پارتيا جانىنان پارلامەنت ءماجىلىسىنىڭ توراعاسى, پارتيا توراعاسى ەرلان قوشانوۆتىڭ باسشىلىعىمەن رەسپۋبليكالىق شتاب قۇرىلدى. شتاب قۇرامىنا پارلامەنت دەپۋتاتتارى, زيالى قاۋىم, مادەنيەت, سپورت, جاستار وكىلدەرى جانە تاعى دا باسقا ەل ومىرىندەگى بەلسەندى تۇلعالار ەندى. ايماقتاردا وبلىستىق جانە اۋداندىق دەڭگەيدەگى شتابتار قۇرىلىپ, رەسپۋبليكا بويىنشا بارلىعى 218 شتاب جۇمىس ىستەدى.
رەفەرەندۋمدى قولداۋ ماقساتىندا پارتيا باسشىلىعىنىڭ وڭىرلەرگە جۇمىس ساپارلارى جاسالدى. پارتيا توراعاسى ەرلان قوشانوۆ 3 وڭىرگە بارىپ, جەرگىلىكتى تۇرعىندارمەن, ءتۇرلى سالا وكىلدەرىمەن, ايماق بەلسەندىلەرىمەن كەزدەسۋلەر وتكىزدى. ماڭعىستاۋ, شىعىس قازاقستان جانە قاراعاندى وبلىستارىن ارالاۋ كەزىندە 600 ادامدى قامتىعان 11 ءىس-شارا وتكىزىلدى. ساپار بارىسىندا ەرلان قوشانوۆ رەفەرەندۋم جايلى ايتىپ, ەل تاعدىرىن شەشەتىن اۋقىمدى رەفورمالاردىڭ ءمان-ماڭىزىن ءتۇسىندىردى.
پارتيانىڭ ءباسپاسوز ورتالىعىندا وتكەن بريفينگ بارىسىندا Amanat پارتياسىنىڭ اتقارۋشى حاتشىسى اسحات ورالوۆ پەن ءماجىلىس توراعاسىنىڭ ورىنباسارى پاۆەل كازانتسەۆ اقپاراتتىق-ءتۇسىندىرۋ ناۋقانىنىڭ ناتيجەلەرى تۋرالى ايتتى.
«Amanat پارتياسى پرەزيدەنتتىڭ قوعامدىق تىرەگى رەتىندە ۇگىت-ناسيحات جۇمىسىنا ءبىرىنشى كۇننەن باستاپ بەلسەندى تۇردە كىرىسىپ كەتتى. رەسپۋبليكالىق شتاب قۇرىلدى. وعان پارتيا توراعاسى ەرلان قوشانوۆ جەتەكشىلىك ەتتى. ايماقتاردا 218 شتاب جۇمىس ىستەپ, 12 مىڭنان اسا ۇگىت-ناسيحات ءىس-شاراسى ءوتتى. بارلىق كەزدەسۋلەر ەركىن, اشىق فورماتتا جۇرگىزىلدى. ءبىز مۇنداي باسقوسۋلاردىڭ سانىنا ەمەس, ساپاسىنا ءمان بەردىك.
كونستيتۋتسيالىق وزگەرىستەردى حالىققا تۇسىنىكتى تىلمەن جەتكىزۋگە تىرىستىق. 5 ماۋسىمدا ازاماتتار ءوز تاڭداۋىن جاساپ, ەلدىڭ بولاشاق دامۋ جولىنا قاتىستى شەشىم قابىلدادى. وسى ارقىلى ەلىمىز جاڭا قازاقستاننىڭ ىرگەتاسىن قالادى. الدا كوپ جۇمىس, ۇلكەن مىندەتتەر تۇر», دەدى اسحات ورالوۆ.
«ۇگىت-ناسيحات كەزەڭى باستالعاننان بەرى باق-تا 70-تەن استام كەزدەسۋ جاريالاندى. جالپى, تەلەديداردا, ينتەرنەت-باسىلىمداردا, گازەتتەردە 118 ماتەريال شىقتى, سونىڭ ىشىندە تەلەديداردا 52 سيۋجەت, ينتەرنەت-باسىلىمداردا 28 جاريالانىم, گازەتتەردە 38 ماقالا. 700-دەن استام رەپوست ورنالاستىرىلدى.
پارتيا فيليالدارى, شتاب مۇشەلەرى الەۋمەتتىك جەلىلەردەگى رەسمي جانە جەكە پاراقشالارىندا 1700-دەن استام پوست جاريالادى. ۇگىت-ناسيحات جۇمىستارىنا قاتىسقان شتابتىڭ بارلىق مۇشەلەرىنە العىس ايتقىم كەلەدى. جۇمىسباستىلىعىنا قاراماستان, ولار تۇرعىندارمەن كەزدەسۋلەرگە ۋاقىت تابا ءبىلدى, ەنگىزىلگەلى وتىرعان وزگەرىستەردى ءتۇسىندىردى, كەڭەس بەردى, سۇراقتارعا جاۋاپ بەردى», دەپ اتاپ ءوتتى ول.
