كونفەرەنتسيانى قر ەكولوگيا, گەولوگيا جانە تابيعي رەسۋرستار مينيسترلىگى بۇۇ دامۋ باعدارلاماسىنىڭ قولداۋىمەن ۇيىمداستىردى.
ءىس-شاراعا قازاقستان رەسپۋبليكاسى ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ, ماڭعىستاۋ وبلىسىنىڭ اكىمى نۇرلان نوعاەۆ, بۇۇدب-نىڭ قازاقستانداعى تۇراقتى وكىلى ياكۋپ بەريش, ونەركاسىپ سەكتورىنىڭ وكىلدەرى, حالىقارالىق جانە ۇلتتىق ساراپشىلار قاتىستى.
قاتىسۋشىلار ەنەرگيا تيىمدىلىگىن ارتتىرۋ جانە قورشاعان ورتاعا جۇكتەمەنى ازايتۋ ءۇشىن وزىق تەحنولوگيالىق شەشىمدەرمەن, سونداي-اق «جاسىل» جوبالاردى ىسكە اسىرۋ اياسىندا كومىرتەگى مولشەرىن ازايتۋ بويىنشا قازىرگى مۇمكىندىكتەرمەن تانىستى.
سونداي-اق «NCOC», «تەڭىزشەۆرويل», «ERG», پاۆلودار مۇناي-حيميا زاۋىتى سياقتى ءىرى كاسىپورىندار ەكولوگيالىق كورسەتكىشتەردى جاقسارتۋ تاجىريبەسىن ءبولىستى.
شارادا ءسوز العان قر ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ قورشاعان ورتانى قورعاۋدا ەڭ وزىق قولجەتىمدى تەحنولوگيالاردى قولدانۋدىڭ ماڭىزدىلىعىنا توقتالدى.
«وتكەن جىلى ۋاقىت تالاپتارى مەن حالىقارالىق تاجىريبەنى ەسكەرە وتىرىپ ەكولوگيالىق كودەكس جاڭارتىلدى. نەگىزگى باعىتتاردىڭ ءبىرى - ەڭ وزىق قولجەتىمدى تەحنولوگيالاردى ەنگىزۋ, قورشاعان ورتا ساپاسىن نورمالاۋعا باعدار بەرۋ, ۇزدىك حالىقارالىق تاجىريبەلەر نەگىزىندە ەكولوگيالىق تالاپتاردى قاتاڭداتۋ. بۇگىنگى تاڭدا الەمدىك قوعامداستىق ەڭ وزىق قولجەتىمدى تەحنولوگيالاردى قولدانۋدى نەگىزگە الا وتىرىپ, قورشاعان ورتانىڭ لاستانۋىن بولعىزباۋ قاعيداتىن ۇستانادى», دەدى س. برەكەشەۆ.
ءوز كەزەگىندە ايماق باسشىسى نۇرلان نوعاەۆ تالقىلانعان ماسەلەلەردىڭ ءوڭىر ءۇشىن ماڭىزدى ەكەنىن اتاپ ءوتتى.
«بۇگىنگى كەزدەسۋ جاھاندىق ماسەلەلەردى تالقىلاۋعا مۇمكىندىك بەرىپ وتىر. ەكولوگيا ءبىر قالىپتا تۇرمايتىنى بەلگىلى. تابيعاتتى ءوز مۇمكىندىكتەرىمىزگە پايدالانعانىمىزبەن, ونىڭ تازالىعىن ساقتاۋ دا ءبىز ءۇشىن - ۇلكەن جاۋاپكەرشىلىك. قورشاعان ورتانى قورعاۋ - ءاربىرىمىزدىڭ باستى مىندەتىمىز. سوندىقتان وسى كونفەرەنتسيادان كىشكەنە دە بولسا وي ءتۇيىپ, تاجىريبە الماسساق, وسى وتىرعان جاۋاپتى تۇلعالاردىڭ ەڭبەگىنىڭ ەش كەتپەگەنى. بۇگىنگى ايتىلعان وزىق تاجىريبەلەر - ءوڭىرىمىزدىڭ ەكولوگياسىن ساقتاۋعا مول مۇمكىندىك بەرمەك», دەدى نۇرلان نوعاەۆ.
