ەكولوگيا • 18 مامىر، 2022

بۇۇ قازاقستاننىڭ ەكولوگيا سالاسىنداعى باستامالارىنا قولداۋ جاسايدى

35 رەت كورسەتىلدى

بۇۇ كليمات سالاسىنداعى ماقساتتارعا قول جەتكىزۋ ءۇشىن قازاقستان باستامالارىنا قولداۋ جاسايدى. بۇل تۋرالى بۇۇ-نىڭ قازاقستانداعى تۇراقتى ۇلەيستىرۋشىسى ميكاەلا فريبەرگ-ستوري ءمالىم ەتتى، دەپ حابارلايدى Egemen.kz.

«جاھاندىق گەوساياسي سىن-قاتەرلەر تۇرعىسىندا ەكولوگيالىق داعدارىس پەن توتەنشە جاعدايدى بايقاپ وتىرمىز. سوندىقتان بۇل سالاعا ينۆەستيتسيا سالۋ ادامداردىڭ بولاشاعى ءۇشىن جاقسى جاعداي جاساۋعا ىقپال ەتەتىنىن تۇسىنەمىز. وسى ورايدا الەم ەلدەرىنىڭ ەكولوگيالىق داعدارىستى ەڭسەرۋ بويىنشا قادامدارىنا قازاقستاننىڭ قوسىپ وتىرعان ۇلەسىنە العىس ايتقىم كەلەدى. 2060 جىلعا دەيىنگى كومىرتەگى بەيتاراپتىعى باعىتى، جاڭا ەكولوگيا كودەكسى، سونداي-اق «جاسىل قازاقستان» ۇلتتىق جوباسى مەن باسقا دا باستامالارعا توقتالساق، وسى سالادا قازاقستان دۇرىس قادامدار جاساپ وتىرعانىن اتاپ وتۋگە بولادى. كليمات ماسەلەلەرى مەن ماقساتتارى بويىنشا بۇۇ-نىڭ وسىنداعى ەلدىك توبى قازاقستاندى قولداۋدى جالعاستىرا بەرەدى»، دەدى ميكاەلا فريبەرگ-ستوري ەلورداداعى «ستوكگولم+50» ساراپشىلاردىڭ ۇلتتىق كونسۋلتاتسيالارىنىڭ قورىتىندى سەسسياسىندا.

ءوز كەزەگىندە ەكولوگيا، گەولوگيا جانە تابيعي رەسۋرستار ۆيتسە-ءمينيسترى ءزۇلفيا سۇلەيمەنوۆا الەمدەگى ءاربىر ادام قورشاعان ورتاعا ىقپال ەتەتىن ءوزىنىڭ قىزمەتىنە جاۋاپكەرشىلىكپەن قاراپ، تابيعات بايلىعىن قورعاۋدا تىڭ قادامدار جاساۋ كەرەك ەكەنىن اتاپ ءوتتى.

«وسىعان بايلانىستى قورشاعان ورتانىڭ لاستانۋىمەن كۇرەس بويىنشا ۇزدىك تاجىريبەلەردى تاراتۋدا ازاماتتىق سەكتوردىڭ تالقىلاۋلارعا قاتىسۋى ماڭىزدى بولىپ وتىر. «ستوكگولم+50» ۇلتتىق كونسۋلتاتسيالارى ارقىلى تۇراقتى دامۋ مودەلىنە قازاقستاننىڭ تەزىرەك ءوتۋى تاسىلدەرىن تالقىلاۋ ماڭىزدى. ەكونوميكانى ترانسفورماتسيالاۋ مەن تەحنولوگيالاردى دامىتۋ ەسەبىنەن الەم قارقىندى وزگەرىستەردى وتكەرىپ جاتىر. وسى سالاداعى قادامدار كليمات پەن قورشاعان ورتاعا دا اسەرىن تيگىزىپ وتىرعانى وكىنىشتى. ەلىمىز كوگالداندىرۋ سالاسىنا قاتىستى ءتيىستى جۇمىستاردى باستاپ كەتتى. بۇل رەتتە ءبىزدىڭ مينيسترلىك ەكولوگيالىق قىزمەتتى جەتىلدىرۋ بويىنشا اۋقىمدى جۇمىستاردى قامتىپ وتىر»، دەدى ءزۇلفيا سۇلەيمەنوۆا.

سوڭعى جاڭالىقتار

قانت تاپشىلىعى نەدە؟

ەكونوميكا • كەشە

بەنزين قىمباتتايدى

ەكونوميكا • كەشە

اق جەلەڭدىلەرگە العىس

مەديتسينا • كەشە

ادالدىقتىڭ ەتالونى ەدى

قازاقستان • كەشە

بۇيراتاۋ بازارلىعى

تۋريزم • كەشە

ءۇش ۇنسىزدىك

ونەر • كەشە

ۇقساس جاڭالىقتار