بيىلعى دۇنيەجۇزىلىك گيمنازيادادا وقۋشىلارىمىز فرانتسيانىڭ نورمانديا قالاسىندا الەمنىڭ 70-تەن اسا ەلىنەن كەلگەن جاسوسپىرىمدەرمەن باسەكەلەستى. قازاقستان قۇراماسىندا 234 سپورتشى ونەر كورسەتتى. ولار باسكەتبول, بوكس, ەركىن كۇرەس, ايەلدەر كۇرەسى, گرەك-ريم كۇرەسى, دزيۋدو, جەڭىل اتلەتيكا, ۇستەل تەننيسى, ءجۇزۋ جانە باسقا دا سپورتتىڭ 18 تۇرىنەن سىنعا ءتۇستى.
الەمدىك ارەنادا توپ جارعاندارعا ءبىلىم جانە عىلىم ءمينيسترى اسحات ايماعامبەتوۆ باعالى سىيلىقتار بەرىپ, 50 جەڭىمپازعا ءبىلىم گرانتى تاعايىندالاتىنىن ايتتى.
«مەن بارشاڭىزدى تاريحي جەڭىستەرىڭىزبەن قۇتتىقتايمىن! سونداي-اق وقۋشىلارىمىزدىڭ جاتتىقتىرۋشىلارى مەن اتا-انالارىنا الەمدىك ارەنادا وسىنداي جوعارى جەتىستىكتەرگە جەتۋدە قولداۋ كورسەتكەنى ءۇشىن العىس ايتقىم كەلەدى. پرەزيدەنت قاسىم-جومارت توقاەۆتىڭ قازاقستان حالقىنا جولداۋىندا بەرگەن تاپسىرماسى بويىنشا زاڭناماعا وزگەرىستەر ەنگىزىلدى. بۇدان بىلاي بەدەلدى حالىقارالىق پاندىك وليمپيادالاردىڭ, سپورتتىق جارىستاردىڭ جانە الەمدىك دەڭگەيدەگى شىعارماشىلىق بايقاۋلاردىڭ جەڭىمپازدارى مەن جۇلدەگەرلەرى ۇبت تاپسىرماي-اق جوو-عا بەيىندى باعىتتار بويىنشا گرانتقا تۇسۋگە مۇمكىندىك الدى. كۇنى كەشە بۇيرىققا قول قويىلدى جانە ەندى گيمنازيادانىڭ 50 جەڭىمپازى, ياعني مەكتەپتى بيىل ءبىتىرىپ وتىرعان تۇلەكتەر ءوز ماماندىعى بويىنشا جوعارى وقۋ ورىندارىندا ءبىلىم الۋ ءۇشىن گرانتقا يە بولادى», دەدى سالتاناتتى جيىندا ءسوز العان ۆەدومستۆو باسشىسى.
مينيسترلىك جەڭىمپازدار مەن جۇلدەگەرلەردى ءبىلىم گرانتتارىنان بولەك ۇيالى تەلەفوندار, سمارت-ساعاتتار, نوۋتبۋكتەر, پاۋەر-بانكتەر سەكىلدى باعالى سىيلىقتارمەن, ال ۇزدىكتەردىڭ ۇستازدارى مەن جاتتىقتىرۋشىلارىن العىسحاتتارمەن ماراپاتتادى.
