ايەلدەر كۇرەسىنەن جارىس اينالما جۇيە بويىنشا وتكەندىكتەن, 68 كيلو سالماقتاعى ءمادينا باقبەرگەنوۆاعا توكيو وليمپياداسى مەن ازيا ويىندارىنىڭ قولا جۇلدەگەرى, بىلتىرعى الەم جانە قۇرلىق چەمپيونى مەيريم جۋمانازاروۆامەن ەكى رەت كۇش سىناسۋعا تۋرا كەلدى. العاشقى اينالىمدا قىرعىز قىزى 5:0 ەسەبىمەن جەڭىسكە جەتتى. ودان كەيىن ەكى باسەكەدە ايقىن باسىمدىق تانىتقان قوس مىقتى اقتىق ايقاستا قايتا جولىقتى. بۇل جولى باقبەرگەنوۆا تاباندىلىق تانىتىپ, جەڭىستى ايگىلى قارسىلاسىنىڭ ۋىسىنان سوڭعى سەكۋندتاردا ج ۇلىپ اكەتتى – 3:2. ءسويتىپ, ازيا چەمپيوناتتارىندا وسىعان دەيىنگى ەكى رەت جۇلدەگەرلەر ساناتىنان كورىنگەن ءمادينا بۇل جولى التىننان القا تاقتى.
فينالدىق سايىس اياقتالعان بەتتە: «ەكى اپتا بويى ءبىز موڭعوليادا وقۋ-جاتتىعۋ جيىنىن وتكىزدىك. باپكەرلەرمەن بىرگە وسى جەردە ءار قارسىلاسىمىزدى ابدەن زەرتتەپ, ولارعا قانداي ءادىس-ءتاسىل قولداناتىنىمىزدى جاقسىلاپ تۇرىپ پىسىقتادىق. ناتيجەسىندە, ۇستانعان تاكتيكامىز ءوز جەمىسىن بەرىپ, كوزدەگەن ماقساتىما قول جەتكىزدىم. بىراق بۇل تابىسقا توقمەيىلسۋگە بولمايدى. الدا ءبىزدى كوپتەگەن بايراقتى باسەكە كۇتىپ تۇر. سونىڭ بارلىعىنا دۇرىستاپ دايارلانۋمىز كەرەك», دەدى م.باقبەرگەنوۆا.
قازاقستان قۇراماسىنىڭ قورجىنىنداعى ازيا چەمپيوناتىنىڭ ەكىنشى التىنى دا باقبەرگەنوۆتەر اۋلەتىنىڭ ەنشىسىندە. ءمادينانىڭ سىڭارى ءجاميلانىڭ ەسىمى دە جانكۇيەرلەرگە جاقسى تانىس. ول – 2019 جىلى نيۋ-دەليدە ازيا چەمپيونى اتانىپ, 2021 جىلى وسلوداعى الەم چەمپيوناتىندا كۇمىس مەدالدى موينىنا ىلگەن ەلىمىزدەگى ەڭ بەلدى بالۋانداردىڭ ءبىرى. دەسەك تە وعان ۇلانباتىردا جەڭىس تۇعىرىنا كوتەرىلۋ وڭاي بولمادى. قازاق قىزى ۇندىستاندىق نيككي نيككي جانە وزبەكستاندىق سۆەتلانا وكنازاروۆانى ويسىراتا ۇتقانىمەن, موڭعوليالىق دااۆاناسان ەنح امار مەن ۇندىستاندىق سۋميرە نيكۋراعا قارسى ءبىراز تەر توگۋىنە تۋرا كەلدى. بۇل بەلدەسۋلەردىڭ ەكەۋىندە دە تەڭ ەسەپ تىركەلدى. دەسەك تە بىردە كەسەك ءادىس جاساپ, ەندى بىردە سوڭعى ۇپايدى ەنشىلەگەن ءمادينانىڭ مىسى باسىم بولىپ, ول دا التىننان القا تاقتى. ءسويتىپ, الماتى وبلىسىنىڭ جامبىل اۋدانىنا قاراستى قاراقاستەك اۋىلىنىڭ تۇرعىندارى ناۋقاننۇر مەن گۇلميرانىڭ قىزدارى ازيا چەمپيونى اتانىپ, كۇللى الاش جۇرتىن قۋانتتى.
