استاناداعى اباي جانە ادولف يانۋشكەۆيچ كوشەلەرىنىڭ قيىلىسىندا «ەگاليتە» دەگەن تۇرعىن ءۇي كەشەنى ورنالاسقان. وكىنىشكە قاراي, ارقايسىسى 25 قاباتتان تۇراتىن ءۇي داۋ-دامايدان ارىلار ەمەس. بۇل جولى تۇرعىندار بالالار وينايتىن الاڭ مەن اۆتوتۇراقتىڭ جوقتىعىنا الاڭداۋشىلىق ءبىلدىرىپ وتىر.
تۇرعىن ءۇي كەشەنىندەگى م ۇلىك يەلەرى بىرلەستىگىنىڭ (ميب) باسشىسى بۇركىتباي قوڭىراتوۆتىڭ ايتۋىنشا, ءۇش ۇيگە ىرگەلەس ورنالاسقان جاتاقحانا بىلتىر سۇرىلگەن ەكەن. ونىڭ ورنىنا بالالار وينايتىن الاڭ مەن اۆتوتۇراق نەمەسە مەكتەپ سالىنادى دەپ ۋادە بەرىلگەن. بۇل حاباردى تۇرعىندار قۋانىشپەن قابىلدادى. الايدا جۋىردا كوپشىلىكتىڭ سول قۋانىشى سۋ سەپكەندەي باسىلدى. ويتكەنى بۇل جەرگە تاعى دا كوپقاباتتى تۇرعىن ءۇي سالىنباق ەكەن. بۇعان تۇرعىندار تۇبەگەيلى قارسى.
– 600 پاتەرلىك ء(ار ۇيدە 200 پاتەردەن) تۇرعىن ءۇي كەشەنىندە بالالارعا ارنالعان قۋىقتاي عانا الاڭقاي بار. ءار ۇيدە كەم دەگەندە 100-300 بالا تۇراتىنىن ەسكەرسەك, ويىن الاڭقايى ازدىق ەتەدى. ونىڭ ۇستىنە مۇندا جاس وتباسىلار تۇرادى. دەمەك الداعى ۋاقىتتا بالالار سانى تاعى دا كوبەيەدى. ارينە, بۇل جاقسى. بىراق سولارعا لايىقتى جاعداي دا جاساۋىمىز كەرەك. ءدال قازىرگى ۋاقىتتا تۇرعىن ءۇي كەشەنىنىڭ بالالارىنا ەشقانداي جاعداي جاسالماعان. جاقىن ماڭدا فۋتبول وينايتىن الاڭ بار. بىراق ەرەسەك بالالار كىشكەنتاي ۇل-قىزداردى بۇل جەرگە جولاتپايدى, – دەيدى ب.قوڭىراتوۆ.
رايحان ماكينا ەسىمدى تۇرعىن تاعى ءبىر ماسەلەنىڭ شەتىن شىعاردى. ونىڭ ايتۋىنشا, تۇرعىن ءۇي كەشەنىندە كولىك قوياتىن ورىن جەتىسپەيدى.
– قازىر ەكىنىڭ بىرىندە كولىك بار. تەحنيكانىڭ بولعانى جاقسى-اق. بىراق ءبىزدىڭ ءۇيدىڭ اۋلاسىندا كولىك قوياتىن ورىن جەتىسپەيدى. سوندىقتان تۇرعىندار بالالار وينايتىن شاعىن الاڭقايدىڭ اينالاسىنا كولىكتەرىن قالدىرىپ كەتەدى. اۋلامىز تار. كىشكەنتاي بۇلدىرشىندەردى اۋلاعا شىعارۋ قاۋىپتى. مىندەتتى تۇردە ەرەسەكتەردىڭ بىرەۋى باس-كوز بولىپ ءجۇرۋ كەرەك. سوندىقتان اۆتوتۇراق ماسەلەسىن دە شەشكەن دۇرىس, – دەيدى ر.ماكينا.
كۇنى كەشە تۇرعىندارعا بايقوڭىر اۋداندىق اكىمدىگىنەن ارنايى حابارلاما كەلىپتى. وندا بىلتىر سۇرىلگەن جاتاقحانانىڭ ورنىنا كوپشىلىك كۇتىپ جۇرگەندەي بالالار الاڭى مەن اۆتوتۇراق ەمەس, كوپقاباتتى تۇرعىن ءۇي سالىنادى ەكەن. قۇرىلىس جۇمىستارى الداعى قىركۇيەكتە باستالادى دەپ كۇتىلۋدە.
– ءبىز بۇعان مۇلدەم قارسىمىز. بۇل جەرگە اۋەلدە ۋادە ەتىلگەندەي بالالار الاڭى نەمەسە اۆتوتۇراق سالىنۋى كەرەك. ەگەر كوپقاباتتى تۇرعىن ءۇي سالىناتىن بولسا, ءدال قازىرگى ۋاقىتتا ءبىز بەتپە-بەت كەلىپ وتىرعان پروبلەما ودان ءارى ۋشىعا تۇسەدى. سوندىقتان تىم بولماسا بالالار وينايتىن الاڭ سالىپ بەرسە ەكەن, – دەيدى تۇرعىندار.
ر.ماكينانىڭ ايتۋىنشا, تۇرعىن ءۇي كەشەنىنىڭ اۋلاسى تار بولعاندىقتان, ۇيلەردىڭ اراسىمەن ءجۇرۋ دە قاۋىپتى. اسىرەسە قىستا قار شىعارعاندا قيىندىق تۋدىرادى.
– پرەزيدەنت قاسىم-جومارت توقاەۆ بيىلعى جىلدى بالالار جىلى دەپ جاريالادى. وسىعان وراي ءبىزدىڭ ءوتىنىشىمىز ەسكەرىلىپ, بالالار الاڭىنىڭ سالىناتىنىنا سەنىمدى بولعان ەدىك. الايدا ۋادە ءسوز كۇيىندە قالىپ وتىر. سوندىقتان ەل پرەزيدەنتىنەن, نۇر-سۇلتان قالاسىنىڭ اكىمىنەن كومەك سۇرايمىز. جوعارى جاقتاعىلار ءبىزدىڭ ۇنىمىزگە قۇلاق تۇرسە ەكەن. ونىڭ ۇستىنە مەملەكەت باسشىسىنىڭ ەندىگى جەردە كوپقاباتتى تۇرعىن ۇيلەردىڭ اينالاسىنا ساياباق, بالالار الاڭى, مەكتەپ سەكىلدى نىسانداردى كوپتەپ سالۋ كەرەك دەگەن تاپسىرماسى بار. وسىنى دا ەستەن شىعارماعان ابزال, – دەيدى رايحان ماكينا.
قىسقاسى, «ەگاليتە» تۇرعىن ءۇي كەشەنىنىڭ تۇرعىندارى ءوز تالاپتارىنىڭ تولىقتاي ورىندالعانىن قالايدى. بۇل ماسەلەگە جەرگىلىكتى اكىمدىك تە نازار اۋدارادى دەگەن ويدامىز.
بالجان نۇرعاليقىزى,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
نۇر-سۇلتان
