بالقاش قالاسىنداعى ر. قوشقارباەۆ اتىنداعى تەحنيكالىق كوللەدجدە كونستيتۋتسيالىق تاقىرىپتا مازمۇندى كەزدەسۋ ءوتتى. ءىس-شاراعا بالقاش قالالىق فيليالىنىڭ جەتەكشىسى قانىش ىسقاق, قالالىق ءماسليحات دەپۋتاتى الەكساندرا اگليۋكوۆا جانە وتباسىن قولداۋ ورتالىعىنىڭ ديرەكتورى, قحپ ايەلدەر قاناتىنىڭ ءتورايىمى ايگەرىم كارىموۆا قاتىستى. ولار وقىتۋشىلار مەن ستۋدەنتتەرگە ۇسىنىلىپ وتىرعان وزگەرىستەردىڭ ماڭىزىن جان-جاقتى ءتۇسىندىرىپ, قاتىسۋشىلاردىڭ سۇراقتارىنا جاۋاپ بەردى.
«مۇنداي اشىق ديالوگتار جاستاردىڭ قۇقىقتىق ساۋاتتىلىعىن ارتتىرىپ, ازاماتتىق بەلسەندىلىكتى نىعايتۋعا ىقپال ەتەدى», دەپ تۇيىندەدى پارتيا وكىلدەرى.
سونىمەن قاتار, فيليال كونستيتۋتسياعا ۇسىنىلعان وزگەرىستەردى تالقىلاۋعا ارنالعان دوڭگەلەك ۇستەل ۇيىمداستىردى. وعان ءارتۇرلى دەڭگەيدەگى ءماسليحات دەپۋتاتتارى, پارتيانىڭ ساياسي كەڭەسى, وبلىستىق قوعامدىق كەڭەس, اقساقالدار كەڭەسى, قحپ-نىڭ ايەلدەر جانە جاستار قاناتىنىڭ وكىلدەرى, پارتيا بەلسەندىلەرى مەن بۇقارالىق اقپارات قۇرالدارى قاتىستى. زاڭگەر-ساراپشىلاردىڭ قاتىسۋىمەن جينالعاندار 6 تۇزەتۋ ۇسىنىسىن ازىرلەپ, قابىلدادى. بۇل ۇسىنىستار كونستيتۋتسيالىق كوميسسيانىڭ قاراۋىنا جولدانادى.
قحپ-نىڭ پاۆلودار وبلىستىق فيليالى دا وڭىرلىك پارتيا اكتيۆىمەن اقپاراتتىق-ءتۇسىندىرۋ كەزدەسۋىن وتكىزدى. تالقىلاۋ اشىق ديالوگ فورماتىندا ءوتىپ, كونستيتۋتسيالىق وزگەرىستەردىڭ ءمانى, پارتيا ۇستانىمى جانە رەفورمالاردى ىسكە اسىرۋداعى قوعامدىق-ساياسي ينستيتۋتتاردىڭ رولىنە باسىمدىق بەرىلدى.
قحپ پاۆلودار وبلىستىق فيليالى توراعاسىنىڭ مىندەتىن اتقارۋشى الىمبەك اعىباەۆ ءوز بايانداماسىندا پارتيا ۇسىنىلىپ وتىرعان كونستيتۋتسيا جوباسىن قولدايتىنىن جانە ونى ساياسي رەفورمالاردىڭ قيسىندى جالعاسى دەپ سانايتىنىن اتاپ ءوتتى.
«جاڭا كونستيتۋتسيا جوباسى جابىق شەشىمدەردىڭ ناتيجەسى ەمەس. ول بۇكىلحالىقتىق كەڭ اۋقىمدى تالقىلاۋدىڭ قورىتىندىسى جانە قوعامنىڭ نەعۇرلىم ءادىل ءارى تەڭگەرىمدى ساياسي جۇيەگە دەگەن سۇرانىسىن كورسەتەدى», دەدى ول.
فيليال توراعاسىنىڭ ورىنباسارى الەكساندر پىسين پارتيا ىشىندەگى ءتۇسىندىرۋ جۇمىستارىنىڭ ماڭىزىن اتاپ ءوتتى.
ء«بىزدىڭ مىندەتىمىز – رەفورمالاردى جاي عانا قولداۋ ەمەس, ولاردىڭ ءمانىن حالىققا جەتكىزۋ. كونستيتۋتسياداعى وزگەرىستەر ءاربىر ازاماتتىڭ ومىرىنە قالاي اسەر ەتەتىنىن قاراپايىم ءارى تۇسىنىكتى تىلمەن ءتۇسىندىرۋىمىز قاجەت», دەدى ول.
جەلەزين اۋداندىق ءماسليحاتىنىڭ دەپۋتاتى ەۆگەني ميرونوۆ تا ءوز پىكىرىن ءبىلدىردى.
«تالقىلاۋدىڭ فورمالدى ەمەس, ناقتى ءوتىپ جاتقانى ماڭىزدى. پارتيا اكتيۆى ۇدەرىسكە بەلسەندى قاتىسىپ, سۇراقتار قويىپ, ءوز پىكىرىن ءبىلدىرىپ ءجۇر. قازىرگى قازاقستاننىڭ كونستيتۋتسياسى ءدال وسىلاي – ديالوگ پەن قوعامنىڭ قاتىسۋى ارقىلى قالىپتاسۋى ءتيىس», دەدى ە.ميرونوۆ.
قحپ-نىڭ اتىراۋ وبلىستىق فيليالى دا كونستيتۋتسيا جوباسىن ءوز بەلسەندىلەرىمەن تالقىلادى. فيليال ءتورايىمى بالجان دوسمۇحامبەتوۆا جوبا نەگىزگى ەرەجەلەرىن ەگجەي-تەگجەيلى ءتۇسىندىرىپ, ۇسىنىلىپ وتىرعان نورمالاردى حالىققا كەڭىنەن جەتكىزۋدىڭ ماڭىزىن اتاپ ءوتتى.
