Facebook الەۋمەتتىك جەلىسىندە «عىلىم – كۇش» دەيتىن عىلىمي توپ بار. وعان 9 مىڭ 300-دەن اسا ادام جازىلعان. اتالعان توپتا عىلىمي جاڭالىقتار مەن زەرتتەۋلەردىڭ قىسقاشا مازمۇنى جازبا رەتىندە بەرىلىپ وتىرادى. جوبا جەتەكشىسى, حيميا عىلىمدارىنىڭ PhD دوكتورى جەكسەن توقتارباي الەۋمەتتىك جەلىدەگى تانىمدىق ماتەريالداردى قوعامعا كەڭىنەن تاراتۋ ماقساتىندا سايت اشقانىن ايتتى.
– سايت تابىس تابۋ ءۇشىن ەمەس, بار بولعانى عىلىمي جاڭالىقتاردى, عىلىمدى, عالىمداردىڭ ەڭبەگىن كەڭىنەن ناسيحاتتاۋ ماقساتىندا اشىلدى. كوممەرتسيالىق ماقساتتا بولماعاندىقتان, ارزان اتاق ءۇشىن اردان بەزىپ كورىلىم جينامايمىز. ازىرگە مۇنى ءوزىم نەگىزگى جۇمىسىمنان بولەك جۇرگىزىپ ءجۇرمىن. سوندىقتان كۇن سايىن سايت جاڭارىپ تۇرادى دەپ ايتا المايمىن. دەگەنمەن عالىمداردان قىزىقتى ماتەريالدار كوپتەپ كەلەدى, سونى ىرىكتەپ, پايدالىسىن حالىققا ۇسىنامىن. بۇل – مەن ءۇشىن جاي عانا ازاماتتىق ءىس. ايتپەسە بۇعان ەشقانداي جالاقى المايمىن. نەگىزى وسىعان دەيىن عىلىمي جاڭالىقتاردى «عىلىم – كۇش» توبىندا جاريالاپ كەلگەن ەدىم. بىراق الەۋمەتتىك جەلىدەگى ماتەريالدار گۋگلدەن ىزدەگەندە وڭاي تابىلمايدى ەكەن. جانە كەرەك كەزدە جەلىدەن بۇرىنعى جازبالاردى تابۋ قيىن. سول سەبەپتى ءبارىن ءبىر جەرگە جيناقتاپ, ىزدەگەن ادامعا وڭاي تابىلاتىن قور رەتىندە سايت اشۋدى ءجون كوردىك, – دەيدى ج.توقتارباي.
جوبا جەتەكشىسىنىڭ ايتۋىنشا, gylym.kz سايتىندا تەك قانا قازاق تىلىندە عىلىمي جاڭالىقتار جاريالانادى. ساياساتقا, ساياسي وزگەرىستەرگە, رەيتينگ قۋعان جەڭىل ونىمدەرگە, شوۋعا, جارنامالارعا جول بەرىلمەيدى. دەگەنمەن بارلىق سايت قولدانۋشىدان, عىلىمعا ىنتاسى بار ازاماتتاردان, عىلىمي قاۋىمداستىقتان پايدالى, عىلىمي اقپاراتتار قابىلداۋعا اشىق.
– سايتتىڭ جۇمىسىنا عىلىمعا جاۋاپتى مەملەكەتتىك ۇيىمداردان ازىرگە قولداۋ-كومەك بەرىلگەن جوق. جالعىز ءوزىم قوسىمشا جۇمىس رەتىندە اتقارىپ وتىرعاندىقتان, كوپ ماتەريالعا ۇلگەرمەۋىم مۇمكىن. سول سەبەپتى قازاقشا عىلىمي جاڭالىقتار بولسا, jeksen.toqtarbay@gmail.com ەلەكتروندى پوشتاسىنا جولداپ, سايتتى پايدالى اقپاراتپەن قامتۋعا قولداۋ ءبىلدىرۋدى سۇرايمىن. حالىققا ەڭ اۋەلى ءبىلىم كەرەك. ءبىلىم الۋ ءۇشىن الدىمەن عىلىم-بىلىمگە دەگەن دۇرىس تۇسىنىك پەن عىلىمنىڭ ماڭىزىن تۇسىندىرەتىن قۇرال قاجەت بولىپ تۇر. سول جوقتىڭ ورنىن تولتىرۋعا نيەتتەنىپ وتىرمىز, – دەدى gylym.kz سايتىنىڭ جەتەكشىسى.
