ول – بىردە ەسەنقۇل جاقىپبەكتىڭ ولەڭىندەگى ء«بىزدىڭ ەلدىڭ جىگىتتەرى», بىردە ەسەنعالي راۋشانوۆتىڭ «مۇراتبەرگەنى». ەسەنقۇلدىڭ ايتقانى – 1989-1990 جىلدارداعى الماعايىپ زاماندا ەلدى باسىنىپ, بيلەپ-توستەگىسى كەلگەندەرگە سەس كورسەتىپ, ەلدىڭ, جەردىڭ يەسى كىم ەكەنىن تانىتقان قازاقتىڭ باتىر ۇلدارى. ۇلتتىق ساناسى جوعارى اتقامىنەر ازاماتتار. قانداي جولمەن بولسا دا ءوز ۇلتىنىڭ جەل جاعىنان پانا بولا العان قازاق جىگىتتەرى. قاي زاماننان سولاي بولعان. اسپاعان, تاسپاعان, بىرەۋدىڭ الا ءجىبىن باسپاعان. سىرتتان كەلگەندەرمەن دە سىيلاسا بىلگەن. باستىسى, سىيلاسا بىلگەن. بىراق باسىندىرماعان. كەيىن كەلە-كەلە ۇزىلىڭكىرەپ بارا جاتقانداي سول ءۇردىس. بىراق الگىندەي ازاماتتاردىڭ زامانىندا ەرلىك كورسەتكەندەرى تۋرالى كوپ ايتىلا بەرمەيدى. وكىنىشتىسى دە سول. ولار تۋرالى ايتۋدىڭ زامانى ەندى كەلەتىن سياقتى. وتكەندە قاراسام, وسى ء«بىزدىڭ ەلدىڭ جىگىتتەرى» ءانىنىڭ تۋىنا سەبەپكەر بولعان ازاماتتاردىڭ اتى اتالىپتى. ەلدىڭ ىرگەسى سوگىلمەۋى جولىندا ەرلىك كورسەتكەندەردىڭ ەسىمى اتالماي كەتسە نە بولعانى؟
اۋىلدى ۇستاپ قالعان, جالپى, قازاقتى ۇستاپ قالعان وسى جىگىتتەر, نەگىزى. قازاقتى ۇستاپ قالعان دەگەنىم سول قازاقىلىق, مىڭداعان جىلدار بويى قالىپتاسقان ۇلتتىڭ بولمىس-ءبىتىمى, ءتول قاسيەتتەرى دە. ونداي قاسيەتتەر ولگەن كۇنى نە بولاتىنىن ويلاۋدىڭ ءوزى قيىن.
اۋىلداعى قارا قازاقتى (نەگىزگى قازاق) ساقتاپ تۇرعان ەكىنشى ءتۇرلى جىگىتتەر – ەسەنعالي راۋشانوۆتىڭ كەيىپكەرى مۇراتبەرگەن ەكەنى تاعى راس. ول تۋرالى كەزىندە بەلگىلى پۋبليتسيست باۋىرجان وماروۆ جەرىنە جەتكىزىپ جازعان-دى. ء«وز جۇمىسىن بىلەتىن, ءوز جونىمەن جۇرەتىن, ەلتەڭ-سەلتەڭمەن ونشا شارۋاسى جوق, كوپ سوزگە ۇيىرسەكتىگى دە شامالى مۇنداي كەيىپكەر كەز كەلگەن اۋىلدان تابىلاتىن. ءالى كۇنگە دەيىن مۇراتبەرگەندەر قازاق اۋىلىنىڭ دىڭگەگىن ۇستاپ تۇر. سول مۇراتبەرگەندەر ۋ-شۋى كوپ قالاعا مۇلدە كوندىگە الماي ءجۇر. ول – قايمانا قازاق. ول – اۋىلدىڭ التىن قازىعى. ول – دالانىڭ داڭعايىر ديحانى. ول سىلدىراپ اققان ارىقتىڭ دا, ارقىراپ اققان سارقىرامانىڭ دا مەحناتىن تالايدان تارتىپ كەلە جاتقان شاعىن بولىمشەنىڭ شيراق مۇرابى», دەيدى باۋىرجان اعامىز.
ءيا, قاي اۋىلدى بولسىن ۇستاپ وتىرعان وسىنداي ەلدىڭ ازاماتتارى, سول توپىراققا كىندىگىنەن بايلانعان جەردىڭ ازاماتتارى تۇرعاندا, قازاق تا جاساي بەرەدى دەگەن ويدامىز.
