ءباسپاسوز كونفەرەنتسياسىندا ءسوز العان جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ:
– 2022 جىلعى نەگىزگى ۇبت-عا 130 مىڭنان اسا ادام تىركەلدى. وتىنىشتەر 14 مامىرعا دەيىن قابىلداندى. تەستىلەۋدىڭ ءوزى 16 مامىر مەن 5 شىلدە ارالىعىندا وتەدى. ۇبت-عا قاتىسۋ ءۇشىن http://app.testcenter.kz سايتىندا ءوتىنىش بەرۋگە بولادى. سونداي-اق تالاپكەرلەر نەگىزگى ۇبت-نى ەكى رەت تاپسىرىپ, ۇزدىك ناتيجەمەن گرانتتاردى تاعايىنداۋ كونكۋرسىنا قاتىسا الادى. بۇل – بيىلعى تەستىلەۋدىڭ ەڭ ماڭىزدى جاڭالىعى. پاندەردىڭ سانى وزگەرىسسىز قالادى: ءۇش مىندەتتى جانە ەكى تاڭداۋ. تەست تاپسىرمالارىنىڭ سانى – 120. ونىڭ ىشىندە قازاقستان تاريحىنان – 15, ماتەماتيكالىق ساۋاتتىلىقتان – 15, وقۋ ساۋاتتىلىعىنان – 20 جانە ەكى بەيىندىك پاننەن – 35. ەڭ جوعارعى ۇپاي سانى – 140. تەستىلەۋدىڭ جالپى ۋاقىتى – 4 ساعات (240 مينۋت). ال تاعى ءبىر وزگەرىسكە كەلسەك, بيىل تالاپكەر ءبىرىنشى تەستىلەۋدە تاڭداعان ءپانىن ەكىنشى ۇبت-دا اۋىستىرۋعا بولمايدى. وسى جىلعى تەستىلەۋدىڭ تاعى ءبىر ەرەكشەلىگى – ەگەر ءبىرىنشى تەستىلەۋ كەزىندە ەرەجە بۇزىلسا, وندا ەكىنشى رەت تاپسىرا المايدى. ال ەگەر ەكىنشى تەستىلەۋ كەزىندە ەرەجەلەر بۇزىلسا, وندا ءبىرىنشى جانە ەكىنشى سىناقتىڭ ناتيجەلەرى جويىلادى, – دەدى.
دەپارتامەنت ديرەكتورىنىڭ ايتۋىنشا, شەكتى بالل بويىنشا قاتتى وزگەرىس جوق, تەك قۇقىق باعىتىندا جوعارى ءبىلىم الۋعا ءوتۋ كورسەتكىشى 75 بالعا ارتتى. ەرەكشە ءبىلىم الۋدى قاجەت ەتەتىن بالالارعا تەستىلەۋدە قوسىمشا 40 مينۋت بەرىلەدى. سونىمەن قاتار ولاردىڭ قابىلەتى مەن ەرەكشەلىگىنە, مۇمكىندىكتەرىنە قاراي تەستىلەۋدىڭ ساپاسى دا, قۇرىلىمى دا وزگەردى. اكادەميالىق ادالدىقتى ساقتاۋ ءۇشىن تالاپكەرلەردىڭ تەست نۇسقاسى تاڭبالانادى, ياعني ءاربىر قاتىسۋشىنىڭ جەكە تەست نۇسقاسى بولادى. تالاپكەرلەر ەرەجەلەردى بۇزعان جانە اۋديتوريادان تىس جەرلەرگە تەست تاپسىرمالارىن شىعارۋعا ارەكەت جاساعان جاعدايدا ولاردىڭ ناتيجەلەرى جويىلادى. اقپاراتتىق قاۋىپسىزدىك ماقساتىندا تەستىلەۋ بۇرىن 1 كامەرا ارقىلى وتكىزىلىپ كەلگەن بولسا, بيىلدان باستاپ «1 كومپيۋتەر – 2 كامەرا – 1 تەستىلەنۋشى» قاعيداتىمەن جۇرگىزىلەدى.