پارتيانىڭ اتقارۋشى حاتشىسى 5 ماۋسىم كۇنى بارشا قازاقستاندىقتاردىڭ ءبىر بەلەستى باعىندىرىپ, ەلدىڭ جاڭا دامۋ كەزەڭىنە اياق باسقانىن اتاپ ءوتتى. «مۇنى ءالى كوپ ادام جەتە تۇسىنبەگەن بولار, الايدا ۋاقىت وتە كەلە 5 ماۋسىم – تاريحي كۇن بولعانىن كەيىن مويىندايمىز. سەبەبى, بۇل رەفەرەندۋمدا ەل تاعدىرى شەشىلدى», دەپ اتاپ ءوتتى ول.
رەسپۋبليكالىق شتابتىڭ مۇرىندىق بولۋىمەن وتكىزىلگەن ءىس-شارالاردىڭ سانىنا ەمەس, ءبىرىنشى كەزەكتە ساپاسىنا ءمان بەرگەن ا.ورالوۆ پارتيانىڭ قوزعاۋشى كۇشى – بپۇ-نىڭ بازاسىندا دا جالپىۇلتتىق رەفەرەندۋمنىڭ ءمانى تۋرالى ءتۇسىندىرۋ جۇمىستارى بەلسەندى جۇرگىزىلگەنىن اتاپ ءوتتى.
جالپى, رەسپۋبليكالىق پارتيالىق شتاب مۇشەلەرى 6 مامىردان 3 ماۋسىمعا دەيىن ۇگىت-ناسيحات جۇمىستارى اياسىندا 12,7 مىڭ ءىس-شارا وتكىزدى. ولار شالعاي ەلدى مەكەندەردىڭ, اۋىلداردىڭ, قالالاردىڭ تۇرعىندارىمەن, جاستارمەن, مۇعالىمدەرمەن, كاسىپورىن قىزمەتكەرلەرىمەن كەزدەستى.
ەل تاريحىنداعى ايشىقتى وقيعاعا ازاماتتاردىڭ بەلسەندى قاتىسۋىن قامتاماسىز ەتۋ ماقساتىندا قۇرىلىپ, دايىندىق جۇمىستارىنا بەلسەنە اتسالىسقان تاعى ءبىر قوعامدىق باستاماداعى ۇيىم – «قازاقستان ءماسليحاتتارى دەپۋتاتتارىنىڭ بىرلەستىگى» رقب باستاماسىمەن قۇرىلعان رەفەرەندۋمدى قوعامدىق قولداۋدىڭ رەسپۋبليكالىق شتابى (رقش). كونستيتۋتسيالىق رەفورمالاردىڭ نەگىزگى ەرەجەلەرىن كەڭىنەن تۇسىندىرۋگە ارنالعان ءىس-شارالار شەڭبەرىندە دۇنيەگە كەلگەن شتابتىڭ جەتەكشىسى بوپ ءبىراۋىزدان رقب توراعاسى تولەۋبەك مۇقاشەۆ سايلاندى.
قۇرىلعان بەرگى ۋاقىتتان بەرى رقش تەك اقپاراتتىق-ءتۇسىندىرۋ عانا ەمەس, دوڭگەلەك ۇستەل, كەزدەسۋ, پىكىرتالاس, سەزد, كەڭەس سىندى فورماتتا دا ءتۇرلى جيىندار ۇيىمداستىردى. ماسەلەن, وسى ۋاقىت ارالىعىندا رەفەرەندۋمدى قولداۋ جونىندەگى قوعامدىق شتابتار رەسپۋبليكادا 1 ميلليون 917 مىڭنان استام ادامدى قامتي وتىرىپ, 15 300-دەن استام ءىس-شارا وتكىزگەن ەكەن.
جالپى, رەسپۋبليكالىق پارتيالىق شتاب مۇشەلەرى رەفەرەندۋمدى قولداۋ ماقساتىندا قاراعاندى, ماڭعىستاۋ, سولتۇستىك قازاقستان, تۇركىستان, باتىس قازاقستان, اقمولا جانە تاعى دا باسقا وبلىستاردا بولىپ, وڭىردەگى شالعاي ەلدى مەكەندەردىڭ, اۋىلداردىڭ, قالالاردىڭ تۇرعىندارىمەن, جاستارمەن, مۇعالىمدەرمەن, كاسىپورىن قىزمەتكەرلەرىمەن كەزدەستى. حالىقتىڭ بەلسەندى بولۋى اقپاراتتىق-ءتۇسىندىرۋ جۇمىستارىنىڭ كەڭ كولەمدە جۇرگىزىلگەندىگىمەن بايلانىستى ەكەنى ءسوزسىز. سوندىقتان دا پارتيا وفلاين فورماتپەن قاتار, كرەاتيۆتى ونلاين مۇمكىندىكتەردى دە كەڭىنەن پايدالانعان. ماسەلەن, «تالقىلاۋ» ديالوگ الاڭىندا Facebook الەۋمەتتىك جەلىسىنىڭ تىكەلەي ەفيرىندە دە قاتىسۋشىلار قاراسى كوپ بولدى. ال ءىnstagram پاراقشاسىندا «اشىق سۇحبات الاڭى» ايدارى اشىلىپ, ونلاين رەجىمدە كاسىبي مامان يەلەرىنىڭ اقىل-كەڭەستەرى بەرىلگەن. ودان بولەك تىك توك, WhatsApp, Youtube جانە تاعى دا باسقا قوسىمشالاردا دا ءتۇرلى كونتەنت بويىنشا حالىقپەن بايلانىس ورناتىلدى.
اسحات ورالوۆتىڭ مالىمدەۋىنشە, رەفەرەندۋم جاڭا مەملەكەتتىك باسقارۋ مودەلى – ەكىنشى رەسپۋبليكانىڭ رەسمي باستاماسى بولدى. «ەندى ءبىزدى كۇتىپ تۇرعان ءىس-شارالار از ەمەس. ول قانداي جۇمىستار؟ ەڭ الدىمەن, حالىق قولداعان كونستيتۋتسيالىق وزگەرىستەردى زاڭعا اينالدىرۋ كەرەك. بۇل جەردە پارلامەنت دەپۋتاتتارىنا ۇلكەن سەنىم مەن جاۋاپكەرشىلىك ارتىلادى. وعان ءبىزدىڭ پارتيامىزدىڭ دەپۋتاتتارى دا بەلسەنە قاتىسادى.
جالپى, رەفەرەندۋم ەلىمىزدە دەموكراتيالىق سانا مەن سالت-ءداستۇردىڭ كۇشەيگەنىن دالەلدەدى. سەبەبى ازاماتتارىمىز تۇبەگەيلى وزگەرىستەردى تالاپ ەتتى. مۇنى پارتيا ينستيتۋتى جۇرگىزگەن ساۋالداما دا دالەلدەدى. پرەزيدەنت ۇسىنعان رەفورمالار سول وزگەرىستەر سۇرانىسىنا ناقتى جاۋاپ بولدى», دەپ اتاپ ءوتتى پارتيا وكىلى.
سونداي-اق ا.ورالوۆ وسىنداي تاعدىرشەشتى كەزەڭدە Amanat پارتياسىنىڭ ۇلكەن مىندەتتى ابىرويمەن الىپ وتكەنىن ايتتى. ءسوزىنىڭ سوڭىندا ول جاڭا قازاقستاننىڭ كەسكىنى, قۇرىلىمى, باعىت-باعدارى انىقتالىپ جاتقانىن, ەندى جاڭا, ادىلەتتى قازاقستاندى بىرگە قۇرۋ – بارلىعىمىزعا ورتاق مىندەت ەكەنىنە باسىمدىق بەردى.
پارلامەنت ءماجىلىسى توراعاسىنىڭ ورىنباسارى پاۆەل كازانتسەۆتىڭ ايتۋىنشا, دەپۋتاتتىق كورپۋستىڭ الدىندا زاڭ شىعارۋشىلىق قىزمەت بويىنشا اۋقىمدى جۇمىس تۇر.
«12 مامىر مەن 3 ماۋسىم ارالىعىندا دەپۋتاتتار ەلىمىزدىڭ ايماقتارىنداعى 1 204 ەلدى مەكەنگە بارىپ, بارلىق سالا وكىلدەرىنەن تۇراتىن 120 مىڭعا جۋىق ادامنىڭ قاتىسۋىمەن 2,5 مىڭنان استام كەزدەسۋ وتكىزدى. كەزدەسۋلەر بەيرەسمي, سەنىمدى تۇردە, اشىقتىق پەن ايقىندىق جاعدايىندا ءوتتى. التى مىڭنان استام ءوتىنىش پەن ۇسىنىس قارالىپ, پارتيا مەن ۇكىمەت تاراپىنان پىسىقتالعاننان كەيىن ازاماتتارعا باياندالاتىن بولادى», دەدى پاۆەل كازانتسەۆ.
داۋىس بەرۋ كۇنى Amanat پارتياسىنىڭ 28 مىڭعا جۋىق وكىلى ەلىمىزدىڭ بارلىق رەفەرەندۋم ۋچاسكەلەرىندە داۋىس بەرۋ بارىسى زاڭدىلىعىنىڭ ساقتالۋىن قاداعالادى.
