باعدارلاما ءتيىمدى وڭالتۋ, اۋرۋلاردىڭ دامۋ قاۋپىن ازايتۋ, فيزيكالىق جانە پسيحو-ەموتسيونالدىق احۋالدى جاقسارتۋ مۇمكىندىگىن بەرەدى. بۇل قامكوڭىل بالالاردى قوعامدا ورتاعا بەيىمدەۋگە كوپ كومەگىن تيگىزەدى.
«قازاقستان حالقىنا» قورىنا بالالارى ءۇشىن تەحنيكالىق وڭالتۋ قۇرالدارىنا, ونىڭ ىشىندە ەكزوسكەلەتتەرگە مۇقتاج بولىپ وتىرعان اتا-انالاردان 300-دەن اسا ءوتىنىش كەلىپ ءتۇستى. باعدارلاما اياسىندا جىل سوڭىنا دەيىن 13 ەكزوسكەلەت شىعارۋ جوسپارلانسا, ونىڭ تورتەۋى بويىنشا ولشەۋ جۇرگىزىلىپ, ءوندىرىس پروتسەسى ىسكە قوسىلدى.
ەكزوسكەلەتتەر – بۇل تسەرەبرالدى سال اۋرۋى, مي جاراقاتى, ج ۇلىن جاراقاتتارى, پاراپلەگيا, بۇلشىقەت ديستروفياسى, رەتت سيندرومى جانە باسقا دا اۋرۋلارمەن اۋىراتىن بالالاردىڭ ءوز بەتىنشە قوزعالۋىنا كومەكتەسەتىن زاماناۋي, جوعارى تەحنولوگيالىق جانە ءتيىمدى وڭالتۋ قۇرالى. ءار بالاعا ءاربىر ەكزوسكەلەتتىڭ ارنايى پارامەترلەرى ەسكەرىلىپ, جەكە ازىرلەنەدى. بۇل ەڭ ءبىرىنشى قولدانۋعا قولايلى ءارى قاراپايىم بولۋىمەن ەرەكشەلەنەدى. ءبىر ەكزوسكەلەتتىڭ سالماعى – 25 كگ.
سونىمەن قاتار بالالاردى وڭالتۋ ۇلتتىق ورتالىعى بازاسىندا ناۋقاستىڭ ەكزوسكەلەتىنىڭ قاجەتتىلىگى تۋرالى قورىتىندى شىعاراتىن كوپ بەيىندى توپ قۇرىلعانىن ايتا كەتكەن ءجون.
قور «قازاقستاننىڭ 100 جاڭا تۇلعاسى» جوباسىنىڭ جەڭىمپازى ماۋلەن بەكتۇرعانوۆ نەگىزىن قالاعان ەكزوسكەلەتتەردى شىعاراتىن وتاندىق «MBionics» جشس-مەن كەلىسىمشارتقا وتىردى. وڭالتۋ جوسپارى مەكەمەلەرىنىڭ جۇمىس ۇلگىلەرىن جوبالاۋ استانا قالاسىنىڭ مەديتسينا ۋنيۆەرسيتەتىمەن تىعىز بايلانىستا جۇزەگە اسىرىلادى.
جالپى, «قازاقستان حالقىنا» قورى 13 بالانى ەكزوسكەلەتپەن قامتاماسىز ەتۋ ءۇشىن 117 ملن تەڭگە ءبولىپ وتىر.
