شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, وڭىردە الداعى اپتادا اۋا تەمپەراتۋراسىنىڭ كۇرت ىسۋىنا بايلانىستى وزەن-كول جاعالاۋلارىندا دەمالۋشىلار كوبەيەدى. ونىڭ ىشىندە سۋعا تۇسۋگە رۇقسات ەتىلمەگەن ورىندارعا باراتىندار از ەمەس.
سونىڭ سالدارىنان جازاتايىم وقيعالار بولىپ جاتادى. وتكەن شومىلۋ ماۋسىمىندا سۋ ايدىندارىنا 35 ادام باتىپ كەتتى. 2022 جىلدىڭ باسىنان باستاپ 3 ادام سۋعا كەتكەن.
«قازىرگى ۋاقىتتا وبلىستىق ءماسليحاتتىڭ شەشىمىنە سايكەس, 116 جاعاجايدا شومىلۋعا تىيىم سالىنعان. سول جەرلەرگە 157 تىيىم سالۋ بەلگىسى ورناتىلدى. بۇل ۋچاسكەلەردە سۋدىڭ اعىنى قاتتى, ءتۇبى تەكسەرىلمەگەن جانە جاقىن جەردە قۇتقارۋشىلار مەن دارىگەرلەر بەكەتتەرى جوق», دەلىنگەن اقپاراتتا.
سونىمەن قاتار قۇتقارۋشىلار جازاتايىم وقيعالاردىڭ الدىن الۋ ءۇشىن پوليتسيا قىزمەتكەرلەرى جانە ەرىكتىلەرمەن بىرىگىپ, پاترۋلدەۋگە شىعادى. وتكەن اپتادا 170-تەن استام پروفيلاكتيكالىق رەيد جۇرگىزىلگەن.
