىنە جۇرەكجاردى سالەمىن جولدادى جانە قحر-دىڭ توراعالىعىمەن وتەتىن جوعارى دەڭگەيدەگى «بريكس پليۋس» ونلاين-ديالوگىنا قاتىسۋعا شاقىرعانى ءۇشىن ريزاشىلىعىن ءبىلدىردى. ونلاين-ديالوگ جاڭا داۋىردە دامۋ ءۇشىن جاھاندىق سەرىكتەستىك ورناتۋ تاقىرىبىنا ارنالعان.
قاسىم-جومارت توقاەۆ قحر توراعاسىنىڭ جاھاندىق قاۋىپسىزدىك جانە دامۋ سالاسىنداعى باستاماسىنا قولداۋ بىلدىرەتىنىن ايتتى. ونىڭ تولىققاندى جۇزەگە اسىرىلۋى الەمدىك دەڭگەيدەگى قاۋىپسىزدىك پەن سەنىمگە جەتپەي تۇرعان ولقىلىقتاردىڭ ورنىن تولتىرۋعا مۇمكىندىك بەرەدى, سونداي-اق بۇۇ-نىڭ 2030 جىلعا دەيىنگى ورنىقتى دامۋ سالاسىنداعى ماقساتتارىن جۇزەگە اسىرۋعا ىقپال ەتەدى.
ۆان ي قاسىم-جومارت توقاەۆقا سي ءتسزينپيننىڭ سالەمى مەن ەلىمىزدەگى جالپىۇلتتىق رەفەرەندۋمنىڭ تابىستى وتۋىنە بايلانىستى قۇتتىقتاۋىن جەتكىزدى.
«رەفەرەندۋم ناتيجەلەرى مەملەكەتتى جان-جاقتى جاڭعىرتۋ ءۇشىن ءسىزدىڭ باسشىلىعىڭىزبەن قابىلدانىپ جاتقان شارالاردى ەل ازاماتتارىنىڭ بارىنشا قولدايتىنىن كورسەتەدى. مۇنىڭ جاڭا قازاقستاندى قۇرۋ ءۇشىن زور ءمانى بار, سونداي-اق ەلدىڭ كەلەشەك دامۋىنىڭ بەرىك نەگىزىن قالىپتاستىرادى», دەدى قىتاي مەملەكەتتىك كەڭەسىنىڭ مۇشەسى.
قىتاي ءمينيسترى ەكى ەل كوشباسشىلارىنىڭ دانا باسشىلىعىنىڭ ارقاسىندا قحر مەن قازاقستاننىڭ ەكىجاقتى قارىم-قاتىناستارى ۇلكەن ومىرلىك كۇشكە يە بولاتىنىن اتاپ ءوتتى.
«توراعا سي تسزينپين سىزبەن اراداعى جەكە دوستىقتى جانە ءوزارا سەنىمدى جوعارى باعالايدى. جاڭا قازاقستان قۇرۋ جونىندەگى باستاماڭىز ءسىزدىڭ دانالىعىڭىز بەن باتىلدىعىڭىزدى كورسەتەدى. ءبىز ءسىزدىڭ باستامالارىڭىزدىڭ ءساتتى جۇزەگە اسىرىلۋىن تولىققاندى قولدايمىز», دەدى ۆان ي.
كەزدەسۋ بارىسىندا قاسىم-جومارت توقاەۆ پەن ۆان ي ايماقتىق جانە جاھاندىق كۇن ءتارتىبىنىڭ وزەكتى ماسەلەلەرى جونىندە پىكىر الماستى. ولار حالىقارالىق ارەناداعى, سونىڭ ىشىندە بىرىككەن ۇلتتار ۇيىمى, شانحاي ىنتىماقتاستىق ۇيىمى جانە ازياداعى ءوزارا ءىس-قيمىل جانە سەنىم شارالارى جونىندەگى كەڭەس, يسلام ىنتىماقتاستىعى ۇيىمى اياسىنداعى ىقپالداستىقتى جالعاستىرا بەرۋگە نيەتتى ەكەنىن ايتتى.
