ساراپتامالىق باعالاۋ ناتيجەسىندە 17 تازى «ۇزدىك», 4 تازى «وتە جاقسى» دەگەن باعا الدى. قورىتىندى بويىنشا 21 تازىعا تۇقىمدىق تەگى تۋرالى كۋالىك بەرىلەدى.
بايقاۋ بارىسىندا ساراپشىلار يتتەردىڭ رەسمي ستاندارتقا سايكەستىگىن باعالاپ, ولاردىڭ تۇقىمدىلىعىن راستاۋ جانە ەسەپكە قويۋعا قاجەتتى قۇجاتتاردى راسىمدەدى. يت يەلەرى ماماندارعا تۇقىم ەرەكشەلىكتەرى, ءوسىرۋ جانە قۇجاتتاندىرۋ ءتارتىبى بويىنشا سۇراقتارىن قويدى.
قاتىسۋشىلار بالالارىمەن جانە جاقىندارىمەن كەلدى. بالالار ساراپشىلاردىڭ جۇمىسىن باقىلاپ, تازىنى تەكسەرۋ پروتسەسىنە قىزىعۋشىلىق تانىتتى.
«مەركىدە وتكەن تۇقىمدىق بايقاۋ قازاقى تازىعا دەگەن قىزىعۋشىلىقتىڭ تەك وسىرۋشىلەر اراسىندا عانا ەمەس, قاراپايىم يت يەلەرى, وتباسىلار مەن جاستار اراسىندا دا ارتىپ كەلە جاتقانىن تاعى ءبىر رەت كورسەتتى. ءبىز ءۇشىن ادامداردىڭ بالالارىمەن بىرگە كەلۋى, سۇراق قويۋى, تۇقىم ستاندارتىن تۇسىنۋگە جانە يتتەرىن دۇرىس راسىمدەۋگە ۇمتىلۋى وتە ماڭىزدى», دەدى قازاقستان كينولوگتار وداعىنىڭ پرەزيدەنتى باۋىرجان سەرىكقالي.
ۇيىمداستىرۋشىلاردىڭ ايتۋىنشا, مۇنداي ءىس-شارالار جاس ۇرپاقتىڭ قازاقى تازى تۇقىمىنا دەگەن قىزىعۋشىلىعىن ارتتىرىپ, بولاشاقتا جاڭا كينولوگتار مەن وسىرۋشىلەردىڭ قالىپتاسۋىنا ىقپال ەتەدى.
ەسكە سالا كەتەيىك, ەلىمىزدە جەتى قازىنانىڭ ءبىرى سانالعان تىرشىلىك يەسىنە ارنايى مەرەكە ەنگىزىلگەن.
تازى تۇقىمىن تانىتۋعا سەپتىگىن تيگىزگەنى ءۇشىن جۋىردا مەملەكەت باسشىسى حالىقارالىق كينولوگيا فەدەراتسياسىنىڭ پرەزيدەنتى تاماش ياككەلگە العىس ايتقان بولاتىن.
