بقو سوتىنىڭ ءباسپاسوز قىزمەتى ءمالىم ەتكەنىندەي, ا.ابۋلحايروۆ قر قك 24-بابى 3-بولىگى - 190-بابى 3-بولىگى 2-تارماقشاسىنا سايكەس ايىپتى دەپ تانىلىپ, وعان پارانىڭ 15 ەسە ەسەلەنگەن كولەمىندە 7,5 ملن تەڭگە ايىپپۇل سالىندى.
سونىمەن قاتار ول مەملەكەتتىك قىزمەتتە جانە باسقا ورگانداردا لاۋازىمدى قىزمەت اتقارۋ قۇقىعىنان ءومىر بويىنا ايىرىلدى. پوليتسيا مايورى شەنىمەن دە قوش ايتىستى. سوت تالقىسىندا ءمالىم بولعانىنداي, بيىلعى 5 اقپاندا چاپاەۆ-جالپاقتال اۆتوجولىندا ن.ياۆورسكي ايداپ كەلە جاتقان «گاز-2752» اۆتوكولىگى توقتاتىلعان. جۇرگىزۋشىدەن اراق ءيسى شىعىپ تۇرعان ءارى تەكسەرە كەلگەندە, ول كولىك جۇرگىزۋ قۇقىعىنان ايىرىلعان بولىپ شىقتى.
ن.ياۆورسكيگە قاتىستى قر قك 346-بابى 1-بولىگىنە سايكەس قىلمىستىق ءىس قوزعالىپ, تەرگەۋ امالدارى باستالعان. ول مەديتسينالىق كۋالاندىرۋدان باس تارتقاننان كەيىن اۆتوكولىك ارنايى تۇراققا قويىلىپ, ءوزى اقجايىق پوليتسيا بولىمىنە جەتكىزىلگەن. اۋداندىق پوليتسيا ءبولىمى باستىعىنىڭ ورىنباسارى ا.ابۋلحايروۆ قىزمەت بابىن پايدالانا وتىرىپ, پايدا تابۋ ماقساتىمەن ن.ياۆورسكيگە اتالعان قىلمىستىق ءىس بويىنشا بەلگىلى ءبىر كولەمدە سىياقى بەرگەن جاعدايدا وڭ شەشىم شىعارۋعا مۇمكىندىك بار ەكەندىگىن جەتكىزگەن. سوسىن ءىستى قاراپ جاتقان تەرگەۋشى م.ورىنعالي ۇلىنا جۇرگىزۋشىنىڭ قانىندا الكوگول بار ەكەندىگىن انىقتاۋ ءۇشىن قان ۇلگىسىن الۋ جونىندە اۋىزشا نۇسقاۋ بەرگەن.
7 اقپاندا ا.ابۋلحايروۆ انىقتاۋشى م.حامزينگە قىلمىستىق ءىس ماتەريالدارىن قابىلداپ, قان ۇلگىسىنە قاتىستى سوت حيميالىق-توكسيكولوگيالىق جانە ناركولوگيالىق ساراپتاما تاعايىنداۋدى تاپسىرعان. كەشكىسىن ابۋلحايروۆتىڭ تالاپ ەتۋىمەن ياۆورسكي ونىڭ كابينەتىنە كەلگەن. پوليتسيا قىزمەتكەرى قىلمىستىق ءىستى توقتاتىپ, اۆتوكولىكتى ارنايى تۇراقتان الۋ ءۇشىن 500 مىڭ تەڭگە كولەمىندە پارا تالاپ ەتكەن. باسقا مۇمكىندىگى جوقتىعىن سەزىنگەن ياۆورسكي بۇل زاڭسىز تالاپقا كەلىسكەن.
ابۋلحايروۆ 10 اقپان كۇنى سوت حيميالىق-توكسيكولوگيالىق ساراپتاماعا سايكەس ياۆورسكيدىڭ قانىندا سپيرت بولماعاندىقتان, قىلمىستىق ءىس قىسقارتىلۋعا جاتاتىنىن بىلە وتىرىپ, باجاسى ا.يمانعازيەۆكە ايىپتالۋشىمەن كەزدەسىپ, 500 مىڭ تەڭگەنى الۋدى وتىنگەن. الايدا ا.يمانعازيەۆ كەزدەسكەن كەزدە ن.ياۆورسكي تالاپ ەتىلگەن قارجىنى جيناي الماعانىن ايتقان.
بۇدان كەيىن دە ا.ابۋلحايروۆ اقشا تالاپ ەتۋىن قويماعان. 12 اقپان كۇنى ا.يمانعازيەۆ ا.ابۋلحايروۆقا بەرۋ ءۇشىن ن.ياۆورسكيدەن 500 مىڭ تەڭگەنى الىپ, بقو بويىنشا سىبايلاس جەمقورلىققا قارسى قىزمەت قىزمەتكەرلەرىنىڭ قولىنا تۇسكەن.
وسىلايشا, ا.ابۋلحايروۆ قىلمىستىق وي-ارەكەتىن وزىنە قاتىستى ەمەس جاعدايلار بويىنشا اياعىنا دەيىن جەتكىزە الماعان. باستى سوت تالقىسىندا ا.ابۋلحايروۆ كىناسىن مويىنداپ, باستاپقىدا اقشا الۋ ويىندا بولماعانىن, تەك ساراپتاما قورىتىندىسى شىققاننان كەيىن ياۆورسكيدى الداۋعا بەكىنگەنىن جەتكىزدى.
سوت ۇكىمى زاڭدى كۇشىنە ەنگەن جوق.
