ۇكىمەت • 24 مامىر، 2022

ىشكى نارىقتا گاز تۇتىنۋ كولەمى 35 پايىزعا ارتقان

16 رەت كورسەتىلدى

ەلىمىزدىڭ ەلدى مەكەندەرىن گازداندىرۋ ماسەلەسى قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا تالقىلاندى، دەپ حابارلايدى Egemen.kz.

پرەمەر-مينيستر كەيىنگى 5 جىلدا ىشكى نارىقتا گاز تۇتىنۋ كولەمى 35%-عا ارتقانىن اتاپ ءوتتى. وتكەن جىلدىڭ وزىندە عانا 3600-دەن استام ونەركاسىپتىك نىسان كوگىلدىر وتىنعا كوشىرىلدى.

«بيىل تۇتىنۋ كولەمى 20 ملرد تەكشە مەترگە دەيىن وسەدى دەپ بولجانۋدا. گازداندىرىلعان ەلدى مەكەندەردىڭ جالپى سانى 1700-دەن اسادى. وسىلايشا 11 ملن-نان استام قازاقستاندىق تابيعي گازعا قول جەتكىزەدى»، دەدى ءا. سمايىلوۆ.

پرەمەر-مينيستر تۇراقتى ءوسىم كورسەتىپ وتىرعان گاز سالاسىنىڭ ەلىمىزدىڭ الەۋمەتتىك-ەكونوميكالىق دامۋىندا ماڭىزدى ورىن الاتىنىن اتاپ ءوتتى. 

ء«وسىپ كەلە جاتقان حالىق سانى مەن ونەركاسىپ سالاسىنىڭ قاجەتتىلىكتەرىن قامتاماسىز ەتۋ ءۇشىن گاز كولەمى جەتكىلىكتى بولۋى كەرەك. سوندىقتان رەسۋرستىق بازانى كەڭەيتۋ، ونىڭ ىشىندە اۋقىمدى گەولوگيالىق بارلاۋ جۇمىستارى نەگىزگى مىندەتكە اينالۋى ءتيىس»، دەدى مينيسترلەر كابينەتىنىڭ باسشىسى.

پرەمەر-ءمينيستردىڭ پىكىرىنشە، شيكىزات قورى، اسىرەسە، گازدىڭ جەتكىلىكتى كولەمى نارىققا كەلەتىن الەۋەتتى ينۆەستورلار ءۇشىن اسا ماڭىزدى.

وسىعان بايلانىستى بەيىندى ۆەدومستۆولارعا 15 ماۋسىمعا دەيىن جەتىلدىرىلگەن مودەلدىك كەلىسىم-شارتتى ازىرلەۋ اياسىندا گاز جوبالارى ءۇشىن رەتتەۋشىلىك جانە فيسكالدىق پرەفەرەنتسيالاردىڭ تۇپكىلىكتى پاكەتىن ازىرلەۋ تاپسىرىلدى.

سونداي-اق ءاليحان سمايىلوۆ ەلدى ودان ءارى گازداندىرۋ گاز تاسىمالداۋ جۇيەسىنىڭ دەڭگەيى مەن جاعدايىنا تىكەلەي بايلانىستى ەكەنىن اتاپ ءوتتى. بۇگىنگى تاڭدا گاز قۇبىرلارى ماكسيمالدى قۋاتىندا جۇمىس ىستەپ تۇر. ولاردىڭ كوبى كۇردەلى جوندەۋدى قاجەت ەتەدى. وسىعان وراي پرەمەر-مينيستر 1 شىلدەگە دەيىن ۇكىمەتكە وڭىرلەردى گازداندىرۋدىڭ 2030 جىلعا دەيىنگى باس سحەماسىنىڭ جاڭارتىلعان جوباسىن ەنگىزۋدى تاپسىردى.

«جاڭا نىسانداردى سالۋ، ەسكىلەرىن جاڭعىرتۋ جانە جوندەۋ بويىنشا ناقتى جوسپار بولۋى كەرەك»،  دەدى ۇكىمەت باسشىسى. 

سونىمەن قاتار مەملەكەت باسشىسىنىڭ تاپسىرماسىنا سايكەس ەلىمىزدىڭ سولتۇستىك جانە شىعىس وڭىرلەرىن گازداندىرۋدىڭ وڭتايلى شەشىمى ىزدەستىرىلىپ جاتىر.

«قازىر ەكى نۇسقا پىسىقتالىپ جاتىر. ءبىرى – رەسەي ارقىلى گاز تارتۋ بولسا، ەكىنشىسى – «سارىارقا» ماگيسترالدىق گاز قۇبىرى ارقىلى. بۇل وتە ماڭىزدى ماسەلە. سوندىقتان كەشىكتىرۋگە بولمايدى»، دەدى ءاليحان سمايىلوۆ.

وسىعان بايلانىستى ەنەرگەتيكا مينيسترلىگىنە ءتيىستى اكىمدىكتەرمەن جانە «سامۇرىق-قازىنا» قورىمەن بىرلەسىپ، بيىلعى 1 قىركۇيەككە دەيىن اتالعان نۇسقالارعا كەشەندى باعالاۋ جۇرگىزىپ، كەلىسىلگەن شەشىمدى ەنگىزۋ تاپسىرىلدى.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار