«قازاقستاندىق عالىم ايەلدەر» قوعامدىق بىرلەستىگى عىلىم مەن قوعامدا: زاماناۋي تۇلعا دامۋىنىڭ ەتنومادەني نەگىزدەرى» اتتى رەسپۋبليكالىق عىلىمي-پراكتيكالىق فورۋم ءوتتى. فورۋمعا قاتىسۋشىلار زاماناۋي تۇلعا دامۋىنىڭ قاينار كوزدەرى, ۇلتتىق سانانى قالىپتاستىرۋداعى انا ءتىلىنىڭ, ءتول مادەنيەتىنىڭ جانە وتباسىنىڭ ءرولى, جاس ۇرپاقتىڭ ۇلتتىق قۇندىلىقتارعا دەگەن زاماناۋي كوزقاراسى سىندى ماسەلەلەردى تالقىلاندى.
جيىندا ءسوز العان عىلىم كوميتەتى توراعاسىنىڭ ورىنباسارى دۋمان ورىنبەكوۆ قازاقستاندا 9 738 ايەل وتاندىق عىلىمنىڭ دامۋىنا ءوز سەپتىگىن تيگىزىپ جۇرگەنىن جەتكىزدى.
«قازاقستانداعى عالىم ايەلدەردىڭ ءرولى ءبىز ءۇشىن جوعارى. وتاندىق عىلىمدى دامىتۋ ارقاشان مينيسترلىكتىڭ باستى نازارىندا. ستاتيستيكالىق مالىمەتتەرگە سۇيەنسەك, قازاقستاندا جالپى عالىمداردىڭ 54%-ىن ايەلدەر قۇرايدى. بۇل – جاقسى كورسەتكىش. ەلىمىزدەگى عالىم ايەلدەردىڭ باسىن قوسىپ, وسىنداي شارالار وتكىزەتىن ۇيىمداردىڭ بار بولعانىنا قۋانىشتىمىز. عىلىمداعى ايەلدەر قاۋىمى ارقاشان تالانتتى, كرەاتيۆ جانە ولار وزەكتى ءارى ماڭىزدى جوبالاردى جۇزەگە اسىرىپ كەلەدى. سەرپىندى عىلىمي ازىرلەمەلەر جاساۋعا سىزدەردەگى الەۋەتتىڭ جەتەتىنىنە, ەلىمىزدىڭ ەكونوميكاسىن كوتەرۋگە ۇلەس قوساتىندارىڭىزعا سەنىمدىمىن», دەدى د.ورىنبەكوۆ.
سونداي-اق فورۋمدا «قازاقستاندىق عالىم ايەلدەر» قوعامدىق بىرلەستىگىنىڭ بەس جىلدا اتقارعان جۇمىسى باياندالدى. قازاقستاندىق عالىم ايەلدەر قوعامىنىڭ پرەزيدەنتى تاڭات اياپوۆانىڭ ايتۋىنشا, ۇيىم عىلىمداعى ايەلدەردىڭ ورنى مەن ماڭىزىن ايقىنداپ كورسەتۋ, بولاشاق ۇرپاققا باستى قۇندىلىقتاردى ءارتۇرلى ءىس-شارالار ارقىلى جەتكىزۋدى كوزدەيدى.
«وسكەلەڭ ۇرپاقتىڭ ساناسىنا ۇلتتىق قۇندىلىقتاردى سىڭىرۋگە اتسالىسۋ ءبىزدىڭ مىندەتىمىز دەپ سانايمىن. ەلىمىزدە عالىمدارعا قولداۋ كورسەتىلىپ كەلەدى. ايەل عالىمدار جايلى ەنتسيكلوپەديانىڭ ەكىنشى تومى دايىندالىپ جاتىر, ونى جاستارعا, PhD دوكتورلارعا ارنايمىز. بۇگىنگە دەيىن ماگيسترانتتاردى قوعامدىق بىرلەستىككە تارتۋ ەرتە دەپ ويلاعان ەدىم. بىراق الداعى ۋاقىتتا جاستاردى بىرلەستىككە تارتۋ, قاتارىمىزعا ءارتۇرلى ماماندىق بويىنشا ماگيسترلەردى قوسۋدى جوسپارلاپ وتىرمىز. قوعام مۇشەلەرىنە ۇلكەن ريزاشىلىعىمدى بىلدىرەمىن. بۇكىل الەم قازاقستاندا ايەل عالىمدار بار ەكەنىن ءبىلۋى ءتيىس», دەدى پروفەسسور ت.اياپوۆا.
