رەسەي پرەزيدەنتى دميتري مەدۆەدەۆتىڭ تۇرىك رەسپۋبليكاسىنا رەسمي ساپارى وتە ءساتتى ءوتتى دەۋگە بولادى. ەكى ەل اراسىنداعى ىنتىماققا جەتكىزەتىن كوپتەگەن قۇجاتتارعا قول قويىلدى, تىلەكتەر ايتىلدى. ەندى ولار ءبىر-بىرىنە ۆيزاسىز بارا الادى. بۇل ەلدەردىڭ ءتۇرلى شارۋاشىلىق سالاسىنا ينۆەستيتسيا سالۋ كولەمى 25 ميلليارد دوللار قۇرايتىنى كوپ جايدى اڭعارتادى.
كەلىسىم بۇزىلدى
وسىدان ءبىراز بۇرىن تايلاندتاعى بيلىك پەن وپپوزيتسيا اراسىنداعى قاقتىعىستى توقتاتۋ جونىندە كەلىسىمگە قول جەتكەن بولاتىن. بيلىكتەگىلەر جىل اياعىنا دەيىن پارلامەنت سايلاۋىن وتكىزۋگە, كابينەتتىڭ قىزمەتىنەن كەتۋىنە مىندەتتەنىپ ەدى. مۇنىڭ ەسەسىنە وپپوزيتسيا قارسىلىق ارەكەتتەرىن توقتاتۋى ءتيىس بولاتىن. بىراق وپپوزيتسيا توقتاتپادى, قايتا استانانىڭ ىسكەرلىك ايماعىندا ارەكەتتەرىن كۇشەيتتى. بۇعان پرەمەر-مينيستر ابحاسيت ۆەتچاچيۆا دا پارمەندى شارالارمەن قارسى جاۋاپ بەرىپ وتىر.
وزدەرىنەن باستادى
ۇلىبريتانيانىڭ جاڭا سايلانعان, كونسەرۆاتور دەۆيد كەمەرون باستاعان كواليتسيالىق ۇكىمەتىنىڭ مۇشەلەرى ءوز جالاقىلارىن 5 پايىزعا كەمىتۋگە كەلىسەتىنىن مالىمدەدى. ونداعى ماقسات – بيۋدجەت تاپشىلىعىنا قارسى كۇرەس. جاڭا تاعايىندالاتىندارعا بۇل ونشالىقتى اسەر ەتپەيدى. ءتىپتى سول 5 پايىزعا كەمىتىلگەن جالاقىنىڭ ءوزى ايتارلىقتاي جوعارى جانە جاڭا كەلگەندەرگە ونشالىقتى اڭعارىلمايدى. ال بۇرىننان الىپ كەلە جاتقان جالاقىنى قىسقارتۋ اۋىر بولار ەدى. ونىڭ ەسەسىنە, ەندى باسقالاردىڭ ايلىعىنان قىسقارتۋدى تالاپ ەتۋ جەڭىل.
يراندا – جاڭا قارۋ
جاقىندا وتكەن سەگىز كۇندىك اسكەري جاتتىعۋ كەزىندە يران قارۋلى كۇشتەرى جاڭا تورپەدولار مەن “جەر-تەڭىز” كلاسىنداعى “فادجر-5” زىمىراندارىنىڭ سوڭعى مودەلىن سىناقتان وتكىزدى. جانە ول ويداعىداي ءوتتى دەپ حابارلادى. بۇل قارۋلار سۋ استىنداعى نىسانداردى جويۋعا باعىتتالاتىن كورىنەدى.
چاۆەسكە ءبارى لايىق
ۆەنەسۋەلا ۇكىمەتىنىڭ مەكسيكانىڭ مەنشىگى سانالاتىن ازىق-ت ۇلىك وندىرەتىن “موناكا” كومپانياسىن مەملەكەت مەنشىگىنە العانى ءبىراز شۋ تۋدىردى. كومپانيا باسشىلارى بۇدان بەيحابار بولعان. ۇكىمەت شەشىمىن ەستىپ, ولار تاڭ-تاماشا قالىپتى. بۇل ەلدە بۇرىن دا تالاي رەت وسىلاي بولعان ەكەن. پرەزيدەنت ۋگو چاۆەس شەشىم قابىلدايدى دا, كومپانيالار, كاسىپورىندار مەملەكەت مەنشىگىنە كوشە بەرەدى.
ءپارانجىسىز پاريج
فرانتسيانىڭ ۇلتتىق جينالىسىنىڭ دەپۋتاتتارى “ادامنىڭ ءجۇزىن جاۋىپ تۇراتىن كيىم كيۋگە تىيىم سالۋ” جونىندەگى قاراردى قولداپ داۋىس بەردى. ولاردىڭ پىكىرىنشە, ءپارانجى كيۋ “رەسپۋبليكالىق قۇندىلىقتى بۇزعاندىق” بولىپ تابىلادى ەكەن. ۇكىمەت سوعان سايكەس زاڭ دايىنداپ جاتىر, ول بويىنشا “قوعامدىق ورىندا ءجۇزىن جاپقان كيىم” كيگەندەرگە 150 ەۋرو ايىپ سالىنباق. بۇل زاڭ پارلامەنتتە بەكىتىلەدى. فرانتسيادا 5 ميلليونداي مۇسىلمان ءومىر سۇرەدى, ەكى مىڭداي ايەل ءپارانجى كيەدى ەكەن.
پەرىشتە قاققان
سارسەنبى كۇنى ليۆيانىڭ استاناسى ءتريپوليدىڭ اۋەجايىندا وڭتۇستىك افريكا رەسپۋبليكاسىنان ۇشىپ كەلىپ, قونار ساتتە ا300-200 اەروبۋس ۇشاعى اپاتقا ۇشىراپ, 93 جولاۋشى مەن 11 ەكيپاج مۇشەسى قازا تاپتى. تەك سەگىز جاسار بالا عانا امان قالدى. وسى اپاتتىڭ سالدارىنان بۇكىل ۇشاقتىڭ بىت-شىتى شىعىپ, جاي تەمىر-تەرسەككە اينالعانىن كورگەندە, الگى بالانىڭ قالاي امان قالعانىنا تاڭداناسىڭ. ءسىرا, پەرىشتە قاققان دەپ وسىندايدا ايتسا كەرەك.
قاراقشىلارعا قاتالدىق
جاقىندا سومالي قاراقشىلارىنىڭ ءبىر توبى “موسكوۆسكي ۋنيۆەرسيتەت” تانكەرىنە شابۋىل جاساعاندا, رەسەيدىڭ ەكىنشى اسكەري “مارشال شاپوشنيكوۆ” كەمەسىنىڭ ارناۋلى بولىمشەسى قاراقشىلاردى تۇتقىنداپ, وتانداستارىن قۇتقارعانى بەلگىلى. سونان سوڭ رەسەيلىكتەر قاراقشىلاردى ۇرمەلى قايىققا مىنگىزىپ, اشىق تەڭىزگە بوساتىپ جىبەرەدى. جاعالاۋدان 300 ميل قاشىقتان اشىق تەڭىزگە جىبەرۋ ولاردى تىكەلەي ولىمگە كەسكەنمەن بىردەي ەدى. قازىر ولاردىڭ بارلىعىنىڭ قازا بولعانى انىقتالىپ وتىر. سونداي-اق رەسەيلىكتەر قاراقشىلاردى الدىن الا اتىپ ءولتىرىپ, ولاردىڭ دەنەلەرىن ودان كەيىن قايىققا سالىپ, تەڭىزگە جىبەرگەن دەگەن دە ءسوز بار.
ازىرلەگەن ماماديار جاقىپ.
