قر باس پروكۋراتۋراسى 1-ءشى قىزمەت باستىعىنىڭ ورىنباسارى ەلدوس قيلىمجانوۆتىڭ ايتۋىنشا, 5 قاڭتار كۇنى ن. ەسىمدى ازامات ءبىر توپ اداممەن بىرگە الماتى قالاسى اۋەجايىنىڭ ۇشۋ-قونۋ جولاعىنىڭ جارىعىن ءوشىردى.
«ول ءوزىنىڭ ارەكەتىمەن ستراتەگيالىق وبەكتىنىڭ قىزمەتىن توقتاتتى, ناتيجەسىندە ۇشاقتار جولاۋشىلارمەن ۇشىپ كەتە المادى جانە توكتان اجىراتىلعان ۇشۋ-قونۋ جولاعىندا 10 ساعاتتان ارتىق تۇرۋعا ءماجبۇر بولدى. وسى ۋاقىتتا قارۋلى توپ الماتى اۋەجايىنىڭ عيماراتىن قيراتىپ, تونادى», دەدى قيلىمجانوۆ ورتالىق كوممۋنيكاتسيالار قىزمەتىندە وتكەن بريفينگتە.
قازىرگى كەزدە «ن»-ءنىڭ ءىس-ارەكەتتەرى قىلمىستىق كودەكستىڭ 255-بابى تەرروريزم اكتىسى بويىنشا سارالانىپ جاتىر. ونىڭ قىلمىسى جينالعان دالەلدەمەلەرمەن راستالادى.
«قاڭتار وقيعاسىنىڭ ۇيىمداستىرۋشىلارى مەن قاتىسۋشىلارىن انىقتاۋ جانە ولاردى جاۋاپكەرشىلىككە تارتۋ جۇمىستارى جالعاسۋدا», دەدى قيلىمجانوۆ.
ايانا توعانبەك
