ايماقتار • 20 ءساۋىر، 2022

ءۇش زاۋىت اشىلادى

57 رەت كورسەتىلدى

قاراعاندىنىڭ ىرگەسىندەگى ساران قالاسىنىڭ ارقا توسىندەگى يندۋستريالىق ايماققا اينالاتىن سىڭايى بار. مىسالى، شاعىن شاھاردا وسى جىلدىڭ سوڭىنا تامان ءۇش جاڭا زاۋىت پايدالانۋعا بەرىلمەك.

تاياۋدا قاراعاندى وبلى­سى­نىڭ اكىمى جەڭىس قاسىمبەك پەن «بايتەرەك» ۇلتتىق باسقارۋشى حولدينگىنىڭ باسقارما توراعاسى قانات شارلاپاەۆ ساران قالا­سىندا بولىپ، وسىنداعى يندۋس­تريا­لىق جوبانىڭ ءبىرى – شينا شىعاراتىن زاۋىت قۇرىلىسىنىڭ جاي-جاپسارىمەن تانىس­تى. ايتا كەتۋ كەرەك، بۇل كاسىپورىننىڭ بولاشاقتا ورتالىق ازياداعى ەڭ ءىرى زاۋىتتاردىڭ بىرىنە اينالۋ مۇمكىندىگى بار. جاۋاپتى ما­مان­داردىڭ ايتۋىنشا، ءبىرىنشى كەزەڭدە ونىڭ قۋاتتىلىعى جىل سايىن 3،5 ملن شينا شىعارۋعا جە­تەدى. ودان كەيىنگى ۋاقىتتا كا­سىپورىن جىلىنا 9 ملن كوپبەيىندى شينا جاساپ، ءوندىرىس كولەمىن ۇلعايتادى.

قۇرىلىسى 2021 جىلى باس­تال­عان زاۋىتتىڭ جوبا جەتەك­شى­سى ارتيوم كرىموۆ جۇمىستىڭ كەستەگە ساي ءجۇرىپ جاتقانىن اتاپ ءوتتى. ءتىپتى، كەيبىر جاعدايلاردا جوس­پارداعىدان وزىپ كەتۋشىلىك تە بار ەكەن.

– بيىل بارلىق عيمارات پەن قۇرىلىستى جۇزەگە اسىرۋعا كىرىس­تىك. قازىر قۇرال-جابدىقتارعا ارنالعان ىرگەتاستار 70%-عا دايىن، – دەپ باياندادى ول.

«KamaTyresKZ» جشس – «ال­ليۋر» كومپانيالار توبى» اق جانە «تاتنەفت» جاق بىر­لەس­­كەن كاسىپورنى سالىپ جاتقان شي­نا زاۋىتى وسى جىلدىڭ سوڭى­نا قا­راي اشىلادى. مۇندا مىڭ­نان اس­تام ادام ەڭبەك ەتەتىن بولادى. قا­زىردىڭ وزىندە زاۋىت قىزمەت­كەر­لەرى رەسەيدەگى «تاتنەفت» كوم­پانياسىنىڭ شينا شىعا­را­تىن كاسىپورنىندا تاعىلىم­دا­ما­دان ءوتىپ جاتىر.

«بايتەرەك» ۇلتتىق باسقا­رۋ­شى حولدينگىنىڭ باسقارما تو­را­­عاسى قانات شار­­لاپاەۆ شي­نا ءوندىرۋ زاۋىتى اتال­عان حول­دينگ­تىڭ قۇرىلىمىنا ەنەتىن قازاق­­­ستان­نىڭ دامۋ بانكىنىڭ ەن­شىلەس ۇيىمى – ونەركاسىپتى دا­مىتۋ قورى قار­جى­لاندىراتىن ءىرى جوبا ەكەنىن ايتتى.

– اتالعان جوبا جۇمىس ورىندارىن قۇرۋعا جانە ەلىمىزدىڭ ونەر­­كاسىپتىك الەۋەتىن دامىتۋعا با­عىتتالعان، – دەپ اتاپ ءوتتى ق.شار­لاپاەۆ.

