وسىلايشا, تالدىقورعانداعى وقۋشىلار سارايىندا «جاس ۇشقىش» مەكتەبى جۇمىسىن باستادى. بۇل قۋانىشتى جاڭالىق بالالاردى قورعاۋ كۇنى مەرەكەسىنە ورايلاستىرىلدى. ەندى بۇل قوسىمشا ءبىلىم بەرۋ ۇيىمىندا 160 بالا اۆياتسيا سالاسىنىڭ العاشقى الىپپەسى تۋرالى ءدارىس الاتىن بولادى. ال مەكتەپتىڭ اشىلۋ راسىمىنە وبلىس اكىمى قانات بوزىمباەۆ قاتىسىپ, وقۋشىلارىمەن كەزدەستى. وقۋشىلار سارايىنداعى ارنايى جاساقتالعان كابينەتتىڭ ماتەريالدىق بازاسىمەن تانىسقان قانات بوزىمباەۆ بالالاردى مەرەكەلەرىمەن قۇتتىقتاپ, تىلەگىن جەتكىزدى.
– كۇنى ەرتەڭ بىرەۋىڭ ۇشقىش, ءبىرىڭ ستيۋاردەسسا, ەندى ءبىرىڭ بورت مەحانيگى بولىپ, بولاشاق ومىرلەرىڭدى اۆياتسيامەن بايلانىستىرۋلارىڭ مۇمكىن. بۇل مەكتەپ سول ارمان-ماقساتتارىڭا جول كورسەتەدى. بولاشاقتا وبلىس اۋماعىندا اۆياتسيالىق كوللەدج اشىلادى, ەلىمىزدە ازاماتتىق اۆياتسيا اكادەمياسى, اسكەري ۋچيليششەلەر بار. وسى مەكتەپتەن قاناتتانىپ شىعىپ, بىلىمدەرىڭدى سول وقۋ ورىندارىندا جالعاستىرۋلارىڭا بولادى. وسى مەكتەپتە جاقسى وقىپ, دۇرىس ءبىلىم الىپ, تالدىقورعاننىڭ اتىن شىعارىپ, ۇلكەن دارەجەگە جەتەسىڭدەر دەپ سەنەمىن, – دەدى ق.بوزىمباەۆ.
ايتپاقشى, وسى شاعىن ءىس-شاراعا ازاماتتىق اۆياتسيا اكادەمياسىنىڭ پرورەكتورى الجاپار سارەتباەۆ تا ارنايى كەلگەن ەكەن. ول كىسى جەتكىنشەكتەرگە ايدىن ايىمبەتوۆتەي ازامات بولۋلارىنا تىلەكتەستىك ءبىلدىردى. جالپى, مۇنداي مەكتەپ بۇعان دەيىن تەك اقتوبە كلاسىندا عانا جۇمىس ىستەپ كەلگەن ەكەن. تالدىقورعانداعى بۇل ۇيىرمە – ەلىمىزدە اشىلىپ وتىرعان ەكىنشى مەكتەپ. ياعني بالالارعا كاسىبي باعىت-باعدار بەرۋدە بۇل ۇيىرمەنىڭ بەرەرى كوپ بولماق.
قوناقتارمەن اڭگىمەلەسۋ بارىسىندا بالالار ارماندارىن ايتىپ, وي ءبولىستى. ماسەلەن, مەكتەپكە العاشقىلاردىڭ ءبىرى بولىپ جازىلعان دينارا ديحانبەكوۆا «مەن كىشكەنتاي كەزىمنەن ستيۋاردەسسا بولعىم كەلەتىن. «جاس ۇشقىش» مەكتەبى اشىلعاندا قاتتى قۋاندىم. ۇشاقتا ادامداردى ك ۇلىپ شىعارىپ سالىپ, ك ۇلىپ قارسى العىم كەلەدى», – دەيدى. مۇنداعى بالالاردىڭ تاعى ءبىرى ەكولوگياعا زيانسىز جاڭا ۇشاق قۇراستىرۋدى ارمانداسا, ەندى ءبىرى ۇشاقتىڭ ءاربىر ۇساق تەتىكتەرىنىڭ ءبارىن مەڭگەرگىسى كەلەدى.
ال «جاس ۇشقىش» ۇيىرمەسىنىڭ جەتەكشىسى سەرگەي چەرنىشوۆ قازىردىڭ وزىندە مەكتەپكە 5-10 سىنىپ وقۋشىلارى اراسىنان 20 بالا جازىلىپ, 8 توپ قۇرىلعانىن ايتادى. جالپى, 160 بالا ءدارىس الماقشى. ولارعا ساباق-تاپسىرمالار جاس ەرەكشەلىك دەڭگەيىنە قاراي بەرىلەدى ەكەن.
الماتى وبلىسى
