فورۋم وزبەكستان رەسپۋبليكاسىنىڭ باستاماسىمەن ورتالىق ازيا مەملەكەتتەرى باسشىلارىنىڭ ءۇشىنشى كونسۋلتاتيۆتىك كەزدەسۋىندە وزبەكستان پرەزيدەنتىنىڭ ۇسىنۋىمەن (6 تامىز, 2021 ج., تۇرىكمەنستان) جانە وزبەكستانداعى قازاقستان رەسپۋبليكاسى ەلشىلىگىنىڭ قولداۋىمەن ۇيىمداستىرىلدى.
فورۋمعا قازاقستان رەسپۋبليكاسى اتىنان قر پرەزيدەنتى جانىنداعى جاستار ساياساتى جونىندەگى كەڭەس مۇشەلەرى, «تاۋەلسىزدىك ۇرپاقتارى» گرانتىنىڭ جانە ءتۇرلى عىلىمي وليمپيادالاردىڭ جەڭىمپازدارى, پرەزيدەنتتىك جاستار كادرلىق رەزەرۆىنىڭ, قازاقستان جاستار ۇيىمدارىنىڭ جانە قازاقستان حالقى اسسامبلەياسىنىڭ وكىلدەرى, جاس عالىمدار, IT ماماندار مەن گروسسمەيستەرلەر قاتىستى.
حالىقارالىق فورۋم بارىسىندا: جاستارعا ارنالعان الەۋمەتتىك ماڭىزى بار جوبالار مەن باعدارلامالاردى ودان ءارى ىسكە اسىرۋ, مادەني-گۋمانيتارلىق سالانى دامىتۋ ءۇشىن ورتالىق ازيا ءوڭىرى ەلدەرىنىڭ زياتكەرلىك جاستار ەليتاسى مەن اقپاراتتىق تەحنولوگيالار سەكتورى, جاستار ۇيىمدارى وكىلدەرى اراسىنداعى ايماقارالىق ءوزارا ءىس-قيمىلدى ارتتىرۋ جانە نىعايتۋ ماسەلەلەرى; سونداي-اق ورتالىق ازيا ەلدەرى اراسىنداعى باۋىرلاستىق, دوستىق قارىم-قاتىناستى نىعايتۋ ماسەلەلەرى تالقىلاندى.
اقپارات جانە قوعامدىق دامۋ ۆيتسە-ءمينيسترى ا.دانيلوۆ قۇتتىقتاۋ سوزىندە, قازاقستان حالىقارالىق سەرىكتەستەرمەن, سونىڭ ىشىندە جاستار قوزعالىسىنىڭ وكىلدەرىمەن ىنتىماقتاستىقتى جوعارى باعالايتىنىن اتاپ ءوتتى.
ء– بىز ءوز ەلىمىزدى, ەكونوميكانى, الەۋمەتتىك سالانى دامىتۋ, وتانداستارىمىزدىڭ ءال-اۋقاتىن نىعايتۋ ءۇشىن بارىنشا قولايلى جاعداي جاساۋدى كوزدەپ وتىرمىز. سوندىقتان وسى فورۋم عىلىمي-تەحنيكالىق ىنتىماقتاستىقتى جانداندىرۋعا ىقپال ەتەتىن جانە بىرلەسكەن جوبالاردى دامىتۋ مەن ىسكە اسىرۋ ءۇشىن جاعداي جاسايتىن ءتيىمدى كوممۋنيكاتسيالىق الاڭعا اينالادى دەپ ويلايمىن, – دەدى ا.دانيلوۆ.
قازاقستان جاستارىنان باسقا, اتالعان فورۋمعا وزبەكستان رەسپۋبليكاسى, قىرعىز رەسپۋبليكاسى, تاجىكستان رەسپۋبليكاسى جانە تۇرىكمەنستاننىڭ ۇزدىك جاستارى قاتىستى.
فورۋم قورىتىندىسى بويىنشا, مەملەكەت باسشىلارىنىڭ كەزەكتى كونسۋلتاتيۆتىك كەزدەسۋى بارىسىندا ورتالىق ازيا وڭىرىندەگى حالىقارالىق جاستار ىنتىماقتاستىعىن ودان ءارى نىعايتۋ بويىنشا بىرقاتار ۇسىنىس ەنگىزۋ جانە ورتالىق ازيا ەلدەرىنىڭ زياتكەرلىك جاستارى قوعامداستىعىن قۇرۋ جوسپارى قاراستىرىلدى.
