اۋعانستاندا سوعىس 1979 جىلى باستالدى. سودان بەرى سالىستىرا زەردەلەسەك, حالىق سانى ەكى ەسەگە ارتقان ەكەن. تاليباندار ەلدى ەكى رەت باسىپ العان كەزدە وسىنداي دەموگرافيالىق جاعداي تۋىندادى. بيلىك جۇرتتى گۋمانيتارلىق كومەك ەسەبىنەن تاماقتاندىرىپ وتىرعانى بەلگىلى. اۋعانستانعا حالىقارالىق قاۋىمداستىق قولدان كەلگەن كومەكتى بەرىپ كەلەدى.
تۋراسىن ايتايىق, اۋعانستان تاليباندار قولىنا وتكەننەن كەيىن كىمدەرگە كومەك بەرۋ كەرەك دەگەن ساۋال الدىمىزدان شىقتى. ويتكەنى ولار مويىندالماعان مەملەكەت ەسەبىندە بولدى. سونىڭ سالدارىنان بۇگىنگى تاڭدا حالىقتىڭ توقسان پايىزى اش قۇرساق وتىرعانى بەلگىلى. ودان بولەك بۇل ەلدە بيلىك ءۇشىن كۇرەستىڭ ءجۇرىپ جاتقانىن بارشامىز جاقسى تۇسىنەمىز. بۇل ماسەلەنىڭ دە وتە وزەكتى ەكەنى تالاس تۋدىرمايدى.
بايقاپ قاراساق, اۋعانستاندا گۋمانيتارلىق اپات ورىن السا, حالىق قايدا بارادى؟ بوسىپ كەتەتىنى ايتپاسا دا تۇسىنىكتى. ايتكەنمەن بوسقىندار يران مەن پاكىستان ەلدەرىن عانا پانالامايتىنى بەلگىلى. ولار ورتالىق ازياعا دا اعىلۋى ىقتيمال. ال بوسقىندار كوشى بەت تۇزەگەن جەردە راديكالدى كوزقاراستاعى ادامداردىڭ قوسا جۇرەتىنى اقيقات. بوسقىنداردىڭ اراسىندا نيەتى مەن پيعىلى تەرىس لاڭكەستەردىڭ دە قاپتاپ جۇرەتىنى دە داۋسىز. وسى ماسەلەنىڭ بارلىعى دا ءبىزدى الاڭداتپاي قويمايدى.
وتكەن جىلى ءبىز اۋعانستانعا 5 مىڭ توننا ۇن جىبەردىك. ودان باسقا دا كومەك كورسەتىلگەن بولاتىن. ءبىر سوزبەن ايتقاندا, ءبىز ءۇشىن وزەكتىلىگىن جويماعان اۋعانستان ماسەلەسى قاي كەزدە دە ماڭىزدى سانالادى. سوندىقتان دا پرەزيدەنتتىڭ اۋعانستانداعى جاعدايدى كوتەرگەنى وتە دۇرىس قادام بولدى دەسەك, ەش قاتەلەسپەيمىز. ويتكەنى بۇل كۇن تارتىبىندە كەزەك كۇتتىرمەيتىن پروبلەما ەكەنى ءسوزسىز. قازاقستان پرەزيدەنتى وسى جاعدايدى سامميت قاتىسۋشىلارىنا جان-جاقتى جەتكىزدى. جۇمىلىپ جۇمىس ىستەيتىن كەز كەلگەنى انىق.
ەركىن تۇقىموۆ,
پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى
