«دەپۋتاتتىق كورپۋس رەتىندە, بۇل سالانىڭ اشىق بولۋىنا ءمان بەرىپ وتىرمىز. سوندىقتان شەشىم قابىلداۋ كەزىندە جۇيەنىڭ ساپاسى مەن تيىمدىلىگىنە ەرەكشە ەكپىن قويىلعان. جاڭا جۇيەنىڭ نەگىزگى ولشەمشارتى رەتىندە وعان جىلدام ءارى بىرقالىپتى ءوتۋ, جول اقىسىن ءتيىمدى باقىلاۋ جانە جەڭىلدىگى بار ساناتتاعى ازاماتتارعا قولايلى جاعداي جاساۋ ەسكەرىلگەن», دەدى نۇر-سۇلتان قالاسى ءماسليحاتىنىڭ دەپۋتاتى ۆلاديسلاۆ سەرگەەۆ.
اتاپ ايتقاندا, قازىرگى كەزدە قىزمەت كورسەتۋشىلەر اراسىندا بىرنەشە كومپانيا بار – «Innoforce solutions» (Avtobys) جشس, «SMSBUS» جشس, «بپتس قازاقستان» جانە «تەحنوداتا» جشس كونسورتسيۋمى. سونىمەن قاتار, دەپۋتاتتارعا ءوز جۇيەسىن قاراستىرۋ ءۇشىن «الماتى قالاسىنىڭ كولىك حولدينگى» جشس «وڭاي» جۇيەسىن ۇسىندى. ءار كومپانيا وزدەرى ۇسىنىپ وتىرعان جول اقىسىن تولەۋ جۇيەسىنىڭ ارتىقشىلىعىمەن تانىستىردى.
وسى ورايدا VISA جانە Mastercard بانك كارتالارىمەن, NFC جۇيەسىمەن جابدىقتالعان سمارتفون ارقىلى, Bluetooth جانە باسقا دا تولەم جۇيەسى قامتىلعان. جولاقى تولەۋدىڭ جاڭا جۇيەسى كولىك كارتالارىن تولتىرۋدىڭ ونلاين رەجيمىنە كوشۋدى دە قامتيدى.
بەلگىلى بولعانداي, بۇگىنگى تاڭدا استانادا قوعامدىق كولىكتەگى جولاۋشىلار اعىنى ورتاشا 650 مىڭ ساپاردى قۇراپ وتىر. جولاۋشىلار جول اقىسىن ەكى جولمەن تولەي الادى – بۇل كولىك كارتاسىمەن جانە QR-كودتى سكانەرلەۋ ارقىلى. ول ءۇشىن ءارتۇرلى قوسىمشالار بار (Transcard, Kaspi.kz, Homebank, ۇيالى بايلانىس وپەراتورلارىنىڭ قوسىمشالارى جانە تاعى باسقا). جول ءجۇرۋ قۇنى 7 جىل بويى 90 تەڭگە دەڭگەيىندە ساقتالعان.
ايتا كەتەيىك, وتكەن جىلدىڭ 18 قازانىنان باستاپ ەلوردادا بىرنەشە قوعامدىق كولىك باعدارلارىندا پيلوتتىق رەجيمدە ءۇش كاسىپورىننىڭ جول اقىسىن تولەۋدىڭ جاڭا جۇيەسى تەستىلەۋدەن ءوتىپ جاتىر.
ءاربىر جۇيە ەگجەي-تەگجەيلى قاراستىرىلىپ, ولاردىڭ ەڭ ءتيىمدىسى, سونداي-اق جولاۋشىلار ءۇشىن قولايلىسى انىقتالاتىن بولادى.
