ANTIKOR • 13 مامىر، 2022

مەملەكەتتىك ءاۋديتتىڭ لاۋازىمدى تۇلعالارى ۇستالدى

35 رەت كورسەتىلدى

مەملەكەتتىك ساتىپ الۋ بويىنشا اۋديت قىزمەتكەرلەرى دە قىلمىسپەن ۇستالعان. بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ۇلان سارقۇلوۆ ايتىپ بەردى، دەپ حابارلايدى Egemen.kz.

«مەملەكەتتىك ساتىپ الۋداعى قىلمىستار نەگىزىنەن قۇرىلىس، دەنساۋلىق ساقتاۋ، ءبىلىم بەرۋ جانە مادەنيەت سالالارىندا جاسالادى. ماسەلەن، قىزىلوردا وبلىسىندا مادەنيەت باسقارماسىنىڭ باسشىسى بولعان ءابۋوۆا ءجالاڭتوس ءباھادۇر ەسكەرتكىشىن سالۋعا كەدەرگىسىز قاراجات اۋدارعانى ءۇشىن 1 ملن تەڭگە پارا العان. بيىل شىعىس قازاقستان وبلىسى بورودۋليحا اۋدانى اكىمىنىڭ ورىنباسارى بالىقباەۆ 3 جىلعا باس بوستاندىعىنان ايىرىلدى. ول جولدار مەن سۋ وتكىزۋ قۇبىرلارىن جوندەۋ بويىنشا مەملەكەتتىك ساتىپ الۋ شارتتارىن جاساعانى ءۇشىن كاسىپكەردەن 1،8 ملن تەڭگە (10%) قايتارىم العان»، دەدى ۇ. سارقۇلوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

سونىمەن بىرگە وتكەن جىلى اگەنتتىك اتىراۋ وبلىسى اكىمىنىڭ ورىنباسارى ب. حامەنوۆانى اشكەرەلەگەن، ول قالادا ابايعا ەسكەرتكىش ورناتۋ ءۇشىن 4،5 ملن تەڭگە پارا الدى دەپ كۇدىكتەلۋدە.

«قارجىلىق باقىلاۋ ورگاندارىنىڭ دا سىبايلاس جەمقورلىعىن اتاپ ءوتۋ كەرەك. سوڭعى 2 جىلدا اگەنتتىك ىشكى مەملەكەتتىك ءاۋديتتىڭ لاۋازىمدى تۇلعالارىنا قاتىستى 27 قىلمىستى تىركەدى. ولار ادەتتە، مەملەكەتتىك ساتىپ الۋ كونكۋرستارىنىڭ قورىتىندىلارىن قايتا قاراۋ ءۇشىن پارا الىپ كەلگەن. مىسالى، ىشكى مەملەكەتتىك اۋديت ماماندارىنىڭ وزدەرى شاعىم ۇيىمداستىرعان. سودان كەيىن قايتادان وزدەرىنىڭ پايداكۇنەمدىك ماقساتىندا تەكسەرۋ جۇرگىزگەن. ماسەلەن، وتكەن جىلى ءبىر عانا جشس-دان وسىنداي 1600 شاعىم ءتۇسىپ، ونىڭ 900-ءى قاناعاتتاندىرىلعان. ال باسقا ناقتى، شىنايى وتىنىشتەر ەلەنبەگەن»، دەدى ۇ. سارقۇلوۆ.

سوڭعى جاڭالىقتار

ۇقساس جاڭالىقتار