كوروناۆيرۋس • 27 ءساۋىر، 2022

ەلوردالىق پەدياتر ەكپەنىڭ ماڭىزدىلىعىن ايتتى

ەلوردادا 24-30 ءساۋىر ارالىعىندا «ۇزاق ءومىر» ۇرانىمەن ەۋروپالىق يممۋنداۋ اپتالىعى ءوتىپ جاتىر. ءىس-شارانىڭ ماقساتى – ۆاكتسينانى الۋدىڭ ماڭىزدىلىعىن جانە ونىڭ قولجەتىمدىلىگىن كورسەتۋ، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

گاۋھار قاپاش

«ۆاكتسينالار بىزگە اسقىنۋسىز جانە اۋرۋسىز ءومىر سۇرۋگە، تولىققاندى سالاۋاتتى ءومىر سۇرۋگە مۇمكىندىك بەرەدى. ەكپە ارقىلى الدىن الۋعا بولاتىن اۋرۋلار جىل سايىن كۇشەيىپ بارادى، سالدارىنان اسقىنۋلارعا، ءتىپتى جاس بالالاردىڭ مەزگىلسىز ولىمىنە اكەلەدى. قازىرگى ۋاقىتتا يممۋنيزاتسيانىڭ بالاماسى جوق دەپ ايتۋعا بولادى»، دەيدى قالانىڭ شتاتتان تىس پەدياتر دارىگەرى دانا ابىلعازينا.

ونىڭ ايتۋىنشا، يممۋنداۋ ماسەلەسى تەك مەديتسينا قىزمەتكەرلەرگە مىندەتتەلمەيدى جانە مىندەتتەلمەۋى كەرەك. بۇل ءاربىر ادامنىڭ جەكە جاۋاپكەرشىلىگى.

«بۇقارالىق اقپارات قۇرالدارى ارقىلى ءبىز تەك حابارلاپ، ءتۇسىندىرىپ بەرە الامىز. ال ۆاكتسينانى الۋ ءاربىر ادام ءۇشىن قاجەتتىلىك بولىپ قالا بەرەدى. سوڭعى ۋاقىتتارى ەكپەنىڭ قاۋىپسىزدىگى تۋرالى پىكىرلەر كوبەيدى. دەگەنمەن جالعان فاكتىلەر مەن ماتەريالدار دا جاريالانىپ تۇرادى، تيىسىنشە تەرىس ماعىنادا قىزۋ تالقىلانىپ جاتادى. بۇل پىكىرلەر ورىنسىز، ويتكەنى ول ناقتى دالەلدەنبەگەن نەمەسە بىرەۋدىڭ جەكە پىكىرىنە عانا نەگىزدەلگەن»، دەيدى مامان.

ءسوز اراسىندا بۇل قوعامدا ۇلكەن رەزونانس تۋدىراتىنىن، سالدارىنان جۇرت اراسىندا نەگىزسىز قورقىنىش پايدا بولاتىنىن ايتتى.
«ۆاكتسينا العاننان كەيىنگى كەز كەلگەن رەاكتسيا ينفەكتسيالاردىڭ اسقىنۋىنان الدەقايدا جەڭىل. ول اۋرۋدىڭ سالدارىمەن سالىستىرۋعا كەلمەيدى. مىسالى، قىزامىق اۋرۋىن الىڭىز. بالالىق شاقتا اۋرۋ جەڭىل وتكەنمەن جۇكتى ايەلدەر ءۇشىن وتە قاۋىپتى بولىپ ەسەپتەلەدى. ەگەر ايەل قىزامىقپەن اۋىرسا، بۇل جاتىرداعى ءسابيدىڭ تۋا بىتكەن دەفورماتسياسىنا، تۇسىك تاستاۋىنا، سول سياقتى ءولى تۋىلۋىنا اكەلۋى مۇمكىن. نەمەسە پوليوميەليت اۋرۋى ءپاراليچتىڭ دامۋىنا اكەلۋى، ناتيجەسىندە ادام مۇگەدەك بولىپ قالۋى مۇمكىن. ەگەر ديفتەريا پايدا بولسا، اۋرۋدان كەيىنگى ءولىم جاعدايىنىڭ تاۋەلدىلىگى وتە جوعارى بولماق. بۇل ءتىزىمدى ارى قاراي دا جالعاستىرا بەرۋگە بولادى. كەز كەلگەن اتا-انا ءوز بالاسىنىڭ دەنساۋلىعى ءۇشىن جاۋاپتى، سوندىقتان ۋاقىتىلى ەكپە الۋدىڭ قانشالىقتى ماڭىزدى ەكەنىن ءتۇسىنۋى كەرەك. ۆاكتسينا بالاڭىزعا ەشقانداي زيان تيگىزبەيدى، تەك اۋرۋدىڭ اسقىنۋىنىڭ نەمەسە ءولىمنىڭ الدىن الادى»، - دەپ قوستى دانا ابىلعازينا.

قالالىق دەنساۋلىق ساقتاۋ باسقارماسىنىڭ مالىمەتىنشە، ەلوردادا 18 جاسقا دەيىنگى 400 مىڭعا جۋىق بالا تۇرادى. 2021 جىلدىڭ قورىتىندىسى بويىنشا 1 جاسقا دەيىنگى بالالاردىڭ 97% قىزىلشاعا، قىزامىققا، پاروتيتكە قارسى پروفيلاكتيكالىق ەكپە الدى. الايدا 2 جاسقا دەيىنگى بالالاردى كوكجوتەلگە، ديفتەرياعا جانە سىرەسپەگە قارسى پروفيلاكتيكالىق ەكپەمەن قامتۋ 84،6%-دى عانا قۇرادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز