وتىنىشتەر 23 مامىردان باستاپ, بيىلعى 14 قازانعا دەيىن Egov.kz مەملەكەتتىك قىزمەتتەر پورتالى ارقىلى قابىلدانادى. ال تاعىلىمدامادان وتۋگە قۇجات قابىلداۋ 2022 جىلعى 5 قىركۇيەكتە باستالىپ, 14 قازانعا دەيىن جالعاسادى. ۇمىتكەرلەردى بارلىق باعىت بويىنشا كونكۋرستىق ىرىكتەۋ 2022 جىلعى 30 مامىر مەن 30 قاراشا ارالىعىندا وتەدى.
وسى جىلى ماگيستراتۋرا مەن رەزيدەنتۋراعا 385, دوكتورانتۋراعا 60 ستيپەنديا قاراستىرىلىپ وتىر. ماماندىقتارعا كەلسەك, تەحنيكالىق سالاعا كادر دايارلاۋ ماسەلەسىنە كوبىرەك كوڭىل بولىنگەن. بۇل تۋرالى حالىقارالىق باعدارلامالار ورتالىعىنىڭ باسقارما توراعاسى ءانۋار جانعوزين: «مەملەكەت باسشىسىنىڭ تاپسىرماسىمەن «بولاشاق» باعدارلاماسىن قايتا باعدارلاۋ پروتسەسى ىسكە اسىرىلدى. ەندى ينجەنەرلىك-تەحنيكالىق كادرلاردى دايارلاۋعا باستى نازار اۋدارىلادى.
وسىعان بايلانىستى «بولاشاق» باعدارلاماسى بويىنشا تەحنيكالىق جانە IT ماماندىقتارعا گرانتتار سانى 60 پايىزعا دەيىن ۇلعايتىلدى. بۇل – «ينجەنەرلىك جۇيەلەر مەن جەلىلەر», «اۆياتسيا جانە اەروعارىشتىق تەحنيكا. اۋە قوزعالىسىن باسقارۋ», «ۇلكەن دەرەكتەردى تالداۋ», «جاڭا ماتەريالدار تەحنولوگياسى», «دەرەكتەر بازاسىن باسقارۋ», «اۆياتسيالىق تەحنيكا جانە تەحنولوگيالار», «ماشينا جاساۋ», «ونەركاسىپتىك اۆتوماتتاندىرۋ» جانە ت.ب. ماماندىقتار. جالپى, بيىل «بولاشاق» باعدارلاماسى بويىنشا باسىم ماماندىقتار تىزىمىندە اكادەميالىق وقۋعا 92, تاعىلىمدامادان وتۋگە 158 ماماندىق قاراستىرىلعان», دەدى.
«بولاشاق» باعدارلاماسىنداعى ماماندىقتاردىڭ ءتىزىمى سۇرانىسقا قاراي جاڭارتىلعان. ورتالىقتىڭ حابارلاۋىنشا, ەڭبەك نارىعىنىڭ ۇردىستەرىن تالداۋ نەگىزىندە وسى جىلى تىزىمگە يننوۆاتسيالار, جاڭا تەحنولوگيالار, مەديتسينا جانە ونەركاسىپتىك ينجەنەريا, جاراتىلىستانۋ عىلىمدارى سالاسىنداعى 40 جاڭا ماماندىق ەنگىزىلدى. ونىڭ 17-ءسى اتاۋلارىن كەڭەيتۋ ارقىلى بۇرىننان بار ماماندىقتارعا ەنگىزىلگەن. جالپى, باسىم ماماندىقتار ءتىزىمى تەحنيكالىق ماماندىقتارمەن 30%-عا ارتتى.
«بولاشاق» حالىقارالىق ستيپەندياسىنا كونكۋرستىق ىرىكتەۋ 3 كەزەڭنەن تۇرادى: كەشەندى تەستىلەۋ, تاۋەلسىز ساراپشىلىق كوميسسياسى مۇشەلەرىمەن جەكە اڭگىمەلەسۋ جانە شەتەلدە كادرلار دايارلاۋ جونىندەگى رەسپۋبليكالىق كوميسسيا وتىرىسىندا قۇجاتتاردى قاراۋ. باسىم ماماندىقتاردىڭ, ۇسىنىلاتىن ۋنيۆەرسيتەتتەردىڭ جانە قاجەتتى قۇجاتتاردىڭ ءتىزىمىن www.bolashak.gov.kz
سايتىنان بىلۋگە بولادى.
