كەزدەسۋ بارىسىندا كونستيتۋتسيالىق رەفورمانىڭ نەگىزگى ەرەجەلەرى, جاستاردىڭ قۇقىقتارى مەن مۇمكىندىكتەرىن كەڭەيتۋ, ازاماتتىق بەلسەندىلىكتى ارتتىرۋ, سونداي-اق شەشىم قابىلداۋ ۇدەرىستەرىنە جاستاردى كەڭىنەن تارتۋ ماسەلەلەرى ءسوز بولدى.
ءىس-شارانى اشقان كونگرەستىڭ اتقارۋشى ديرەكتورى باقداۋلەت جاندىلداەۆ قازىرگى كەزەڭنىڭ ەل تاريحىنداعى ايرىقشا ماڭىزىن اتاپ ءوتتى. ونىڭ ايتۋىنشا, قازاقستاندا كونستيتۋتسيالىق رەفورما جۇزەگە اسىپ, كونستيتۋتسيانىڭ جاڭارتىلعان ءماتىنى كەڭ قوعامدىق تالقىلاۋعا ۇسىنىلعان. جاڭا رەداكتسياداعى نەگىزگى زاڭ الەۋمەتتىك مەملەكەت قاعيداتتارىن كۇشەيتىپ, بارلىق ازاماتقا, سونىڭ ىشىندە جاستارعا دا ءبىلىم الۋ, ەڭبەك ەتۋ جانە ءوزىن-ءوزى دامىتۋ سالالارىندا تەڭ مۇمكىندىك بەرۋگە باعىتتالعان.
دوڭگەلەك ۇستەلدە كونستيتۋتسيالىق رەفورما جونىندەگى كوميسسيانىڭ مۇشەسى, استانا قالاسى قوعامدىق كەڭەسىنىڭ توراعاسى, قازاقستان رەسپۋبليكاسىنىڭ ۇلتتىق قۇرىلتايى مۇشەسى زۇلفۇحار عايپوۆ ءسوز سويلەپ, جاڭا كونستيتۋتسيا جوباسىنىڭ ازىرلەنۋ بارىسىنا توقتالدى. ونىڭ ايتۋىنشا, قۇجات ازاماتتاردان, ساياسي پارتيالاردان, قوعامدىق ۇيىمدار مەن ساراپشىلاردان تۇسكەن ۇسىنىستاردى كەشەندى تالداۋ جانە اشىق قوعامدىق تالقىلاۋ ناتيجەسىندە دايىندالعان.
«كەيىنگى جىلدارى ەلىمىزدە «ادىلەتتى قازاقستان» يدەياسىن ىسكە اسىرۋ ءۇشىن ساياسي جۇيەنى جاڭعىرتۋعا باعىتتالعان اۋقىمدى رەفورمالار جۇرگىزىلىپ جاتىر. بۇل وزگەرىستەردىڭ وزەگى – حالىقتىڭ مەملەكەتتىك باسقارۋ ىسىنە تىكەلەي ءارى مازمۇندى قاتىسۋىن قامتاماسىز ەتۋ», دەدى ول.
ءوز كەزەگىندە «جاسىل ەل» ەڭبەك جاساقتارىنىڭ رەسپۋبليكالىق شتابىنىڭ جەتەكشىسى نۇراسىل بەكماتوۆ كونستيتۋتسيالىق وزگەرىستەردىڭ ازاماتتىق جاۋاپكەرشىلىكتى قالىپتاستىرۋعا ىقپالىن اتاپ ءوتتى. ول جاستار اراسىندا ەكولوگيالىق مادەنيەتتى دامىتۋدىڭ ماڭىزىن ايتا كەلىپ, «تازا قازاقستان» باستاماسىنا ەرەكشە توقتالدى.
«ەكولوگيالىق مادەنيەت زاڭمەن عانا ەمەس, ەڭ الدىمەن سانا مەن تاربيە ارقىلى ورنىعادى. جاستار «تازا قازاقستان» سياقتى باستامالارعا قاتىسۋ ارقىلى قورشاعان ورتانى قورعاۋعا جانە تۋعان جەرگە جاناشىرلىق تانىتۋعا ناقتى ۇلەس قوسا الادى», دەدى سپيكەر.
ۆيتسە-پرەزيدەنت جانە حالىق كەڭەسى: جاڭا اتا زاڭ جوباسى ۆارشاۆادا تانىستىرىلدى
جيىندا كونستيتۋتسيالىق رەفورمانىڭ يدەولوگيالىق نەگىزدەرى دە تالقىلاندى. باقداۋلەت جاندىلداەۆ كونستيتۋتسيا پرەامبۋلاسىنىڭ ماڭىزىن اتاپ, ءدال وسى ءبولىم نەگىزگى زاڭنىڭ قۇندىلىقتىق جانە مازمۇندىق باعىتىن ايقىندايتىنىن ايتتى. ونىڭ پىكىرىنشە, جاڭارتىلعان پرەامبۋلادا تاريحي جولىن تەرەڭ تۇسىنەتىن, بولاشاققا نىق قادام باسقان, جاۋاپتى قازاقستاننىڭ بەينەسى ايقىن كورىنەدى. بۇل تۇزەتۋلەر فورمالدى سيپاتتاعى وزگەرىس ەمەس, قوعام سۇرانىسى مەن ۋاقىت تالابىنان تۋعان سانالى تاريحي تاڭداۋ.
سونداي-اق «استانا جاستارى» جاستار رەسۋرستىق ورتالىعى ءبولىمىنىڭ جەتەكشىسى ارايلىم ساپارالي كونستيتۋتسيانىڭ مەملەكەت پەن قوعام دامۋىنىڭ نەگىزى ەكەنىنە توقتالدى.
«كونستيتۋتسيا – ەلىمىزدىڭ نەگىزى. قوعام دامىعان سايىن زاڭ دا زامان تالابىنا ساي جاڭارىپ وتىرۋى قاجەت. ۇسىنىلىپ وتىرعان رەفورما ادىلدىككە, زاڭ ۇستەمدىگىنە جانە اشىق مەملەكەت قۇرۋعا باعىتتالعان. رەفەرەندۋم – حالىقتىڭ, سونىڭ ىشىندە جاستاردىڭ دا, ءوز تاڭداۋىن جاساۋىنا مۇمكىندىك. جاستار بەيجاي قالماي, بەلسەندىلىك تانىتىپ, بۇل ۇدەرىستەرگە جاۋاپكەرشىلىكپەن قاراۋى ءتيىس», دەدى ول.
دوڭگەلەك ۇستەل اياسىندا «سۇراق-جاۋاپ» فورماتىندا اشىق پىكىرتالاس ءوتىپ, قاتىسۋشىلار قۇقىقتىق جانە الەۋمەتتىك باستامالار جونىندە وي ءبولىستى, كونستيتۋتسيالىق وزگەرىستەر جاعدايىندا جاستار ساياساتىن ودان ءارى دامىتۋعا قاتىستى ۇسىنىستارىن ورتاعا سالدى.
