ۇكىمەت باسشىلارى كەڭەيتىلگەن قۇرامدا ساۋدا-ەكونوميكالىق ىنتىماقتاستىقتى ودان ءارى دامىتۋ, ونەركاسىپ, كولىك, اۋىل شارۋاشىلىعى جانە ءبىلىم بەرۋ سالالارىنداعى بىرلەسكەن جوبالاردى ىسكە اسىرۋ بارىسى, سونداي-اق سۋ-ەنەرگەتيكا سالاسىنداعى ءوزارا ءىس-قيمىل ماسەلەلەرىن تالقىلادى.
«وزبەكستان – بىزگە باۋىرلاس ءارى كورشىلەس مەملەكەت, ۋاقىت سىنىنان وتكەن دوسىمىز جانە ۇزاق مەرزىمدى ستراتەگيالىق سەرىكتەسىمىز. ءبىزدىڭ نەگىزگى ماقساتىمىز – ەكى ەلدىڭ مەملەكەت باسشىلارى العا قويعان مىندەتتەردى تولىق جۇزەگە اسىرۋ جانە قازاقستان-وزبەكستان ىنتىماقتاستىعىن جاڭا ساپالى دەڭگەيگە كوتەرۋ», دەدى ءاليحان سمايىلوۆ.
سونداي-اق قر پرەمەر-ءمينيسترى جامبىل وبلىسىندا جول-كولىك وقيعاسى سالدارىنان قازا تاپقان وزبەكستان ازاماتتارىنىڭ تۋىستارى مەن جاقىندارىنا كوڭىل ايتىپ, قولداۋ ءبىلدىردى.
ءوز كەزەگىندە ابدۋللا اريپوۆ زارداپ شەككەندەرگە جەدەل كومەك كورسەتىپ, بارلىق قاجەتتى قولداۋ شارالارىن ۇيىمداستىرعانى ءۇشىن قازاقستانداعى ارىپتەستەرىنە العىسىن ءبىلدىردى.
كەلىسسوز بارىسىندا 2021 جىلدىڭ قورىتىندىسى بويىنشا ەكى ەل اراسىنداعى ساۋدا-ساتتىق 33%-عا ($4,3 ملرد) وسكەنى اتاپ ءوتىلدى. 2022 جىلدىڭ ءى توقسانىنىڭ قورىتىندىسى بويىنشا دا وڭ ديناميكا بايقالادى — تاۋار اينالىمى $1 ملرد استى, بۇل وتكەن جىلدىڭ سايكەس كەزەڭىندەگى كورسەتكىشتەن 27,2%-عا جوعارى. ەكىجاقتى تاۋار اينالىمىن $10 ملرد دەيىن جەتكىزۋ ءۇشىن الداعى بەس جىلعا 41 ءىس-شارادان تۇراتىن پراكتيكالىق ءىس-قيمىل جوسپارى قابىلداندى. بۇل باعىتتا تاراپتار ءوزارا ساۋداداعى كەدەرگىلەردى جويىپ, جاڭا كەدەرگىلەردىڭ الدىن الۋ قاجەتتىلىگىن اتاپ كورسەتتى.
قازاقستان ءتيىستى جول كارتاسىنىڭ جوباسىن ازىرلەپ جاتىر. اتالعان قۇجات تۋىنداعان ءتۇيىندى ماسەلەلەردى شەشۋ ماقساتىندا ناقتى جۇمىس جۇرگىزۋگە مۇمكىندىك بەرەدى.
ونەركاسىپ كووپەراتسياسىندا دا وڭ ءۇردىس بايقالادى, وندا قازىرگى ۋاقىتتا جالپى سوماسى شامامەن $1 ملرد 786 ملن بولاتىن توعىز ءىرى بىرلەسكەن جوبا ىسكە اسىرىلىپ جاتىر.
«وزبەك كومپانيالارىمەن تىعىز ىنتىماقتاستىق ورناتۋعا قۋانا كەلىسەمىز», دەدى ءاليحان سمايىلوۆ.
اۋىل شارۋاشىلىعى سالاسىنداعى ىنتىماقتاستىق تۇرعىسىنان قازاقستاندىق كومپانيالاردىڭ وزبەكستانعا ەت-ءسۇت ونىمدەرىن, بالىق جانە ودان جاسالاتىن ونىمدەردى ەكسپورتتاۋعا مۇددەلى ەكەنى ايتىلدى.
بۇعان دەيىن وزبەكستان تاراپىنا ەل اۋماعىنا اۋىل شارۋاشىلىعى ونىمدەرىن اكەلۋگە قۇقىعى بار كومپانيالاردىڭ تىزىلىمىنە 113 قازاقستاندىق كومپانيانى ەنگىزۋ بويىنشا بارلىق قاجەتتى ماتەريالدار جىبەرىلگەن بولاتىن. ازىق-ت ۇلىك ينفلياتسياسىن تەجەۋ اياسىندا قازاقستان مەن وزبەكستاننىڭ تاۋار وتكىزۋ جۇيەلەرىن ۇيلەستىرۋدى جانداندىرۋ قاجەت ەكەنى اتاپ ءوتىلدى.
سونداي-اق ۇكىمەت باسشىلارى ەكى ەلدىڭ جوعارى وقۋ ورىندارى اراسىنداعى ارىپتەستىكتى رەتكە كەلتىرۋ ماسەلەلەرىن تالقىلادى. وزبەكستان جاستارىنىڭ قازاقستاندىق بىلىمگە دەگەن تۇراقتى قىزىعۋشىلىعىن ەسكەرە وتىرىپ, تاشكەنتتە ءال-فارابي اتىنداعى قازۇۋ, ل. ن. گۋميلەۆ اتىنداعى ەۇۋ مەن م. اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ فيليالدارىن اشۋ ماسەلەسى پىسىقتالىپ جاتىر.
سونىمەن قاتار كەلىسسوز بارىسىندا سۋ-ەنەرگەتيكا سالاسىنداعى ءوزارا ءىس-قيمىل ماسەلەسى قوزعالدى. تاياۋدا ۆەگەتاتسيالىق كەزەڭدە «باحري توچيك» سۋ قويماسىنىڭ جۇمىس رەجيمى بويىنشا ءۇش جاقتى ۋاعدالاستىققا قول جەتكىزۋ كوزدەلىپ وتىر, بۇل سىرداريا وزەنىنىڭ ورتا اعىسىن, ونىڭ ىشىندە «دوستىق» كانالىنىڭ قازاقستاندىق بولىگىن قاجەتتى سۋمەن قامتاماسىز ەتۋگە مۇمكىندىك بەرەدى.
تالقىلاۋدى قورىتىندىلاي كەلە, قازاقستان مەن وزبەكستاننىڭ پرەمەر-مينيسترلەرى بىرلەسكەن كۇش-جىگەرمەن كەشەندى ەكىجاقتى ىنتىماقتاستىققا قوسىمشا سەرپىن بەرۋ ءۇشىن بەلگىلەنگەن بارلىق جوبالاردى پىسىقتاۋدى ودان ءارى جالعاستىرۋعا دايىن ەكەندەرىن راستادى.
