كونكۋرستا جەڭىپ شىققان جوبانىڭ ءبىرى – كۇرىش قالدىقتارىن وڭدەۋ بارىسىندا الىنعان بيوتىڭايتقىشپەن توپىراقتى قۇنارلاندىرىپ, داقىل ونىمدىلىگىن ارتتىرۋعا باعىتتالعان. ونى حيميا عىلىمدارىنىڭ كانديداتى نۇرلىبەك احاتاەۆ باستاعان عالىمدار توبى جاساپتى. وسىمدىكتەردى قورعاۋ قۇرالدارىن, بيوتىڭايتقىشتار ازىرلەۋ, توپىراقتىڭ قۇنارلىلىعى مەن سيپاتتامالارىن جاقسارتۋ سالالارىن زەرتتەپ جۇرگەن جاس عالىم 70-تەن اسا عىلىمي جۇمىس اۆتورى.
– يننوۆاتسيالىق جوبا ارقىلى كۇرىش قالدىقتارىن قايتا وڭدەۋ كەزىندە الىنعان بيوتىڭايتقىشتى پايدالانۋ ەسەبىنەن توپىراق قۇنارلىلىعىن ارتتىرىپ, كوكونىس جانە باقشا ونىمدىلىگىن ەسەلەۋدىڭ جولدارىن دالەلدەيمىز. قارجىلاي قولداۋعا يە بولعان يدەيانى قارماقشى اۋدانى تۇرماعانبەت اۋىلىنداعى «تۇرماعانبەت» جشس-دە ىسكە اسىرۋ جوسپارلانىپ وتىر, – دەيدى ن.احاتاەۆ.
جوبا ناتيجەسى ايماقتاعى ورگانيكالىق ەگىنشىلىك تۇجىرىمداماسىنىڭ دامۋىنا اسەر ەتپەك. جالپى عالىمدار ەگىن شارۋاشىلىعىن سۋ تاپشىلىعى جانە كليماتتىڭ وزگەرىس جاعدايىنا بەيىمدەۋ تەحنولوگياسىنا بەت بۇرۋىمىز كەرەكتىگىن ايتادى.
– سۋ تاپشىلىعىنان كۇرىش القاپتارىن قىسقارتۋ تۋرالى ماسەلە ءجيى كوتەرىلىپ ءجۇر. ءبىزدىڭ جاس عالىمدار جاساپ وتىرعان جوبانىڭ نەگىزگى ماقساتى توپىراق قۇنارىن ارتتىرۋ ارقىلى ەگىستىك كولەمىن ۇلعايتپاي-اق كوپ ءونىم الۋدى كوزدەيدى. وسى ارقىلى اۋىلشارۋاشىلىق داقىلدارىنىڭ ونىمدىلىگىن ۇلعايتۋ باستاماسى وندىرىسكە ەنگىزىلەدى. وسىنداي عىلىمي-زەرتتەۋ جۇمىستارى ارقىلى تىڭ ادىستەردى ىسكە اسىرۋىمىز كەرەك, – دەيدى تەحنيكا عىلىمدارىنىڭ دوكتورى, اگروبيولوگيالىق ورتالىقتىڭ باس عىلىمي قىزمەتكەرى سەرىكباي ومىرزاقوۆ.
بۇل جوبالار بويىنشا جۇمىستار وسى جىلدىڭ سوڭىنا دەيىن جۇرگىزىلمەك. بيىل گرانتتىق قارجىلاندىرۋ كونكۋرسىنا ۋنيۆەرسيتەتتەن 17 جوبا ۇسىنىلىپتى. قازىر ىرىكتەۋدەن وتكەن 6 جاس عالىمنىڭ جوباسى ۇلتتىق عىلىمي كەڭەستىڭ قاراۋىندا جاتىر.
قىزىلوردا وبلىسى
