التىن ساتىپ الۋدىڭ ماڭىزى

الەمدە دە، قازاقستاندا دا التىنعا دەگەن سۇرانىستىڭ قاتتى وسكەنى بايقالادى. 2022 جىلدىڭ ناۋرىز ايىنىڭ وزىندە ەل تۇرعىندارى جالپى سالماعى 167،2 كيلو بولاتىن 8،3 مىڭ التىن قۇيماسىن ساتىپ العان. 2021 جىلمەن سالىستىرعاندا ساتىلعان التىن قۇيمالارىنىڭ سانى 2،9 ەسە، سالماعى 3،5 ەسە وسكەن. جالپى، بىلتىر سالماعى 1،1 توننا بولاتىن 32،3 مىڭ ولشەۋلى قۇيما ساتىپ الىنعان. ولشەۋلى قۇيما نارىعى ەلىمىزدىڭ بۇكىل ءوڭىرىن قامتيدى، نەگىزىنەن الماتى، نۇر-سۇلتان جانە اتىراۋدا كوبىرەك ساتىلدى. التىن قۇيمالارىنىڭ 5، 10، 20، 50 جانە 100 گرامداعى بەس ءتۇرى ۇسىنىلعان. ساتىپ الۋشىلار اراسىندا اسىرەسە 10 گرامدىق التىن ەرەكشە سۇرانىسقا يە. 2017-2021 جىلدار ارالىعىندا ساتىلعان التىن اراسىندا 10 گرامدىق التىننىڭ ۇلەسى 27 پايىزدى (23،4 مىڭ) قۇرايدى. ەسكە سالايىق، ۇلتتىق بانك 2017 جىلدان بەرى حالىققا سەرتيفيكاتتالعان تازارتىلعان التىن قۇيمالارىن ساتۋدى باس­تادى. ساتۋدىڭ باستى ماقساتى – قارجى جيناۋ ءۇشىن قازاقستاندىقتارعا قوسىمشا ينۆەستيتسيالىق قۇرال ۇسىنۋ.

قاي زاماندا دا التىن – قۇنى جويىل­مايتىن، سالماعى جەڭىلدەمەيتىن سترا­تەگيالىق اكتيۆ بولىپ سانالادى. ەگەر ينۆەستيتسيانى التىنمەن جاسار بولساڭىز، جيناعىڭىزدى ينفلياتسيادان قورعاپ قانا قويماي، كاپيتالىڭىزدى ەسەلەپ ارتتىرا دا الاسىز. ماسەلەن، 2016 جىلدان 2022 جىلعا دەيىن التىن باعاسى 76،4 پايىزعا قىمباتتاعان. وسىنىڭ ءوزى-اق التىننىڭ ينۆەستيتسيالاۋداعى تەڭدەسسىز اكتيۆ بولارىن كورسەتەدى. جالپى العاندا، التىن جوعارى وتىمدىلىككە يە، ول ءسىزدى ينفلياتسيا مەن ەكونو­ميكالىق داعدارىستاردان قورعايدى.

ۇلتتىق بانك شىعاراتىن ءاربىر التىن قۇيماسى قورعانىس ەلەمەنتتەرىمەن (اينا بەتى، ميكروتەكست جانە بەدەرلى جيەك) جا­راق­تالعان. قۇيما قانداي دا ءبىر مەحا­­ني­­كالىق زالالدان ساقتايتىنداي، قوراپ­­شانىڭ اشىلعان-اشىلماعانىن جەدەل تەكسەرە الاتىنداي قىلىپ ارنايى قوراپ­شادا شىعارىلادى. سونداي-اق قورعا­نىس قوراپشاسى قۇيما ساپاسىنىڭ سەرتيفيكاتى بولىپ ەسەپتەلەدى.

قازىرگى كەزدە التىن قۇيمالارىن Halyk Bank، «ەۋرازيالىق بانك»، Jusan Bank جانە «بانك تسەنتركرەديت» بولىمشەلەرىنەن، سونىمەن بىرگە جەكەلەگەن بانكتىك ەمەس ايىرباستاۋ بەكەتتەرىنەن ساتىپ الىپ، قايتا ساتۋعا بولادى.

ۇلتتىق بانكتىڭ تازارتىلعان قۇيمالار جانە ينۆەستيتسيالىق مونەتتەر نارىعىن دامىتۋ بويىنشا اۋستراليانىڭ پەرت قالاسىنداعى تەڭگە سارايىنىڭ تاجىريبەسىنە سۇيەنە وتىرىپ، تسيفرلى اكتيۆتەردى ەنگىزۋى مۇمكىن. تەڭگە سارايى InfiniGold كومپانياسىنىڭ كومەگىمەن ءوزىنىڭ قويماسىن التىندى ساقتاۋ، قاۋىپسىزدىك جانە كوميسسيالىق شىعىندارسىز ساتىپ العىسى كەلەتىن قاراپايىم ينۆەستورعا «ۆيرتۋالدى بەينەدە» ۇسىنادى. اۋستراليا ۇكىمەتىنىڭ كەپىلدىگىندەگى سارى مەتالدى كەز كەلگەن ۋاقىتتا كەز كەلگەن جەردە وتىرىپ-اق 0،02 دوللار مينيمالدى سوماسىنا ساتىپ الۋعا مۇمكىندىك بار. بىزدە دە وسىنداي تاجىريبە ەنگىزىلسە، وندا پايدالانۋشىلار ونلاين-پلاتفورمادا ۇلتتىق بانكتىڭ ينۆەستيتسيالىق قۇرالدارىن ساتىپ العان­دىعى تۋرالى سەرتيفيكاتتى ساتىپ الادى جانە ساتا الادى. بۇل رەتتە ناقتى ينۆەستيتسيالىق قۇرالدار ۇلتتىق بانكتىڭ كەپىلدىگىمەن ارنايى قويمادا ساقتالادى.