ينتەرنەت ارقىلى ەسىرتكى زاتتارىن وتكىزۋ فاكتىلەرى بويىنشا 82 قىلمىستىق ءىس تىركەلدى, جارناما جانە ناسيحاتتاۋ بويىنشا تاعى 37 قىلمىستىق ءىس تەرگەلۋدە.
«قازىر ەسىرتكى زاتتارىن ساتاتىن ادامدار ينتەرنەت ارقىلى جۇمىس ىستەيدى. ولار ءموبيلدى قوسىمشالاردى, مەسسەندجەرلەردى پايدالانادى. تولەم دە قاشىقتان, ياعني, ونلاين-تولەمدەر ارقىلى جۇرگىزىلەدى. تولەم الىنعاننان كەيىن ساتىپ الۋشى ەسىرتكى تۇيىرشىگى جاسىرىلعان ورىننىڭ كوورديناتتارى بەلگىلەنگەن سىلتەمە الادى», دەدى قر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ م.ا. اسحات مۇحامەتقاليەۆ.
ونىڭ ايتۋىنشا, اتالعان قىلمىستىق سحەمالاردىڭ ۇيىمداستىرۋشىلارى ادەتتە باسقا ەلدەردە تۇرادى. ماماندار ەسىرتكىنىڭ تارالۋى تۋرالى اقپاراتتى قامتيتىن سايتتاردى, پوستتاردى, بلوگتار مەن جارنامالاردى انىقتاۋ ءۇشىن ينتەرنەت-كەڭىستىككە مونيتورينگ جۇرگىزۋدە.
«جىل باسىنان بەرى وسىنداي 655 ينتەرنەت-رەسۋرس انىقتالىپ, بۇعاتتالدى. ەسىرتكىنى ينتەرنەت-رەسۋرستار ارقىلى وتكىزۋ فاكتىلەرى بويىنشا 82 قىلمىستىق ءىس تىركەلدى, ەسىرتكىنى جارنامالاۋ جانە ناسيحاتتاۋ بويىنشا 37 قىلمىستىق ءىس تەرگەلۋدە», دەدى اسحات مۇحامەتقاليەۆ.
