ەدىل تەشەباەۆتىڭ تۋعان جەرى سارىاعاشتاعى ۇيىندە جانازاعا جينالعان ادام قاراسى كوپ. اسىلىپ قالعان كۇيى تابىلعان ساربازدىڭ دەنەسى 6 ماۋسىمدا جەتكىزىلگەن.
ء«ۇش ادامعا ءۇش ءتۇرلى ايتىپ وتىر. ءبىرىنشى, پىشاقتادى دەيدى, ارتىنشا بالاسىنا باتەڭكەنىڭ باۋىنا اسىلىپ قالدى دەيدى. ەندى كەپ اناسىنا پودپولكوۆنيك بەلدىگىنە اسىلىپ قالدى دەگەن», دەيدى مارقۇمنىڭ اپاسى گۇلجاميلا التىنبەكوۆا.
«بىرەۋدەن بەس مىڭ سۇراعان ەكەن. ول اقشانىڭ ءبارىن نەعىلا بەرەدى دەدىم. سول كەزدە 5 مىڭ اتاڭا نالەت دەپ, سالىپ جىبەرۋىم كەرەك ەدى. ويلامادىم عوي, مۇنداي بولادى دەپ, دەمەك, بالامنان اقشا سۇراعان. اقشا بەرمەگەننەن كەيىن ۇرىپ ولتىرگەن دە. باسقا نەسى بار. اسىلىپ قالدى دەيدى, بالام اسىلماعان. كوزىم جەتەدى وعان. بۇلار ءولتىرىپ الىپ, سودان كەيىن جالا جاۋىپ وتىر», دەيدى اكەسى باقىت التىنبەكوۆ.
ىستەگى تۇسىنىكسىز جايتتاردى مارقۇمنىڭ دوستارى دا ايتىپ وتىر. توعىز اي قىزمەتتە جۇرگەن سارباز وتباسىنىڭ جاعدايىنا بايلانىستى ولگىسى كەلەتىنىن جازا باستاۋى اقىلعا قونبايدى, دەيدى ولار. ولاردىڭ پىكىرىنشە, سارباز جازدى دەگەن سوڭعى حاتتاعى ءماتىن دە ءبىر عانا ادامنىڭ قولىمەن جازىلماعان.
ء«ار حاتتا ءارتۇرلى جازىلعان. ماعان جازىلعان حاتتا باسقاشا جازىلعان, ماماسىنا جازىلعان حاتىندا جازۋى مۇلدەم باسقاشا. ەكەۋىن ەكى ادام جازعان. ونىڭ جازۋى ءسال ناشارلاۋ ەدى. ءتىپتى داپتەرگە جازعاندا ءالفاۆيتتىڭ اراسىندا "ى", ء"ى" دەگەن ءارىپتى جازباي تاستاپ كەتۋشى ەدى, ءبىر ەكى ءارىپتى. ال بۇل جەردە حاتتا "ى", ء"ى" ارىپتەرى بىلاي تۇرسىن, ءۇتىر-نۇكتەگە دەيىن مانەرلەپ جازىلعان. ەدىل ولاي جازبايدى», دەيدى مارقۇمنىڭ دوسى ەرسۇلتان قانجىگىت.
ۇلىنىڭ دەنەسىن اقتاۋدان الىپ كەلگەن اناسى ەدىلدىڭ شاتى كوگەرىپ كەتكەنىن ايتادى. مەديتسينا سالاسىندا ىستەگەن ول ۇلىنىڭ قاساقانا ولتىرىلگەنىنە سەنىمدى.
«مەن ءوزىم حيرۋرگيادا ىستەگەم عوي, ءبىز دە ءمايىتحانادان ادام شىعارعانبىز. ول دەنەسىنەن جىلۋ كەتكەننەن كەيىن موينى, بارلىق جەرى قاتىپ قالادى, قيمىلدامايتىن. مۇنىڭ موينى, ومىرتقالارى انا جاققا, مىنا جاققا اينالىپ جاتىر. ونى ادەيى ولتىرگەن نەگىزى, سويتكەن دە, ءوزى دارعا اسىلدى قىلا سالعان», دەيدى مارقۇمنىڭ اناسى ناعيما نۇربايقىزى.
ال ساربازدىڭ ءمايىتىن جەتكىزگەن اسكەري ءبولىمنىڭ كومانديرى كەشىرىم رەتىندە ميلليون تەڭگە اكەلگەنىن ايتقان. بىراق مارقۇمنىڭ جاقىندارى ورە تۇرەگەلدى. قازىر تەرگەۋ ءجۇرىپ جاتقانىن ايتقان باسشى «ەدىل ءجيى ەسىنەن تانىپ قالا بەرەتىن» دەيدى.
«ارمياعا كەلگەننەن بەرى اۋا جەتپەي ەسىنەن تانىپ قالاتىن. توعىز اي بويى ەمەس, وسى سوڭعى ايدا ما, سول كەزدە ءبىر رەت كەتتى. ەسىنەن تاندى, ودان كەيىن اقتاۋعا گوسپيتالعا كەتتى, ەمدەلدى», دەيدى قر ۇقك شەكارا قىزمەتى باسقارماسى باستىعىنىڭ مىندەتىن اتقارۋشى اسقار اياعانوۆ.
تەلەارنا تىلشىلەرىنىڭ ايتۋىنشا, قازىر اسكەري تەرگەۋ باسقارماسى شەكاراشىنىڭ ءولىمى بويىنشا قىلمىستىق ءىس قوزعاپ, ارنايى تەكسەرۋدى باستادى. بىراق بۇل تۋرالى نە قورعانىس مينيسترلىگى, نە شەكارا قىزمەتىندەگىلەر رەسمي اقپارات بەرگەن جوق.
ەسكە سالايىق, 4 ماۋسىمدا ماڭعىستاۋ وبلىسىنداعى شەكارا قىزمەتىندە مەرزىمدى قىزمەتتەگى ساربازدىڭ ءولىمى حابارلانعان ەدى. ول سۋيتسيد جاسادى دەلىندى.
بۇل جاعدايعا قاتىستى پرەزيدەنت تە پىكىر بىلدىرگەن. ەدىل تەشەباەۆتىڭ ءولىمى حابارلانعان كۇنى قاسىم-جومارت توقاەۆ اسكەردەگى ءولىم سەبەپتەرىن تەرگەۋ جونىندەگى ارنايى كوميسسيا قۇرۋدى جانە بولاشاقتا مۇنداي جاعدايدىڭ الدىن الۋدى تاپسىرعان.
6 ماۋسىمدا قورعانىس مينيسترلىگى وكىلدەرى «اسكەردەگى ولىمگە جول بەرمەۋ» بويىنشا باعدارلاما ازىرلەنىپ جاتقانىن حابارلادى.
