شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, ءۇرجار اۋدانىنداعى الاكولدىڭ ءتۇبىن تازارتۋ جۇمىستارى باستالدى. كولدىڭ ءتۇبىن تولىق تەكسەرۋ ءۇشىن قۇتقارۋشىلارعا ءۇش كۇن قاجەت.
«سۇڭگۋىرلەر 207 دەمالىس بازاسىن, ونىڭ ىشىندە ء«ۇرجارايىم» بالالار ساۋىقتىرۋ لاگەرىنىڭ بويىنداعى 4,1 شاقىرىم جاعالاۋدىڭ ءتۇبىن تازارتادى. مۇنداي شارالار دەمالۋشىلاردىڭ قاۋىپسىزدىگىن قامتاماسىز ەتۋ ماقساتىندا شومىلۋ ماۋسىمى باستالار الدىندا جۇرگىزىلەدى. سونىڭ بارىسىندا قۇتقارۋشىلار ازاماتتارعا قاۋىپ توندىرەتىن زاتتاردى ءجيى تاۋىپ جاتادى», دەلىنگەن حابارلامادا.
جۇمىستىڭ ءبىرىنشى كۇنىندە بارلىعى 90 كەلى تەمىر, 2 بالىق اۋلاۋ تورى مەن 10 شىنى بوتەلكە شىعارىلدى. سۇڭگۋىرلەر 1,5 شاقىرىم جاعالاۋدى قامتىپ ۇلگەردى.
