باسقوسۋلار بارىسىندا دەپۋتاتتار جەرگىلىكتى تۇرعىندارعا كونستيتۋتسيالىق تۇزەتۋلەردى ءتۇسىندىرىپ, رەفەرەندۋمعا قاتىسۋعا شاقىردى. شتاب مۇشەلەرى تۇلكىباس اۋدانىنىڭ ميچۋرين اۋىلدىق وكرۋگىندە شارۋا قوجالىعى يەلەرىمەن جانە كاسىپكەرلەرمەن كەزدەسىپ, جالپىحالىقتىق رەفەرەندۋمدى وتكىزۋدىڭ العىشارتتارى, ۇسىنىلعان رەفورمالاردىڭ ەرەكشەلىكتەرى تۋرالى باياندادى.
– جالپى وبلىستا حالىقپەن جۇزدەسكەندە بىرنەشە ماسەلە كوتەرىلدى. سونىڭ ىشىندە ايەلدەردىڭ زەينەت جاسىن قىسقارتۋعا ەرەكشە ءمان بەرىلۋدە. بۇدان بولەك جايىلىم جەر تاپشىلىعى, ونەركاسىپ ورىندارىن اشۋ, سۋبسيديا الۋ, اگرو بانك قۇرۋ توڭىرەگىندە ۇسىنىستار ايتىلدى. بۇل رەفەرەندۋم شىن مانىندە ادىلەتتى قازاقستان قۇرۋ جونىندەگى ساياسي رەفورمالاردى جۇزەگە اسىرۋدىڭ العىشارتى بولىپ تابىلادى, – دەدى دارحان مىڭباي.
كەزدەسۋدە اۋىل تۇرعىندارى بەلسەندىلىك تانىتىپ, وزدەرىن تولعاندىرعان ساۋالدارىن قويىپ, پىكىر الىستى. سولاردىڭ ءبىرى تۇلكىباس كەنتى ارداگەرلەر كەڭەسىنىڭ توراعاسى س.توعىسباەۆ بىرقاتار ۇسىنىس ايتىپ, جاڭا وزگەرىستەرگە كوڭىلى تولاتىنىن جەتكىزدى.
– وسىعان دەيىنگى قولدانىستاعى زاڭداعى 98 باپتىڭ 33-نە وزگەرىس ەنگىزۋ جونىندەگى ماتىندەرمەن تۇگەل تانىسىپ شىقتىم. ارينە, وتە قۇپتارلىق ماسەلە. سەبەبى ءبىز بولاشاقتا جاڭا قازاقستان ءۇشىن ادىلدىك پەن اشىقتىقتى جانە دەموكراتيالىق رەفورمالاردى قولداۋىمىز كەرەك. ول ءۇشىن الدا وتەتىن بۇكىلحالىقتىق رەفەرەندۋمعا بارلىق ازاماتتى, اسىرەسە جاستاردى وزدەرىنىڭ بولاشاقتارى ءۇشىن كەلىپ داۋىس بەرۋگە شاقىرامىن, – دەدى اۋىل اقساقالى.
