دۇنيەجۇزىلىك بانكتىڭ الماتىداعى وكىلدىگىمەن بىرلەسىپ ۇيىمداستىرعان دوڭگەلەك ۇستەلگە ەلىمىزدىڭ جانە الەم ەلدەرىنەن ءبىلىم سالاسىنداعى حالىقارالىق جانە ايماقتىق ساراپشىلار, سونىمەن قاتار اباي ۋنيۆەرسيتەتىنىڭ Honors College جوباسىنىڭ 100 ستۋدەنتى قاتىستى.
ءىس-شارانى دۇنيەجۇزىلىك بانكتىڭ ورتالىق ازياداعى ادامي كاپيتالدى دامىتۋ باعدارلامالارىنىڭ جەتەكشىسى سۋساننا ايراپەتيان جۇرگىزدى. ال جيىندى ۋنيۆەرسيتەت رەكتورى دارحان ءبىلالوۆ اشىپ, ورتالىق ازياداعى ءبىلىم بەرۋدى ترانسفورماتسيالاۋدىڭ ماڭىزىن جانە ەلىمىزدەگى جەتەكشى پەداگوگيكالىق جوعارى وقۋ ورنىنىڭ پاندەميادان كەيىنگى كەزەڭدە ءبىلىم بەرۋ جۇيەسىن قالپىنا كەلتىرۋ بارىسى تۋرالى ايتىپ ءوتتى. رەكتور سونىمەن بىرگە ءبىلىم بەرۋ يننوۆاتسيالارىن ەنگىزۋ تاجىريبەسىن, سونداي-اق الەمنىڭ بارلىق جوعارى وقۋ ورىندارى تاپ بولىپ وتىرعان سالاداعى سىن-قاتەرلەرگە توقتالدى. بۇگىنگى تاڭدا ىنتىماقتاستىق, قاجەتتى اقپاراتپەن الماسۋ, ۇلتتىق جانە شەتەلدىك ۇيىمدار تاراپىنان ءبىر-بىرىنە قولداۋ كورسەتۋ جانە ىنتىماقتاستىق قاجەت ەكەنىن دە اتاپ ءوتتى.
دۇنيەجۇزىلىك بانكتىڭ ءبىلىم بەرۋ سالاسىنداعى جاھاندىق تاجىريبە ءبولىمىنىڭ باسشىسى گارري پاترينوس «ورتالىق ازياداعى ءبىلىم بەرۋ سالاسىنداعى وزگەرىستەر: جاھاندىق پەرسپەكتيۆالار» بايانداماسىندا وسى تاقىرىپتاعى زەرتتەۋ, پاندەميانىڭ ايماق پەن الەم ەلدەرىنىڭ ەكونوميكاسى مەن بىلىمىنە اسەرى تۋرالى ەگجەي-تەگجەيلى ايتىپ بەردى.
دوڭگەلەك ۇستەلگە قاتىسۋشىلار پاندەميادان كەيىنگى ءبىلىم بەرۋ جۇيەسىن قالپىنا كەلتىرۋدىڭ حالىقارالىق تاجىريبەسى جانە وسى ۇدەرىسكە كومەكتەسەتىن ءبىلىم بەرۋدەگى يننوۆاتسيالار, سونداي-اق قازاقستان, قىرعىزستان, تاجىكستان جانە وزبەكستاندا كەزدەسەتىن سالالىق ماسەلەلەردى شەشۋ جولدارىن تالقىلادى. الەۋمەتتىك-ەكونوميكالىق قالپىنا كەلتىرۋ كەزەڭىندەگى ءبىلىم بەرۋ جۇيەسىن ترانسفورماتسيالاۋ مۇمكىندىكتەرى تۋرالى باياندامالار جاساپ, تاجىريبە الماستى.
الماتى
