حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا وتكەن «دالا – كەۋدە» اتتى شىعارماشىلىق كەشتە جاس اقىننىڭ «شىدەرلى شەر» اتتى جاڭا كىتابىنىڭ تۇساۋى كەسىلدى. اقىن بۇعان دەيىن ء«وزىمنىڭ اسپانىمنىڭ استىندامىن» جانە «تاڭىرگە حات» اتتى جىر جيناقتارىن وقىرمان قاۋىمعا ۇسىنعان بولاتىن.
وسى كەشتە باتىس قازاقستان وبلىستىق حالىق شىعارماشىلىعى ورتالىعى جاريالاعان «شىدەرلى شەر» اتتى جاس اقىندار ءمۇشايراسىنىڭ دا قورىتىندى ناتيجەسى شىقتى. جىر بايگەسىنە 12 اقىن قاتىستى. قازتالوۆ اۋدانىنان ولەڭ قوسقان جاس اقىن ابزال ەسەنعازى باس جۇلدەگە يە بولسا, تەرەكتىلىك قوس اقىن: ادىلەت ورىنباسار ۇلى – ءبىرىنشى جۇلدەنى, اقتىلەك الىبەك ۇلى – ەكىنشى ورىندى جەڭىپ الدى. تايپاقتان شىققان تاعى ءبىر جاس اقىن ابىلايحان ماقسۇتوۆ ءۇشىنشى ورىن جۇلدەسىن يەلەندى. جەڭىمپازداردىڭ بارلىعىنا اقشالاي سىيلىق بەرىلدى.
ادەبي كەشتە ساحناعا شىعىپ ءسوز سويلەگەن باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ وبلىس باسشىسىنىڭ العىس حاتىن ۇسىنىپ, اقىننىڭ ولەڭىن وقىپ بەردى.
اق جايىقتاعى ادەبيەت تويىنا سەمەي قالاسىنان ارنايى كەلگەن اقىن تىنىشتىقبەك ابدىكاكىم ۇلى مەن اقىننىڭ جارى, سەمەي جوعارى پەداگوگيكالىق كوللەدجىنىڭ ديرەكتورى, فيلولوگيا عىلىمدارىنىڭ كانديداتى شاعانگۇل جاناەۆا باتىسقازاقستاندىقتاردىڭ ءسوز ونەرىنە ىقىلاسىن, جەرگىلىكتى باسشىلاردىڭ قالامگەرلەرگە قولداۋىن ەرەكشە ايتىپ ءوتتى. جازۋشى قۋاندىق تۇمەنباي دا كەش يەسىنىڭ شىعارماشىلىعىنا جىلى پىكىر ءبىلدىرىپ, التىن قالام تارتۋ ەتتى.
عاريفوللا قۇرمانعاليەۆ اتىنداعى وبلىستىق فيلارمونيا زالىندا اقىن تىنىشتىقبەك ابدىكاكىم ۇلى مەن عالىم شاعانگۇل جاناەۆا جاھانشا دوسمۇحامەد ۇلى اتىنداعى جوعارى پەداگوگيكالىق كوللەدج ۇجىمىمەن, ستۋدەنتتەرىمەن ەرەكشە جىلى كەزدەسۋ وتكىزدى. جيىن بارىسىندا سەمەيدەگى پەدكوللەدج بەن ورالداعى پەدكوللەدج اراسىندا ارىپتەستىك مەموراندۋمعا قول قويىلدى. بۇل كەلىسىم بويىنشا ورال جانە سەمەي قالاسى اراسىندا ستۋدەنت الماسۋ, وقىتۋشىلار الماسۋ, ارىپتەستىك قارىم-قاتىناس جولعا قويىلماق.
باتىس قازاقستان
