قازاقستان دەلەگاتسياسىنىڭ يزرايلگە ساپارى بارىسىندا استانا مەديتسينا ۋنيۆەرسيتەتى بازاسىندا جاڭا سيمۋلياتسيالىق ورتالىق قۇرۋ جانە ونى دامىتۋ تۋرالى مەموراندۋمعا قول قويىلدى.
«سيمۋلياتسيالىق ورتالىق دەگەنىمىز - بولاشاق دارىگەرلەر مەديتسينالىق ترەناجەرلاردا پراكتيكالىق بىلىكتەرى مەن داعدىلارىن شىنايى ومىرگە بارىنشا جاقىن جاعدايلاردا پىسىقتايتىن ورىن», دەدى استانا مەديتسينا ۋنيۆەرسيتەتىنىڭ باسقارما توراعاسى-رەكتورى كامالجان نادىروۆ.
رەكتوردىڭ پىكىرنشە استمۋ بازاسىندا زاماناۋي سيمۋلياتسيالىق ورتالىق قۇرۋ دارىگەر مەن مەدبيكەلەردى وقىتۋ ساپاسىن جوعارى دەڭگەيگە كوتەرۋگە مۇمكىندىك بەرمەك.
قازىرگى تاڭدا يزرايلدىك «شيبا» مەديتسينالىق ورتالىعى بازاسىنداعى سيمۋلياتسيالىق ورتالىق ۇزدىك بولىپ تابىلادى, ونىڭ كونسۋلتاتيۆتىك قولداۋىمەن الەمنىڭ كوپتەگەن جەتەكشى ۋنيۆەرسيتەتتەرىندە وسىنداي سيمۋلياتسيالىق ورتالىقتار قۇرىلعان.
«شيبا» مەدورتالىعىندا مەديتسينالىق ءبىلىم بەرۋدە سيمۋلياتسيالىق وقىتۋ جۇيەسى العاش رەت قولعا الىنعان جانە بۇگىندە ول دارىگەر, مەدبيكە جانە باسقا دا مەديتسينالىق كادرلاردى دايارلاۋدىڭ مىندەتتى شارتى بولىپ تابىلادى.
استمۋ باسشىلىعىنىڭ يزرايلگە ءىسساپارى بارىسىندا سيمۋلياتسيالىق ورتالىقتى قۇرۋ جانە پايدالانۋ, ونىڭ قىزمەت ستاندارتتارى مەن وقىتۋ حاتتامالارىن ازىرلەۋ, ينفراقۇرىلىمدى دامىتۋ, كلينيكالىق ستسەناريلەر بازاسى مەن قىزمەتكەرلەر شتاتىن قالىپتاستىرۋ سەكىلدى بىرقاتار ماسەلەلەر تالقىلاندى.
ءيزرايلدىڭ دەنساۋلىق ساقتاۋ مينيسترلىگى حالىقارالىق ىنتىماقتاستىق دەپارتامەنتىنىڭ ديرەكتورى اشەر سالمونمەن كەزدەسۋ اياسىندا سول ەلدىڭ دەنساۋلىق ساقتاۋ مينيسترلىگى استانا مەديتسينا ۋنيۆەرسيتەتىنىڭ ديپلومىن تانۋى ماسەلەسى دە قاراستىرىلدى.
توعانبەك ايانا