ەڭ اۋىر سالماقتا كۇرەسكەن گۇلمارال ەركەباەۆا موڭعول جانە وزبەك سپورتشىلارىن ەش قينالماي ۇتقانىمەن, ازيا چەمپيونى, جاستار اراسىنداعى (U-23) الەم بىرىنشىلىگى مەن جاسوسپىرىمدەردىڭ دۇنيەجۇزىلىك وليمپياداسىنىڭ قولا جۇلدەگەرى جاپونيالىق يۋكا كاگاميگە ءالى جەتپەدى. ءۇشىنشى ورىن ءۇشىن سايىستا گۇلمارال موڭعوليالىق ايۋنجارگال گانباتتان ايلاسىن اسىردى. 53 كيلو سالماق دارەجەسىندەگى جۇلدىز ەشىموۆا دا ءدال سونداي جولمەن ءوتىپ, قولا مەدال ءۇشىن باسەكەدە وزبەكستاندىق اقتەڭگە كەۋنيمجاەۆانى قاپى قالدىردى. ءبىر عاجابى, سوناۋ 2007 جىلى وتانداسىمىزدىڭ العاش رەت سارى قۇرلىقتىڭ تەڭدەسسىزى اتانعانى ەسىمىزدە. ول كەزدە جۇلدىز نەبارى 19 جاستا ەدى. مىنە, ەندى ارادا 15 جىل وتكەن سوڭ ەشىموۆا قايتا سول بەلەستەن كورىندى. سول ارالىقتا جۇلدىز قۇرلىق بىرىنشىلىگىندە التى رەت جۇلدەگەرلەر قاتارىنان كورىنىپ, الەم چەمپيوناتى مەن ازيا ويىندارىندا كۇمىس پەن قولا مەدالداردى ەنشىلەگەنىن دە ايتا كەتۋگە ءتيىسپىز.
وكىنىشكە قاراي, ايگۇل ءنۇرالىم (50 كيلو), التىن شاعاەۆا (55 كيلو), نۋليفار رايموۆا (57 كيلو), ديانا قايۋموۆا (59 كيلو), اياۋلىم قاسىموۆا (62 كيلو) جانە داريا ابەن (65 كيلو) بۇل جارىستا بىلگەندەرىنەن جاڭىلىپ, ۇزدىكتەر ساناتىنا قوسىلا المادى.
وسىلايشا, ايەلدەر كۇرەسىنەن وتكەن جارىستا 10 باس جۇلدەسىنىڭ جەتەۋىن جاپون بالۋاندارى ولجالادى. ارينە, وعان تاڭدانۋعا بولمايدى. ويتكەنى كۇنشىعىس ەلىنىڭ قىزدارى تەك ازيادا عانا ەمەس, كۇللى الەمدە ەڭ ۇزدىك كوماندالار ساناتىندا. ەكى التىندى قازاق قىزدارى يەلەنسە, قىرعىز قىزى ءبىر مارتە توپ جاردى. ال وزگە مەملەكەتتىڭ وكىلدەرى تەك كۇمىس پەن قولا مەدالداردى قاناعات تۇتتى.
سەنبى كۇنى ەركىن كۇرەس شەبەرلەرى جارىس جولىنا شىقتى. 57 كيلو سالماقتاعى راحات قالجان سيريالىق ەكاناياكا مۋديانسەلاگە گايان كاتۋرانگانى (10:0), وزبەكستاندىق گۋلومجون ابدۋللاەۆتى (6:1) جانە قىرعىزستاندىق الماس سمانبەكوۆتى (6:5) سان سوقتىرىپ, فينالدا توكيو وليمپياداسىنىڭ كۇمىس جانە نۇر-سۇلتانداعى الەم چەمپيوناتىنىڭ قولا جۇلدەگەرى, ۇندىستاندىق كۋمار راۆيمەن كۇش سىناستى. راحاتتىڭ ايگىلى قارسىلاسىنا ءالى جەتپەدى – 2:12. قالجان كۇمىس مەدالدى يەلەنسە, كۋمار قاتارىنان ءۇشىنشى رەت ازيانىڭ تەڭدەسسىزى دەپ تانىلدى.
70 كيلو سالماقتا كۇرەسكەن سىرباز تالعات بىلتىر الماتىدا وتكەن سارى قۇرلىقتىڭ باستى دوداسىندا قارسىلاس شىداتپاي, باس جۇلدەنى ولجالاعان ەدى. ۇلانباتىردا دا ءبىز جاس جولبارىستان ءدال سونداي ەرلىك كۇتتىك. بىراق سىرباز جاپونيالىق تايشي ناريكۋنيدىڭ وسال تۇسىن تابا المادى. دەسەك تە ءۇشىنشى ورىن ءۇشىن تارتىستا نامىسقا تىرىسقان قازاق بالۋانى پارسى ەلىنىڭ وكىلى مۋحاممادمەندي ياگەنەنجافاريدى جەڭدى – 4:0. 97 كيلو سالماقتاعى مامەد يبراگيموۆ تا قولا مەدالدى ەنشىلەدى. شەشۋشى تۇستا ول وزبەكستاندىق ماگومەدراسۋل راحيموۆتان باسىم ءتۇستى.
65 كيلو سالماقتاعى سانجار دوسجانوۆ تۇساۋكەسەر كەزدەسۋىندە تسوگبابراح تسەۆەنسۋرەننەن ويسىراي ۇتىلىپ, جارىستى مەرزىمىنەن بۇرىن اياقتادى. سول سەكىلدى 79 كيلوداعى جىگەر زاكىروۆتىڭ دە جولى بولمادى. ول جاپونيالىق يۋداي تاكاحاشيگە جول بەردى. وسىلايشا, ەركىن كۇرەس شەبەرلەرى العاشقى جارىس كۇنىن 1 كۇمىس جانە 2 قولا مەدالمەن قورىتىندىلادى.
