استانا ماڭىنان سيرەك كەزدەسەتىن سابانشى شىقتى

استانا قالاسىنىڭ تۇرعىنى الىشەر قۇدايبەرگەنوۆ قالا ماڭىنان تابيعاتتا وتە سيرەك كەزدەسەتىن, «قىزىل كىتاپقا» ەنگىزىلگەن سابانشى ۇستاپ الدى. بۇل تۋرالى Zakon.kz حابارلادى. ەسكەرتە كەتەيىك, سابانشى دەپ جۇرت مانۋلدى, ياعني جابايى مىسىقتى اتايدى. استانانىڭ شەتىندە تۇراتىن الىشەر قۇدايبەرگەنوۆ ءوز ۇيىنە جاقىن ورنالاسقان ەكپەلى اعاشتاردى ءجيى ارالاپ تۇرادى ەكەن. ول ورمانعا سوڭعى بارعانىندا جىرتقىشتار توبىنا جاتاتىن مىسىق تۇقىمداس ءىرى, سالماعى 6 كيلوگرامداي سابانشىعا تاپ كەلەدى. الىشەردىڭ سوڭىنان ەرگەن ءيتتى كورگەندە الگى مىسىق قاشا جونەلمەي, ايبات شەگىپ, قارسى شابۋىلدايتىنداي سىڭاي بىلدىرگەن. سول كەزدە جىگىت ساسپاي, ءجىتى قيمىلداپ, ەبىن تابا قولىنداعى قابىمەن الگى جابايى مىسىقتى تىرپ ەتكىزبەي ۇستاپ الادى. الىشەردىڭ «ولجاسىن» بۇكىل كورشىلەرى كورىپ, قىزىقتاپ, ونى ەتپەن قورەكتەندىرىپتى. – مەن بۇل سابانشىنى ۇيىمدە اسىراعىم كەلگەن, بىراق ونىڭ «قىزىل كىتاپقا» ەنگەن جىرتقىش ەكەنىن بىلگەندىكتەن, جۇرگەن جەرىنە قايتادان اپارىپ تاستادىم. ونى بوساتىپ جىبەرگەنىمدە, مەنىڭ جانىمنان ۇزاۋعا اسىعا قويمادى, – دەيدى ءا.قۇدايبەرگەنوۆ. سابانشى – وتە سيرەك كەزدەسەتىن جىرتقىش. ونىڭ جەر بەتىندە قانشاسى قالعانى ازىرگە بەلگىسىز. شەتەلدىك كوپتەگەن عالىمدار بىرنەشە رەت وسى جابايى مىسىقتى تابۋ  ماقساتىندا قازاقستان اۋماعىندا ارنايى ەكسپەديتسيا ۇيىمداستىرعان. بىراق ونى كەزدەستىرە الماپتى. دەگەنمەن, كەيىنگى جىلداردا قازاقستان اۋماعىندا دالا تىشقاندارى كوبەيە تۇسكەندىكتەن, سابانشىلاردىڭ دا سانى ارتا باستاپتى. ويتكەنى, مانۋلدىڭ نەگىزگى قورەگى – تىشقاندار. جولدىباي بازار. دەرەككوز: Zakon.kz. فوتو: Bigmir.net.