ماگومەد اديەۆ باپتايتىن جىگىتتەر بۇگىن ەلوردادا ازەربايجان قۇراماسىمەن جولىعادى. ودان كەيىن سلوۆاكيا جانە بەلارۋسپەن كەزدەسۋ كۇتىپ تۇر.
وسىعان بايلانىستى ويىنشىلاردىڭ الەۋەتىن جان-جاقتى ساراپتاپ, ءار ماتچتا ءتاۋىر ناتيجە كورسەتەردەن جوسپار قۇرۋ كەرەك دەيدى باس باپكەر. ايتۋلى ماتچتار الدىندا قۇراماعا 27 ويىنشى شاقىرتىلىپ, قازىر سوڭعى دايىندىقتى پىسىقتاپ جاتىر. وكىنشكە قاراي, ولاردىڭ اراسىندا باحتيەر زاينۋتدينوۆ, ايبار جاقسىلىقوۆ, مارات بىستروۆ سياقتى نەگىزگى فۋتبولشىلار جوق. سوعان قاراماستان, جەڭىستى قولدان بەرمەۋگە تىرىسامىز دەيدى رەسەيلىك مامان. اسىرەسە, ءوز الاڭىمىزدا وتەتىن ماتچتاردا ۇپاي الىپ قالۋدى كوزدەيدى.
«كومانداداعى جىگىتتەردىڭ بابى جاقسى. مەن ولارعا سەنەمىن. ارينە, زاينۋتدينوۆ سياقتى فۋتبولشىلاردىڭ بولعانى جاقسى ەدى. بىراق قالعان ويىنشىلار دا وسال ەمەس. ولار الداعى ماتچتاردا وزدەرىن جاقسى كورسەتىپ, قازاقستاندىق جانكۇيەرلەردى قۋانتادى دەپ ويلايمىن. ءار كەزدەسۋگە قاتىستى ارنايى جوسپار بار. كوبىنە قورعانىسقا دەن قويىپ, 90 مينۋت بويى تۇراقتى ويىن كورسەتۋگە تىرىسامىز», دەدى فۋتبولدان قازاقستان قۇراماسىنىڭ باس باپكەرى ماگومەد اديەۆ.
ايانا توعانبەك