ساراندا شينا زاۋىتىنان باسقا مىرىشتاۋ جەلىسى بار مەتالل بۇيىمدارىن شىعاراتىن كا­سىپورىننىڭ دا قۇرىلىسى قار­قىندى ءجۇرىپ جاتىر. مۇندا جا­رىقتاندىرۋ تىرەكتەرى مەن دىڭ­گەكتەرى، توسقاۋىل جول قور­شاۋ­لا­رى وندىرىلەدى. قازىرگى ۋا­قىت­تا وندىرىستە جوعارى جانە دال­دىگى جوعارى تەحنولوگيالاردى پايدالاناتىن زاماناۋي جاب­دىق­تار ساتىپ الىنعان. جوس­پار­دا كوپ ادامدى جۇمىسقا ورنالاستىرۋ دا بار.

قالادا قۇرىلىسىن Kaz­Isolation كومپانياسى باستاعان تاعى ءبىر كاسىپورىن – قوسپالانعان بولاتتان ءونىم ءوندىرۋ بو­يىنشا قۇيۋ تسەح تا بولاشاعى زور يندۋستريالىق جوبانىڭ ءبىرى. پاي­دا­لانۋعا بەرىلگەن كەزدە بۇل تسەح­تىڭ قۋات­تى­لىعى جىلىنا ەكى مىڭ توننا ءونىم شى­عا­رۋعا جە­تەدى. مامانداردىڭ ايتۋىنشا، كاسىپورىن ونىمدەرىنە دەگەن جەرگىلىكتى نارىقتا دا، ەلىمىز بويىنشا دا زور سۇرانىس بولادى دەگەن بولجام بار.

«بايتەرەك» ۇبح باسقارما توراعاسى Yutong ماركالى اۆتوبۋس پەن ارنايى كولىك قۇرالدارىن شىعاراتىن QazTehna زاۋىتىنىڭ تىنىس-تىرشىلىگىمەن دە تانىس­تى. بۇل كاسىپورىن ءوزىنىڭ تولىق قۋاتىنا جەتكەنىندە، ونداعى جۇ­مىس­شىلاردىڭ سانى 1 مىڭنىڭ شاماسىندا بولادى دەگەن بولجام بار.

قازىر زاۋىتتاعى 400 ماماننان تۇراتىن ۇجىم ەكى جىلدىڭ ىشىندە ءوندىرىستى جولعا قويىپ، تومەن ەدەندى قالالىق جانە 10 مەترلىك اۆتوبۋستاردىڭ ەكى جا­ڭا مودەلىن شىعارۋدى يگەر­گەن. كاسىپورىننىڭ بولاشاق­قا باعىتتالعان جوسپارى دا اۋقىمدى: كۇن تارتىبىندە اۆتو­قۇ­­­رام­­داۋىشتار ءوندىرىسى ءۇشىن تسەح­­تاردى كەڭەيتۋ جانە قالپىنا كەل­تىرۋ جۇمىستارى تۇر.

جالپى، ساران قالاسىندا بو­لىپ، مۇنداعى يندۋستريالىق جو­بالاردىڭ قالاي جۇزەگە اسىرى­لىپ جاتقانىن ءوز كوزىمەن كورگەن ق.شارلاپاەۆ شاعىن شاھاردىڭ ونەركاسىپتىك الەۋەتىنىڭ زور ەكەنىن اتاپ ءوتتى. جانە ول جاعىمدى جاع­دايات­تىڭ تۇرعىنداردىڭ تۇ­راق­­تى جۇمىس پەن تابىسقا يە بولۋىنا جول اشاتىنىنا سەنىم ءبىلدىردى.

 

قاراعاندى وبلىسى،

ساران قالاسى

سوڭعى جاڭالىقتار

11 تامىزعا ارنالعان ۆاليۋتا باعامى

ەكونوميكا • بۇگىن، 09:40

ۇقساس جاڭالىقتار