پارلامەنت سەناتىندا ارمەنيا رەسپۋبليكاسىنا مۇناي ونىمدەرىن جەتكىزۋ جونىندەگى ساۋدا-ەكونوميكالىق ىنتىماقتاستىق كەلىسىمى راتيفيكاتسيالاندى.
«بۇل كەلىسىمدە ىشكى نارىقتى قورعاۋ ماقساتىندا ۋاكىلەتتى ورگاننىڭ ارمەنياعا تاۋار اكەتۋگە ۋاقىتشا شەكتەۋ بەلگىلەۋگە قۇقىعى بار ەكەنى رەگلامەنتتەلگەن. تاۋار تاسىمالداۋ اۆتوموبيل, تەمىر جول جانە تەڭىز كولىگىمەن جۇزەگە اسىرىلادى. كەلىسىمنىڭ تاعى ءبىر ەرەكشەلىگى – ارمەنيانىڭ ساتىپ الىنعان مۇناي ونىمدەرىن ءۇشىنشى ەلدەرگە ساتۋ فاكتىلەرى انىقتالعان جاعدايدا قازاقستانعا وتەماقى تولەۋگە ءتيىس», دەدى سەنات دەپۋتاتى باۋىرجان قانيەۆ.
سەناتوردىڭ ايتۋىنشا, كەلىسىم قازاقستاننىڭ ارمەنياعا اي-92, 95, 98 ماركالى بەنزينىن جانە ديزەل وتىنى سياقتى تاۋارلاردى جەتكىزۋ بويىنشا جۇزەگە اسىرۋ قاجەت شارتتاردى ايقىندايدى. ساۋدا-ەكونوميكالىق جانە ءوزارا ءتيىمدى ىنتىماقتاستىق ەكى تاراپتىڭ ءوزارا مۇددەلەرىن قورعاۋعا نەگىزدەلەدى. كەلىسىمدە اتالعان تاۋارلاردى ءوندىرۋ كولەمى, ىشكى تۇتىنۋ تەڭگەرىمى, يمپورت پەن ەكسپورت نەگىزىندە ارمەنياعا تاسىمالداۋ جونىندەگى قۇزىرەتتى ۋاكىلەتتى ورگاندار مەن ۇيىمدار ايقىندالعان.
قر ەنەرگەتيكا ۆيتسە-ءمينيسترى اسەت ماعاۋوۆتىڭ ايتۋىنشا, بۇل كەلىسىم باقىلاۋدىڭ بىرقاتار تەتىكتەرىن قاراستىرادى.
«قازاقستان ۇلتتىق قاۋىپسىزدىكتى قامتاماسىز ەتۋ جانە ىشكى نارىقتى قورعاۋ ماقساتىندا ينديكاتيۆتى بالانستا بەكىتىلگەن كولەم اسىپ كەتكەن جاعدايدا, فورس-ماجور جاعدايلارىندا, سونداي-اق ارمەنيا ءوز اۋماعىنان قازاقستاندىق مۇناي ونىمدەرىن ءۇشىنشى ەلدەرگە جانە ەۋرازيا ەكونوميكالىق وداق ەلدەرىنە اكەتۋ تىيىمى بويىنشا مىندەتتەمەسىن بۇزعان بولسا, قازاقستان بىرجاقتى تارتىپپەن ارمەنياعا مۇناي ونىمدەرىن باجسىز جەتكىزۋدى توقتاتا جانە شەكتەي الادى. سوندىقتان ءبىزدىڭ ىشكى نارىعىمىز ءۇشىن قاۋىپ-قاتەر جوق», دەدى اسەت ماعاۋوۆ.
ايتا كەتسەك, ەۋرازيا ەكونوميكالىق وداق مۇشەلەرى اراسىنداعى مۇناي جانە مۇناي ونىمدەرىن جەتكىزۋ 2014 جىلعى 29 مامىرداعى ەاەو تۋرالى شارتقا سايكەس جەكەلەگەن ەكىجاقتى كەلىسىممەن رەتتەلەدى. 2020 جىلعى 16 شىلدەدە نۇر-سۇلتان قالاسىندا ارمەنيا رەسپۋبليكاسىنا مۇناي ونىمدەرىن بەرۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمگە قول قويىلعان.
