بۇل تۋرالى ءبىلىم جانە عىلىم ءمينيسترى اسحات ايماعامبەتوۆ: «پرەزيدەنت قولداۋىنىڭ ناتيجەسىندە مەكتەپ تۇلەكتەرىنىڭ بيۋدجەت ەسەبىنەن وقۋعا مۇمكىندىگى ارتىپ كەلەدى. كوللەدجدەردە ءبىلىم الۋ ءۇشىن بيىل ءبىلىم بەرۋ گرانتتارىنىڭ سانى دا رەكوردتىق كورسەتكىشكە, ياعني 31 مىڭ گرانتقا دەيىن ۇلعايىپ وتىر. گرانتتاردىڭ باسىم بولىگى تەحنيكالىق ماماندىقتار بويىنشا بەرىلەدى. سونداي-اق ءبىز ەمتيحانداردى الىپ تاستادىق جانە ازاماتتاردىڭ الەۋمەتتىك وسال ساناتتارى ءۇشىن ارنايى كۆوتالاردى ەنگىزدىك. گرانتتار بارلىق كوللەدجگە بەرىلمەيدى. ستۋدەنت گرانتتى جەڭىپ الىپ, بەلگىلى ءبىر كوللەدجدى تاڭدايدى. وسىلايشا, قارجىلاندىرۋ ستۋدەنت تاڭداعان كوللەدجگە جىبەرىلەدى. مۇندا «اقشا ستۋدەنتتىڭ سوڭىنان ەرەدى» قاعيداسى جۇمىس ىستەيدى. بۇل كادرلاردى دايارلاۋ بويىنشا كوللەدجدەردىڭ باسەكەگە قابىلەتىن ارتتىرادى. ەڭ باستىسى – ەڭبەك نارىعىنىڭ سۇرانىسىنا ساي بولۋ», دەدى.
ءتيىستى ۆەدومستۆونىڭ حابارلاۋىنشا, گرانتتاردى ءبولۋ كەزىندە حالىقتىڭ الەۋمەتتىك وسال توپتارىنان شىققان بالالارعا ارنالعان كۆوتالار سانى ۇلعايتىلادى. ياعني كوپبالالى نەمەسە تولىق ەمەس وتباسىلاردىڭ بالالارى, سونداي-اق ەرەكشە قاجەتتىلىكتەرى بار بالالاردى تاربيەلەپ وتىرعان وتباسىدان شىققان ۇمىتكەرلەردىڭ گرانت الۋ مۇمكىندىگى الدەقايدا جوعارى بولادى. بۇعان قوسا بيىل مەملەكەتتىك ءبىلىم بەرۋ تاپسىرىسىن ءبولۋ كەزىندە ينجەنەرلىك, وڭدەۋ, قۇرىلىس سالالارىنا, سونداي-اق پەداگوگيكالىق جانە جاراتىلىستانۋ عىلىمدارىنا ەرەكشە كوڭىل بولىنەدى.
2022 جىلى مەملەكەت باسشىسىنىڭ تاپسىرماسى بويىنشا تەحنيكالىق كادرلاردى دايارلاۋ جانە تەحنيكالىق باعىتتار بويىنشا مەملەكەتتىك تاپسىرىس ۇلەسى 60%-عا دەيىن ارتتى. ستۋدەنتتەر اراسىندا سۇرانىسقا يە جانە قاجەتتى ماماندىقتارعا جاڭا گرانتتار بولىنەدى. وسى ارقىلى ۋنيۆەرسيتەتتەر مەن كوللەدجدەر ستۋدەنتتەرىنىڭ كوپ بولىگى مەملەكەت ەسەبىنەن تەگىن وقۋعا مۇمكىندىك الادى.
