ارال-سىرداريا باسسەينى بالىق شارۋاشىلىعىنا حالىقارالىق ماڭىزى بار شاردارا سۋ قويماسى مەن سىرداريا وزەنى, كوكساراي سۋ رەتتەگىشى جانە كىشى ارال تەڭىزى اۋماعىن قامتيدى. قىزىلوردا وبلىسىندا كىشى ارال تەڭىزى مەن 207 سۋ ايدىنىنىڭ 89 پايىزى, ال تۇركىستان وبلىسى بويىنشا شاردارا سۋ قويماسى مەن سىرداريا وزەنى جانە 127 سۋ ايدىنىنىڭ 71 پايىزى پايدالانۋشىلارعا بەكىتىلىپ, بالىق شارۋاشىلىعىمەن اينالىسۋدا. وتكەن جىلى قىزىلوردا وبلىسىندا 184,0 توننا, ال تۇركىستان وبلىسىندا 5 707 تونناعا جۋىق تاۋارلى بالىق وسىرىلگەن. سوندىقتان بولار تۇركىستان وبلىسى جاساندى بالىق وسىرۋگە الەۋەتى جوعارى ايماق بولىپ سانالادى. ينسپەكتسيا باسشىسى ورىنباسارىنىڭ سوزىنە قاراعاندا, بيىل ونىڭ كولەمىن 6 مىڭ توننادان اسىرۋ جوسپارلانعان.
مەملەكەت تاراپىنان سۋبسيديالاۋ 30 پايىز جانە 50 پايىزعا ارتىپ, بالىق شارۋاشىلىعىنىڭ دامۋىنا وڭدى ىقپالىن تيگىزۋدە. الداعى ۋاقىتتا ەلىمىزدە بالىق شارۋاشىلىعىمەن اينالىسۋعا نيەتتى كاسىپكەرلەر سانى ارتاتىنى ءسوزسىز.
«2021 جىلدان باستاپ سۋبسيديالاۋ باعدارلاماسىندا بالىق جەمىن ساتىپ الۋدىڭ 30 پايىزىنان بولەك, بيولوگيالىق نەگىزدەمەنى ازىرلەۋ, بالىق ءوسىرۋ ماتەريالىن ساتىپ الۋ, دارىلىك پرەپاراتتاردى ساتىپ الۋ, انالىق-تولىقتىرۋ ءۇيىرىن ساتىپ الۋدىڭ 50 پايىزى قاراستىرىلعان. بۇدان بولەك بالىق ءوسىرۋشى سۋبەكتىسىنىڭ ينۆەستيتسيالىق سالىمدارىنىڭ 25 پايىزى سۋبسيديالانادى», دەدى جانقوجا رامبەردى ۇلى.
ارال-سىرداريا باسسەينى بويىنشا 2021 جىلى 90 جوبانى ىسكە اسىرۋ كوزدەلگەن. بىلتىر 2 شارباقتىق, 6 توعان شارۋاشىلىعى جانە 1 تۇيىق سۋمەن قامتاماسىز ەتىلگەن جۇيە ىسكە قوسىلعان. تاۋارلى بالىق ءوسىرۋ شارۋاشىلىقتارىنىڭ سانى 101-گە, توعان شارۋاشىلىعىنىڭ سانى 47-گە, شارباقتىق 5-كە, تۇيىق سۋمەن قامتاماسىز ەتىلگەن بالىق شارۋاشىلىعى 3-كە جەتكەن. بيىل 6 توعان شارۋاشىلىعى جۇمىسىن باستاعان. توعانداردا تۇقى, ءدوڭماڭداي, اق امۋر جانە افريكالىق جايىن شاباقتارى وسىرىلۋدە. ينسپەكتسيا باسشىسى ورىنباسارىنىڭ ايتۋىنشا, ەكىنشى جارتىجىلدىقتا شارباقتىق شارۋاشىلىق پەن تۇيىق جۇيەلى سۋمەن قامتاماسىز ەتىلگەن قۇرىلعىنىڭ جوباسى ىسكە اسىرىلادى.
تۇركىستان وبلىسى جاساندى بالىق ءوسىرۋ بويىنشا ەلىمىزدە كوش باستاپ تۇرسا, قىزىلوردا وبلىسىنداعى تابيعي سۋ ايدىندارىندا وسىرىلگەن بالىق ونىمدەرىنە دەگەن سۇرانىس كۇن سايىن ارتىپ كەلەدى.
