سىبايلاس جەمقورلىققا قارسى ءىس-قيمىل اگەنتتىگىنىڭ ايماقتاعى دەپارتامەنتىنىڭ مالىمەتىنشە, مەكەمە قىزمەتكەرلەرى سوتتالعانداردىڭ تۇرمەدەگى تۇرمىستىق جاعدايىن كورگەن. كامەرالاردى, سەرۋەندەۋ الاڭىن, ۇيىقتاۋ, تاماقتانۋ ورىندارىن, سپورت زالىن, اعاش شەبەرحاناسىن ارالاعان.
«مۇنداي كەزدەسۋلەر وتە ءتيىمدى جانە سىبايلاس جەمقورلىقتىڭ الدىن الۋعا سەپتىگىن تيگىزەتىنىنە سەنىمدىمىز. بىزدەگى جازانى وتەۋشىلەرگە, ونىڭ ىشىندە سىبايلاس جەمقورلىق قىلمىستارى ءۇشىن سوتتالعاندارعا دا بارلىعىنا بىردەي جاعداي جاسالعان. ەشقانداي ارتىقشىلىقتار جوق», دەدى مەكەمە باسشىسى باقىتجان شارىپبەكوۆ.
كەلۋشىلەرگە كولونيادا جازاسىن وتەپ جاتقان لاۋازىمدى تۇلعالارمەن جاسالعان بىرنەشە سىبايلاس جەمقورلىق سيپاتىنداعى فاكتىلەر مىسال رەتىندە كەلتىرىلدى. بىرەۋى ۇلكەن اقشاعا ورىنباسارىنىڭ «ورنىن ساتپاقشى» بولسا, ەكىنشىسى بيۋدجەت قاراجاتىن جىمقىرعان.
«مەن ءۇشىن مۇنداي ورىندا وتكەن «ەكسكۋرسيا» ۇمىتىلماس اسەر قالدىردى. بۇگىندە مەملەكەتتىك قىزمەتشىلەر سىبايلاس جەمقورلىق ارەكەتكە بارعان جاعدايدا ولاردى قانداي زارداپتار كۇتىپ تۇرعانىن ءوز كوزدەرىمەن كوردى. ەركىندىكتى باعالاۋ كەرەك», دەپ اتاپ ءوتتى مەملەكەتتىك قىزمەتشى.
شارا سوڭىندا سىبايلاس جەمقورلىققا قارسى قىزمەت وكىلدەرى سىبايلاس جەمقورلىق قىلمىستارى ءۇشىن جازانىڭ قاتاڭداتىلعانىن مالىمەدى.
