الدىمەن پرەزيدەنتتىڭ ءسوزىن ەسكە تۇسىرسەك, ق.توقاەۆ 2021 جىلى 25 اقپاندا وتكەن ۇلتتىق قوعامدىق سەنىم كەڭەسىنىڭ وتىرىسىندا ەلىمىزدە ەرەكشە ءبىلىم بەرۋ قاجەتتىلىكتەرى بار بالالار سانى ءوسىپ كەلە جاتقانىن, ولارعا قىزمەت كورسەتەتىن مامانداندىرىلعان ۇيىمداردىڭ جۇمىسىنا قاتىستى نورمالاردىڭ ەسكىرگەنىن جەتكىزدى. «تەكسەرۋدەن ءوتۋ ءۇشىن بالالار ءوز كەزەگىن جارتى جىل كۇتۋگە ءماجبۇر. وسىدان كەيىن ولارعا جان-جاقتى كەشەندى وڭالتۋ قاجەت. بۇل ءۇشىن ءتيىستى مەكەمەلەر جەتىسپەيدى. سوندىقتان وسى سالاداعى نورماتيۆتەردى وڭىرلەردىڭ ەرەكشەلىكتەرىن جانە قازىرگى زامانعى ستاندارتتاردى ەسكەرە وتىرىپ جاڭارتۋ قاجەت. بۇگىندە ءبىر پسيحولوگيالىق-مەديتسينالىق-پەداگوگيكالىق كوميسسيا 60 مىڭ بالانى قامتيدى. كوميسسيا جۇمىسىنىڭ تيىمدىلىگىن ارتتىرۋ ءۇشىن بۇل ءنورماتيۆتى 50 مىڭ بالاعا دەيىن تومەندەتۋ قاجەت. سونداي-اق ەرەكشە قاجەتتىلىكتەرى بار بالالاردى ارنايى پسيحولوگيالىق-پەداگوگيكالىق قولداۋعا مەملەكەتتىك ءبىلىم بەرۋ تاپسىرىسىن ەنگىزۋ كەرەك. بۇل ۇلكەن بيۋدجەتتىك شىعىندارسىز بالالاردى وسى قىزمەتتەرمەن قامتۋدى ەداۋىر ارتتىرۋعا مۇمكىندىك بەرەدى», دەدى ق.توقاەۆ.
مەملەكەت باسشىسىنىڭ تاپسىرماسىنا سايكەس, جۋىردا ءماجىلىستىڭ جالپى وتىرىسىندا تاعى ءبىر ماڭىزدى نورما قابىلداندى. بۇل پمپك (پسيحولوگيالىق-مەديتسينالىق-پەداگوگيكالىق كونسۋلتاتسيالار) اشۋ ءنورماتيۆىن 60-تان 50 مىڭ بالاعا دەيىن وزگەرتۋ تۋرالى بولىپ وتىر. ءبىلىم جانە عىلىم ءمينيسترى اسحات ايماعامبەتوۆ جاڭا نورما قانداي وزگەرىستەرگە اكەلەتىنىن ايتتى. «قازىر 87 پمپك جۇمىس ىستەپ تۇرسا, ەندى ەلىمىزدىڭ بارلىق وڭىرىنەن قوسىمشا تاعى 40-قا جۋىق پمپك اشىلادى. بۇل كەزەك ماسەلەسىن شەشۋگە, بالالاردىڭ ەرەكشە ءبىلىم بەرۋ قاجەتتىلىكتەرىن ەرتە انىقتاۋعا جانە ساپالى باعالاۋعا سەپتىگىن تيگىزەدى. ەستەرىڭىزگە سالا كەتەيىن, ۇلتتىق قوعامدىق سەنىم كەڭەسىنىڭ وتىرىسىندا پرەزيدەنت ۇكىمەتكە وسى ماسەلە بويىنشا شارالار قابىلداۋدى تاپسىرعان بولاتىن. بالالار جىلى اياسىندا وزەكتى جانە ۇزاق ۋاقىت بويى شەشىمىن تاپپاعان ماسەلەلەردى شەشۋگە باعىتتالعان بىرقاتار جاڭا باستاما ىسكە اسىرىلادى», دەدى مينيستر ا.ايماعامبەتوۆ.
وقىرماندارعا تۇسىنىك بەرە كەتەيىك, پمپك – دامۋىندا پروبلەماسى بار بالالاردى وقىتۋدىڭ ءتۇرى مەن نىسانىن انىقتاۋ كەزىندە ساراپتامالىق قىزمەت فۋنكتسياسىن اتقاراتىن مەملەكەتتىك مەكەمەلەر. دامۋىنداعى كەمشىلىگى سالدارىنان ءبىلىم بەرۋ ۇيىمدارىندا وقي المايتىن بالالاردى تەكسەرەدى. ونىڭ قۇرامىنا كەڭەس بەرۋشى ماماندار: پسيحونەۆرولوگتەر, پسيحولوگتەر, لوگوپەد-دەفەكتولوگتەر, الەۋمەتتىك پەداگوگتەر كىرەدى.
