قوعامدىق وي-سانادا بيلىك پەن بۇقارا اراسىنداعى جاڭا ءتيىمدى قارىم-قاتىناستار جاڭا ساياسي مادەنيەتتىڭ قالىپتاسۋىنا وڭ اسەر ەتۋدە. بۇل حالىقتىق سەنىمدى نىعايتا تۇسكەنىن كورسەتەدى. سونىمەن بىرگە قاراپايىم حالىقتىڭ تالابى دا كۇشەيىپ, وزدەرىنىڭ قوعامداعى وي-ۇسىنىستارىن اشىق جەتكىزۋدە. تۇتاستاي العاندا قوعام ادىلەتتىلىك پەن اشىقتىققا, جاريالىلىق پەن جاڭارۋعا نەگىزدەلگەن بەتبۇرىستاردىڭ تىرەگىنە اينالدى.
جاڭا قازاقستاندى قۇرۋدىڭ باستى قاعيداتى – ادىلدىك پەن الەۋمەتتىك ادىلدىك بولۋىنىڭ تاريحي ءمانى مەن ونىڭ ناتيجەسىنە ءوز ومىرىمىزدە-اق تىلەۋلى حالقىمىزبەن بىرگە كۋا بولاتىنىمىزعا سەنەمىز.
بۇگىندەرى قازاقستاندا مەملەكەتتىك باسقارۋدىڭ جاڭا مودەلىنە كوشەتىن ءىس-شارالار قولعا الىنىپ, ونى جۇزەگە اسىرۋدىڭ قاجەتتى قادامدارى جاسالۋدا.
مۇنىڭ ءبارىن حالىق كورىپ, ەستىپ وتىر. كوپتەگەن وزەكتى ماسەلەنىڭ دەر كەزىندە شەشىلۋىنەن ۇتارىمىز كوپ. ماسەلەن, جۇرت قانداي دا ءبىر ماسەلەنى جەرگىلىكتى اتقارۋ ورگاندارى تاراپىنان قىلاڭ بەرەتىن, تىپتەن اۋرە-سارساڭعا سالاتىن سوزبۇيدالىق پەن قاعازباستىلىق سەكىلدى قۇبىلىستاردى قالامايدى.
مەملەكەت باسشىسىنىڭ كۇنى كەشە مەملەكەتتىك اپپاراتتىڭ قىزمەتىن بيۋروكراتيادان ارىلتۋ تۋرالى جارلىققا قول قويعانىندا بۇل ماسەلەنىڭ ۇلكەن ءمانى مەن بەرەتىن ناتيجەلەرى قۇپتاۋ تۇرعىسىندا قابىلدانىپ وتىر. جاڭا زامان, جاڭاشا تالاپ, ناقتى قادامدار بارلىق رەفورمالىق ءىستى ىلگەرىلەتۋگە ىقپال ەتەدى.
جارلىق بيۋروكراتيادان ارىلتۋدىڭ نەگىزگى قاعيداتتارىن ايقىنداپ بەردى. ولار – فورما ءمانىنىڭ باسىمدىعى, باستاپقى قالپى بويىنشا تسيفرلاندىرۋدى, باسقارۋشىلىق جاۋاپكەرشىلىكتى, ۇزدىكسىز جەتىلدىرۋدى, رەگلامەنتتەۋدىڭ وڭتايلىعىنا بايلانىستى ناقتىلانعان. بۇل رەتتە جۇيەلى جانە قولدانبالى شارالار كەشەنى قاراستىرىلعان.
وسىندا كوزدەلگەن شارالاردىڭ جۇزەگە اسىرىلۋى مەملەكەتتىك اپپاراتتا شەشىمدەردىڭ قابىلدانۋىن جىلدامداتادى, مەملەكەتتىك ورگاندارداعى ءبىرىنشى باسشىلاردىڭ دەربەستىگى مەن جەكە جاۋاپكەرشىلىگىن ارتتىرادى, قۇجات اينالىمى مەن ەسەپ بەرۋشىلىكتى قىسقارتادى. اتاپ ايتقاندا, جۇكتەلگەن مىندەتتەردى جىلدام جۇزەگە اسىرۋ ءۇشىن مەملەكەتتىك ورگاندارعا نورماتيۆتىك قۇقىقتىق اكتىلەردى وزدەرىنىڭ فۋنكتسيالارىن زاڭنامالىق دەڭگەيدە ناقتىلاپ جاتپاي-اق قابىلداۋعا قۇقىق بەرىلەدى.
مەملەكەتتىك اپپاراتتىڭ ءتيىمدى جۇمىس ىستەۋىن قامتاماسىز ەتەتىن وزىق تالاپتار مەن جاڭا مىندەتتەردىڭ ءمان-ماعىناسى جاڭا ۋاقىتقا ساي جاۋاپكەرشىلىك جانە مەيلىنشە ايقىندىق سيپاتىمەن ماعىنالى.
ۇكىمەتكە ون جۇمىس كۇنى ىشىندە وسى جارلىقتى ىسكە اسىرۋ جونىندەگى ءىس-قيمىل جوسپارىن بەكىتۋدى قامتاماسىز ەتۋدى اتاپ كورسەتكەن. بۇل, البەتتە, ۇلكەن مىندەتتەر مەن جاۋاپكەرشىلىك جۇكتەيدى.
مۇنى بارشا وتانداستارىمىز جاڭا قازاقستان قۇرۋ ءىسى اياسىندا اتقارىلىپ جاتقان سەنىمدى جانە سەرپىندى قادامدار مەن ىسكەرلىك جاعدايدىڭ تۇبەگەيلى وزگەرىستەرى دەپ بىلەدى.
مەيرامبەك تولەپبەرگەن,
ءماجىلىس دەپۋتاتى
