قازاقستان تاۋەلسىزدىگىن الەم جۇرتشىلىعىنا جاريالاعاننان كەيىن ونىڭ قالىپتاسۋى مەن دامۋى باس اياعى وتىز جىلدىڭ ىشىندە تارام-تارام جولداردان, الىنبايتىنداي كورىنگەن اسۋلاردان ءوتتى. بۇل مەملەكەتتىلىكتىڭ تاعى دا ءبىر جاڭعىرعان قادامى ەدى.
الەمدىك گەرالديكا تاجىريبەسىندەگى حالىق ءۇشىن ەڭ قاستەرلىسى – مەملەكەتتىك گەرالديكا. تاۋەلسىزدىك تاريحىنىڭ جارقىن بەتتەرىنىڭ ءبىرى, قازاقستاننىڭ ەلتاڭباسىن, تۋىن ەرەجەلەرگە ساي قۇراستىرۋ, سيپاتتاۋ, گيمنىن بەكىتۋ جانە حالىققا ۇسىنۋ سالتاناتى بولاتىن.
تاۋەلسىز قازاقستاننىڭ تاريحىندا ەلىمىزدىڭ مەملەكەتتىك گيمنى ەكى رەت – 1992 جانە 2006 جىلدارى بەكىتىلدى. مەملەكەتتىك گيمنگە جۇمەكەن ناجىمەدەنوۆتىڭ سوزىنە جازىلعان ءشامشى قالداياقوۆتىڭ «مەنىڭ قازاقستانىم» ءانى تاڭدالدى. قازاقستان پارلامەنتى 2006 جىلى 6 قاڭتاردا پالاتالاردىڭ بىرلەسكەن وتىرىسىندا «مەملەكەتتىك رامىزدەر تۋرالى» جارلىققا ءتيىستى تۇزەتۋ ەنگىزىپ, ەلىمىزدىڭ جاڭا مەملەكەتتىك گيمنىن بەكىتتى. تاريحي كەزەڭدە گيمننىڭ ماتىنىنە تۇڭعىش پرەزيدەنت نۇرسۇلتان نازارباەۆ تۇزەتۋلەر ۇسىنىپ, بەكىتىلگەن بولاتىن.
راسىندا, تاۋەلسىزدىك بىزگە مول مۇمكىندىكتەردى اشقانى تالاس تۋدىرمايتىنى اقيقات. بۇگىندە 4 ماۋسىم مەملەكەتتىك رامىزدەرىمىزدى ۇلىقتايتىن كۇن رەتىندە بەكىدى. ەگەمەندىكتىڭ ىرگەتاسىنىڭ بەرىكتىگىنىڭ بەلگىسى – تاۋەلسىز قازاقستاننىڭ مەملەكەتتىك رامىزدەرى دۇنيەگە كەلدى. مەملەكەتتىك تۋ, مەملەكەتتىك ەلتاڭبا, مەملەكەتتىك گيمن ەلدىكتىڭ بويتۇمارىنا اينالدى.
بەلگىلى سۋرەتشى شاكەن نيازبەكوۆ ۇسىنعان كوك تۋ بايقاۋدا جەڭىپ شىعىپ, بۇگىنگى كۇنى كوكتە جەلبىرەپ, ماقتانىشىمىزعا اينالدى. وتباسى مەن شاڭىراقتىڭ بەرەكەسىن, حالىقتىڭ دارقان كوڭىلى مەن بەيبىتسۇيگىشتىك رۋحىن, ەرىك-جىگەرىن اسقاقتاتقان, تانىمال ساۋلەتشىلەر جانداربەك مالىبەكوۆ پەن شوت-امان ءۋاليحانوۆتىڭ ۇسىنعان قازاقستاننىڭ باستى سيمۆولى – مەملەكەتتىك ەلتاڭبا ەلدىگىمىزدىڭ كورىنىسى.
زاماناۋي جاعدايداعى ەكونوميكا قوعام بەلسەندىلىگىن كوتەرۋ جانە حالىقتىڭ ءومىر ءسۇرۋ ساپاسىن ارتتىرۋعا نەگىزدەلگەنى ءاۋ باستان ايان. ءوسىپ-جەتىلگەن جاستاردىڭ جاڭا بۋىنىنا ارتىلار ءۇمىتتىڭ مول ەكەندىگى دە راس. ينتەللەكتۋالدى ۇلت بولمىسىن قالىپتاستىرۋ ماقساتىندا بۇكىل رەسۋرستاردى جۇمىلدىرۋ كوزدەلىپ جاتقانى دا بارشاعا ءمالىم. قازىرگى جاھاندىق وزگەرىستەر داۋىرىندە حالىقارالىق قاتىناستاردىڭ بەيبەرەكەت جۇيەسى اياسىندا ءوزارا قارىم-قاتىناستارعا دەگەن سەنىمنىڭ توقىراۋعا ۇشىراۋى وتە وكىنىشتى. الەمدىك قۇلدىراۋ مەن داعدارىس جاعدايىندا قازاقستان – حالىقتىڭ اماناتىنا قيانات جاساۋعا بولمايتىندىعىن مەملەكەتتىك دەڭگەيدە اشىق مالىمدەگەن بىرەگەي مەملەكەت ەكەنىن قاي كەزدە دە ماقتانىشپەن ايتا الامىز. قازاقستاندىق كەمەلدەنۋ – تۇرعىندار ءال-اۋقاتىن ارتتىرۋ, الەۋمەتتىك ستراتەگيانىڭ ىسكە اسۋى. جاڭا الەمدەگى جاڭا قازاقستاننىڭ باستى باعىتى – جاسامپازدىقپەن اسىل مۇراتتارعا جەتۋ. سول جولدا كوك تۋىمىز بيىكتەردە جەلبىرەي بەرسىن! رامىزدەر كۇنى قۇتتى بولسىن!
قۇندىزاي ەرىمبەتوۆا,
مەملەكەت تاريحى ينستيتۋتىنىڭ جەتەكشى عىلىمي قىزمەتكەرى,
تاريح عىلىمدارىنىڭ كانديداتى
