سودان كەيىن قاسىم-جومارت توقاەۆقا ۋنيۆەرسيتەتتىڭ عىلىمي جەتىستىكتەرى مەن يننوۆاتسيالىق ازىرلەمەلەرىنىڭ كورمەسى كورسەتىلدى. عالىمدار مەن ستۋدەنتتەر مەملەكەت باسشىسىنا نەيروعىلىم, دەنساۋلىق ساقتاۋ, تۋريزم, اگروحيميا, قۇرىلىس تەحنولوگياسى, جاساندى ينتەللەكت جانە بيوتەحنولوگيا سالالارىنداعى وزدەرىنىڭ عىلىمي-يننوۆاتسيالىق جوبالارىنىڭ مۇمكىندىكتەرى تۋرالى ايتتى.
سونىمەن قاتار پرەزيدەنتكە ۋنيۆەرسيتەتتىڭ ينفراقۇرىلىمىن كەڭەيتۋ جوسپارى جونىندە مالىمەت بەرىلدى. قاسىم-جومارت توقاەۆقا جوسپارلانعان قۇرىلىس نىساندارىنىڭ جوباسى جانە جاڭعىرتىلعان وقۋ كورپۋستارى, جاتاقحانالار مەن قىزمەتتىك تۇرعىن ءۇي تانىستىرىلدى.
ۋنيۆەرسيتەتتى ارالاپ كورۋ بارىسىندا مەملەكەت باسشىسىنا رەسەيلىك «ميفي» ۇلتتىق يادرولىق زەرتتەۋ ۋنيۆەرسيتەتىنىڭ پرەزەنتاتسياسى كورسەتىلدى. «ميفي» رەكتورى ۆلاديمير شەۆچەنكو پرەزيدەنتكە جوعارى وقۋ ورنىنىڭ عىلىمي جۇمىستارى مەن ءبىلىم بەرۋ ءىسىن تانىستىردى. جۋىردا ءال-فارابي اتىنداعى قازاق ۇلتتىق ۋنيۆەرسيتەتىنىڭ بازاسىندا يادرولىق ەنەرگەتيكا, فارماتسەۆتيكا, مەديتسينا جانە ەكونوميكا سالاسى بويىنشا ماماندار دايارلايتىن «ميفي» فيليالىن اشۋ جونىندەگى كەلىسىمگە قول قويىلدى.
ءىس-شارا سوڭىندا قاسىم-جومارت توقاەۆ جاس وقىتۋشىلارمەن, عالىمدارمەن جانە ستۋدەنتتەرمەن, سونىڭ ىشىندە شەتەلدىكتەرمەن اڭگىمەلەستى.
ستۋدەنتتەر جاستارعا ەرەكشە كوڭىل بولەتىنى ءۇشىن مەملەكەت باسشىسىنا العىس ايتىپ, ەلىمىزدەگى اۋقىمدى رەفورمالاردى قولدايتىنىن جەتكىزدى.
ايانا توعانبەك
