كەشە استانادا “نۇر وتان” حدپ ورتالىق اپپاراتى عيماراتىندا بالالار قۇقىعى تۋرالى كونۆەنتسيانىڭ 20 جىلدىعىنا وراي “بالالىق شاقتى قورعاۋ جانە ىسكە اسىرۋ جولدارى” تاقىرىبىندا ورتالىقازيالىق عىلىمي-تاجىريبەلىك كونفەرەنتسيا ءوتتى.
ءبىزدىڭ ەلىمىز بۇۇ-نىڭ بالا قۇقىعى تۋرالى كونۆەنتسياسىنا قوسىلعاننان بەرگى ارالىقتا بۇل ماسەلەدە حالىقارالىق ۇيىمعا ەكى رەت اتقارىلعان ىستەر حاقىندا بايان ەتكەن. ونىڭ العاشىقىسى 2003 جىلى بولسا, ەكىنشىسى 2007 جىلى باياندالعان. قازاقستاندا عانا ەمەس, جالپى ورتالىق ازيا ەلدەرىندە بالالاردىڭ دامۋىنا قولايلى ساياساتتىڭ دامۋىنا جول اشۋ ماسەلەلەرىن ءسوز ەتكەن كونفەرەنتسيادا ءبىلىم جانە عىلىم مينيسترلىگى بالالار قۇقىن قورعاۋ كوميتەتىنىڭ ءتورايىمى رايسا شەر بۇگىنگى كۇنى مەكتەپ جاسىنا دەيىنگىسى, مەكتەپ جاسىنداعىسى, سونداي-اق وقيتىنى بار 18 جاسقا تولماعان 4 ميلليون 755 مىڭ 902 بالا بار ەكەندىگىن ايتتى. ونىڭ ىشىندە وتكەن جىلى دامۋ مۇمكىندىگى شەكتەۋلى 150 مىڭعا جۋىق ءجاسوسپىرىم بارلىعى انىقتالسا, 42 مىڭنان استام بالا جەتىم نەمەسە اتا-اناسىنىڭ قامقورلىعىنسىز قالعاندار ەكەن. ايتسە دە, وسى 42 مىڭ ءجاسوسپىرىمنىڭ بارلىعى بالالار ۇيىندە تاربيەلەنىپ جاتقان جوق. كىشكەنتايلارىنان تاعدىر يىقتارىنا سالماعىن سالعان بۇل جەتكىنشەكتەردىڭ 25 مىڭى قازاقستان ازاماتتارىنىڭ قامقورلىعىنا الىنعان. سونداي-اق 2 مىڭنان استام بالا رەسپۋبليكاداعى وتباسىلاردا تاربيەلەنۋدە. ال 15 مىڭ بالا دەنساۋلىق ساقتاۋ, حالىقتى الەۋمەتتىك قورعاۋ, ءبىلىم بەرۋ جۇيەلەرىنىڭ ۇيىمدارىندا تاربيەلەنىپ, سوندا ءومىر كەشۋدە. وكىنىشكە قاراي, وسى 15 مىڭنىڭ ىشىندەگى تەك 2 مىڭنان استامى جەتىمدەر, ال قالعاندارىنىڭ اتا-انالارى بار كورىنەدى. امال نە, “سەنىڭ تابانىڭا كىرگەن شوڭگە مەنىڭ ماڭدايىما قادالسىن”, دەيتىن اتا-انا ءتۇزۋ جولدان تايسا, باۋىر ەتى بالاسىنىڭ جايىن قايدان ويلاسىن؟! كوميتەت باسشىسىنىڭ ايتۋىنشا, بۇۇ-نىڭ بالالار قۇقى جونىندەگى كوميتەتىنىڭ ۇسىنىسىنا سايكەس ەلىمىزدە ۇلتتىق ءىس-قيمىل جوسپارى ىسكە اسىرىلۋى كەرەك. “بۇگىندە وسىنداي ۇلتتىق ءىس-قيمىل جوسپارىنا 2007-2011 جىلدارعا ارنالعان “قازاقستان بالالارى” باعدارلاماسىن جاتقىزۋعا بولادى. بيىلعى جىلى بۇل باعدارلامانىڭ ەكىنشى كەزەڭى باستالادى”, – دەدى رايسا شەر. قازىرگى كەزدە ەلىمىزدە بالالار ماسەلەسىمەن اينالىساتىن 600-گە تارتا ۇكىمەتتىك ەمەس ۇيىم بار ەكەن. ەلىمىزدەگى زاڭ شىعارۋشى جانە اتقارۋشى ورگانداردىڭ وكىلدەرى, قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا قر پرەزيدەنتى جانىنداعى ادام قۇقىقتارى جونىندەگى كوميسسيا, ۇكىمەتتىك ەمەس جانە حالىقارالىق ۇيىمدار وكىلدەرى قاتىسقان كونفەرەنتسيا ادام قۇقىعىنىڭ نەگىزىندە بالالار قۇقىقتارىن قورعاۋ ينستيتۋتىنىڭ جۇمىسىن ورىستەتۋدىڭ ماڭىزىنا باسا ءمان بەردى. انار تولەۋحانقىزى.
