30 مامىر كۇنى ايەل ادامعا بانك قىزمەتكەرى رەتىندە ەر ادام قوڭىراۋ شالعان. الاياق مۇنداي وپەراتسيا بانك جۇيەسىندە قالىپتى ەكەنىن ايتىپ, شوتتى قاۋىپسىزدەندىرۋ ءۇشىن تەلەفونعا كەلگەن SMS-حابارلاماداعى كودتى ايتۋىن سۇرايدى. كودتى العاننان كەيىن الاياق بۇكىل اقشانى جابىرلەنۋشىنىڭ كارتاسىنان باسقا بانكتىك شوتقا اۋدارىپ العان. جالپى شىعىن 22 ملن تەڭگەدەن استى.
قازىرگى تاڭدا اتالعان فاكتى بويىنشا قر قك-ءنىڭ 190-بابى 3-بولىمىمەن (الاياقتىق) سوتقا دەيىنگى تەرگەۋ باستالدى. پوليتسەيلەر كۇدىكتىنىڭ جەكە باسىن انىقتاۋ ماقساتىندا ءىس-شارالار جۇرگىزىپ جاتىر.
اقتوبە وبلىسى پوليتسيا دەپارتامەنتى الاياقتىق جاعدايلارىنىڭ الدىن الۋ ءۇشىن ەشكىمگە, ءتىپتى بانك قىزمەتكەرىنە دە جەكە شوتتارى مەن كارتالارىنا قاتىستى SMS-كود جانە باسقا دا دەربەس اقپاراتتى ايتۋعا بولمايتىنىن ەسكەرتەدى.
ايانا توعانبەك
